O‘z uslubi, o‘z yo‘nalishiga ega faol vlogerlardan biri – Abdukarim Mirzayev o‘zining kichik hikoyalari orqali ijtimoiy tarmoqlarda ko‘plab muxlislar orttirmoqda.
O‘tgan haftada Abdukarim Mirzayev bilan intervyuning birinchi qismini taqdim etgan edik. Bugun suhbatning ikkinchi qismini mushtariylar e'tiboriga havola etamiz.
– Shu vaqtga qadar hech kim sizga bermagan, ammo siz gapirishingiz kerak bo‘lgan savol yoki mavzu bo‘lganmi?
– Gapirilayotgan hikoyalar bo‘lsin, mulohazalar bo‘lsin, bularning hammasi hech kim menga bermayotgan, ammo men gapirishim kerak bo‘lgan mavzular. O‘zim xohlamasam hech narsani maromiga yetkazolmayman.
Nega savolimga javob bermaysiz, nega savolimga javob bermaysiz deyishadi. Men aytdimki, do‘stlar men nima gapirishni istayotgan bo‘lsam, gapiryapman. Gapirmayapmanmi, demak, men bu mavzu haqida gapirishni xohlamayapman. Xoh video bo‘lsin, xoh audio mahsulot bo‘lsin, bularning barchasi hech majburiyatlarsiz ich-ichimdan istagan mavzular. Va bunday mavzular juda ham ko‘p.
– Inson uchun eng foydali va eng xavfli uch odat?
– O‘zini aldab yashamaslik – men uchun hayotimning eng birinchi sharti. Nima yo‘qotgan bo‘lsam ham, o‘zimni aldamaganim uchun yo‘qotdim. Nimani topgan bo‘lsam ham, o‘zimni aldamaganim uchun topdim. Inson har kimni aldab yashashi mumkin, ammo o‘zini aldab, biron narsalarga ovutib, ishontirib, ko‘ndirib yashayotgan bo‘lsa, o‘sha inson, juda ham baxsiz inson.
Siz aytayotgan uchta narsa o‘rniga ham mana shu rostlikni qo‘ygan bo‘lar edim. Har bir munosabatda rostlik. Ibodatdan tortib taomlanishgacha, farzandingizdan tortib odamlar bilan o‘rtangizdagi munosabatgacha rostlik. Rostgo‘ylik, o‘zini aldab yashamaslik – baxtli yashashning birinchi shartidir.
– Har zamon va makonning o‘z ideallari bo‘ladi va odamlar shularga ergashadi. Insonni tafakkur qilishga chorlovchi inson sifatida bunga qanday qaraysiz? Zamonaviy adabiyotimizda, san'atimizda bugungi kun ideallari, ijodkorlari bormi?
