15:59 / 09.09.2020
17705
Жаҳон рекорди сари ошиқаётган Роналду, Зиданга етиб олган Гризманн ва ЖЧ-2018 финалининг такрори. Миллатлар лигасининг энг муҳим 7 воқеаси

Ўтган бир ҳафта давомида - 3 сентябрдан 8 сентябргача Европада миллий жамоалар иштирокидаги УЕФА Миллатлар лигасининг 1-2-тур учрашувлари ўтказилди. Ўтган 54та ўйин атрофи ва якунларига кўра, Tribuna.uz ҳафтанинг энг муҳим 7 воқеасини саралади.

Серхио Рамос — энг яхши тўпурар ҳимоячи

УЕФА Миллатлар лигаси 2-туридан кейин Испания миллий жамоаси ҳимоячиси Серхио Рамос голлари сони бўйича миллий жамоалар ҳимоячилари орасида энг яхши тўпурарга айланди.

Рамос турнирнинг 2-тури доирасидаги Испания - Украина (4:0) учрашувида дублга эришди. Натижада Серхионинг Испания миллий жамоаси сафидаги голлари сони 23тага етди ва у бу борада аргентиналик собиқ ҳимоячи Даниэль Пассареллани (22та гол) ортда қолдириб, тўпурар ҳимоячилар орасида 1-ўринга чиқиб олди.

Испания миллий жамоаси А лига 4-гуруҳида 2-турдан кейин 4 очко билан пешқадамга айланди. Испанлар Германия билан дуранг қайд этган бўлишса (1:1), украиналикларни йирик ҳисобда (4:0) мағлуб этишди.

ЖЧ-2018 финали такрорланган ўйинда Гризманн Зиданга етиб олди

Сешанба оқшомида ўтказилган мусобақанинг 2-тури доирасидаги Франция – Хорватия ўйинида 2018 йилги жаҳон чемпионати сценарийси такрорланди.

Москвадаги ўйин сингари «Стад де Франс»да ўтган баҳсда ҳам 4:2 ҳисоби қайд этилиб, Дидье Дешам қўл остидаги францияликлар устун келишди. Икки йил аввалги финалда бўлгани каби бу сафар ҳам французлар ҳужумчиси Антуан Гризманн Хорватия жамоаси дарвозасини ишғол этди.

«Барселона» форвардининг ушбу голи унинг Франция миллий жамоаси сафидаги 31-голи сифатида қайд этилди. Натижада Антуан миллий жамоа тарихидаги голлари сони бўйича 5-ўринга чиқиб олиб, бу борада афсонавий яримҳимоячи Зинеддин Зиданга етиб олди. Франция миллий жамоаси сафидаги энг яхши тўпурар Тьерри Анри саналади. Унинг ҳисобида 51та гол мавжуд.

Дунё рекорди сари ошиқаётган Роналду

УЕФА Миллатлар лигаси 2-тури доирасида Португалия миллий жамоаси сафарда Швеция устидан ғалабага эришди (2:0). Ўйинда португалияликлар форварди Криштиану Роналдунинг дубли меҳмонларга 3 очкони келтирди.

Бу голлар «Ювентус» голеадори учун миллий жамоа либосидаги 100 ва 101-голлар сифатида қайд этилди. Эътиборлиси, Роналду кўҳна қитъа миллий жамоалари орасида 100та гол урган илк европалик футболчига айланди.

Криштиану миллий жамоада киритилган голлари сони бўйича жаҳон рекордини янгилашга яқин келмоқда. Бу борадаги рекорд Эрон миллий жамоаси афсонаси Али Даийга тегишли бўлиб, у форслар таркибида 109та голга муаллифлик қилган. Шундай қилиб, Роналдунинг дунё рекордини такрорлаши учун мамлакати жамоаси сафида 8та гол қолди.

106 йил ичидаги энг ёш дебютант

«Ренн» яримҳимоячиси Эдуардо Камавинга Миллатлар Лигаси доирасида Франция миллий жамоаси сафида Хорватияга (4:2) қарши баҳсда дебют қилди.

Opta'нинг маълумотига кўра, Камавинга Франциянинг 106 йил ичидаги энг ёш дебютантига айланди – 17 ёшу 10 ойлик. Яримҳимоячи миллий жамоадаги энг ёш дебютантлар орасида учинчи бўлиб турибди. Рекордчи –Жюлен Вербруже (1906 йил, 16 ёшу 10 ойлик), иккинчи ўринда эса Морис Гастиге (1914 йил, 17 ёшу 4 ойлик).

Ҳоланддан илк голлар ва ажойиб статистика

Норвегия миллий жамоаси мусобақанинг 2-тури доирасидаги Шимолий Ирландияга қарши майдонга тушиб, йирик 5:1 ҳисобида ғалабага эришди.

Ушбу ўйинда норвегияликлар форварди Эрлинг Ҳоланд дублга эришди. Эътиборлиси, бу голлар «Боруссия» форвардининг миллий жамоадаги дастлабки голларига айланди. 20 ёшли форвард 2020 йилда ажойиб статистика эга: 20 ўйинда 19та гол.

Фоден ва Гринвуд Англия миллий жамоасидан четлатилди

Миллатлар лигасидаги ҳафта можароси Англия миллий жамоада рўй берди.

«Манчестер Сити» яримҳимоячиси Фил Фоден ва «Манчестер Юнайтед» ҳужумчиси Мэйсон Гринвуд миллий жамоа ихтиёрида карантин қоидаларини қасддан бузишган. Қайд этилишича, Исландияга қарши ўйиндан кейин ёш футболчилар миллий жамоа жойлашган меҳмонхонага кўнгилхушлик учун бегона қизларни чақиришган. Меҳмонлардан бири ижтимоий тармоқда бу ҳақда маълум қилгач, футболчиларнинг яширин ҳатти-ҳаракати ошкор бўлган. Натижада Фоден ва Гринвуд Англия миллий жамоасидан четлатилиб, Исландиядан Манчестерга қайтариб юборилган.

Англия миллий жамоаси бош мураббийи Гарет Саутгейт Фоден ва Гринвуднинг ҳатти-ҳаракатини қоралаб, бу жиддий масала эканлигини таъкидлагач, футболчилар барчадан узр сўрашган.

Мбаппе коронавирус юқтириб олди, Чехия миллий жамоаси инфекция ўчоғига айланди

Чехия миллий жамоасининг ўқув-машғулот йиғинига чақирилган асосий таркиб футболчиларининг аксариятида коронавирус аниқлангач, қолган барча футболчилар инфекция тарқалиши хавфи туфайли жамоани тарк этишди.

Шу сабабли Чехия миллий жамоаси мураббийлар штаби Миллатлар Лигаси доирасида Шотландияга қарши ўйинга 24 нафар футболчини чақиришди, шулардан 22таси дебютантлардир. Якунда Чехия ўз майдонида Шотландияга (1:2) ҳисобида мағлубиятга учради.

Шунингдек, Франция миллий жамоаси таркибига келиб қўшилган Килиан Мбаппеда ҳам коронавирус аниқланди. Швецияга қарши баҳсда ягона голи билан Францияга ғалаба келтирган 21 ёшли ҳужумчида 2-тур доирасидаги Хорватия билан ўйиндан олдин COVID-19 инфекцияси аниқланган ва у хорватларга қарши майдонга тушмади.

Top