Yangi qo‘shma korxona asfalt-beton qorishmalar va beton buyumlar ishlab chiqaradi - Hukumat qarori

Ushbu qaror Prezidentning 27.11.2018 yildagi «Avtomobil yo‘llarini qurish va ulardan foydalanish sohasida ishlarni tashkil etishning ilg‘or xorijiy uslublarini joriy etish chora-tadbirlari to‘g‘risida»gi PQ-4035-son hamda 1.02.2019 yildagi «O‘zbekiston Respublikasi va Germaniya Federativ Respublikasi o‘rtasida ko‘p qirrali hamkorlikni yanada kengaytirish chora-tadbirlari to‘g‘risida»gi PQ-4145-son qarorlari ijrosini ta'minlash maqsadida qabul qilingan.
 
Norma’ning yozishicha, hujjat bilan quyidagilar ma'lumot uchun qabul qilindi:

a) Transport vazirligi huzuridagi Avtomobil yo‘llari qo‘mitasi va «GP Gunter Papenburg AG» kompaniyasi (Germaniya) o‘rtasida yo‘l qurilishi uchun asfalt-beton qorishmalari, tayyor beton buyumlar ishlab chiqarishni tashkil etish to‘g‘risidagi bitim imzolandi. Shuningdek bitimda Germaniya texnologiyalari va asbob-uskunalarini qo‘llagan holda qurilish-montaj ishlarini bajarish bo‘yicha MChJ shaklidagi «Papenburg Uzbekistan» QKni tashkil etish nazarda tutilgan;

b) «Papenburg Uzbekistan» MChJ ustav fondi:

• 30 foizi – Qo‘mita tarkibidagi «Transyo‘lqurilish» DUKning MB kursi bo‘yicha o‘tkazilgan 1 714 286 yevro ekvivalentidagi pul mablag‘lari hisobiga;
• 70 foizi – «GP Gunter Papenburg AG» (Germaniya)ning «Papenburg International GmbH» kompaniyasi bir yil davomida o‘z mablag‘lari va jalb qilingan mablag‘lar hisobidan 4 mln yevro miqdoridagi to‘g‘ridan-to‘g‘ri investitsiyasi hisobiga shakllantiriladi.

Davlat aktivlarini boshqarish agentligiga bir oy muddatda «Papenburg Uzbekistan» MChJ bilan Qo‘mita tarkibidagi «Toshkent ko‘priklardan foydalanish» DUKning Toshkent sh., Bektemir tumani, Porloq ko‘chasi, 14-uy manzilida joylashgan bino va inshootlar hududidan foydalanilmayotgan 6,1 ga yer maydoni va undagi bino-inshootlarni «nol» xarid qiymatida sotish bo‘yicha imzolangan kelishuv bitimi doirasida investitsiya va ijtimoiy majburiyatlarni belgilagan holda shartnoma tuzish topshirildi.
 
Qo‘mitaga Vazirlar Mahkamasi bilan kelishilgan holda «Papenburg Uzbekistan» MChJning O‘zbekiston tomonidan ishtirokchisini o‘zgartirish bo‘yicha jamiyat boshqaruv organiga takliflar kiritish huquqi berildi.
 
«Papenburg Uzbekistan» MChJga, istisno tariqasida, asfalt-beton qorishmalar va beton buyumlar ishlab chiqarishda foydalanish maqsadida qum-shag‘al materiallari qazib olish uchun FVV huzuridagi «Xavfsiz daryo» DUK bilan to‘g‘ridan-to‘g‘ri shartnoma tuzishga ruxsat berildi.
 
Loyihani amalga oshirishga jalb etiladigan xorijiy mutaxassislar va ularning oila a'zolariga ko‘p martalik vizalar rasmiylashtiriladi, shuningdek ichki ishlar organlari tomonidan ro‘yxatdan o‘tkazish ta'minlanadi.
 
Hujjat 10.08.2020 yildan kuchga kirdi.