Ronaldu va Saloh YeChLsiz qoladimi? Italiya, Angliya va Fransiyada so‘nggi tur intrigalari

Bugun kuchli beshlikdagi uch chempionatda mavsum yakuniga yetadi. Bizni bir qator syurprizlar kutib turgan bo‘lishi mumkin. O‘tgan yilgi chempionlar «Yuventus» va «Liverpul» hatto YeChL yo‘llanmasidan quruq qolish xavfi ostida qolishgan bo‘lsa, Parij taxtni «Lill»ga topshirishga yaqin.

Italiya: «Yuventus»ning taqdiri «Atalanta» qo‘lidami?

Italiyada chempion ham, A Seriyani tark etadigan jamoalar ham ma'lum bo‘lib ulgurdi. Asosiy savol Chempionlar Ligasiga beriladigan ikki yo‘llanmaga da'vogarlik qilayotgan uch jamoadir. «Inter»dan tashqari, «Atalanta» ham (78 ochko) to‘rtlikdan joy olib ulgurdi. Zero beshinchi o‘rindagi «Yuventus» (75 ochko) so‘nggi turda bergamoliklarga yetib olgan taqdirda ham, o‘zaro o‘yinlar natijasiga ko‘ra, «Atalanta» yuqoridan joy oladi. Gomes, Ilichich kabi yetakchilarni ketkazib yuborib ham, A Seriya va Italiya kubogida 2-o‘rin, Chempionlar ligasida guruhdan chiqish vazifasi uddalangani Gasperini shogirdlari uchun ajoyib natija.

«Atalanta» bugun «Milan»ni (76 ochko) qabul qiladi. Shuningdek, «Verona»ni o‘z maydonida qabul qiladigan «Napoli»da ham 76 ochko bor. Demak, «Milan» va «Napoli» o‘z o‘yinlarini yutadigan bo‘lishsa, «Yuventus» har qanday natija qayd etishidan qat'i nazar, beshinchi o‘rinda qolib ketadi. «Milan» va «Napoli»ning to‘rtlikka kirish imkoniyati o‘z qo‘llarida qolgan.

Agar «Milan» va «Napoli» ochko yo‘qotib, «Yuventus» ularni quvib o‘tadigan bo‘lsa, bu ikki jamoadan qaysi biri to‘rtinchi o‘rinda qoladi? «Milan». Chunki milanliklar o‘zaro o‘yinlarda «Napoli»ni safarda 3:1 hisobida yutib, o‘z maydonlarida 0:1 yutqazgan. Ya'ni agar «Milan» va «Napoli» so‘nggi turda bir xil ochko to‘playdigan bo‘lishsa, «Milan» to‘rtlikda qolib, «Napoli» beshinchi o‘ringa tushib ketishi mumkin.

7 ochko tepadan, 7 ochko pastdan farq bilan 6-o‘rinni egallab turgan «Latsio» Yevropa Ligasi yo‘llanmasini naqd qilgan. Yuqoridagi raqobatda mag‘lub bo‘lib, YeChLdan quruq qolgan jamoa unga sherik bo‘ladi. Rimning boshqa bir klubi «Roma» (61 ochko) esa, yangi tashkil etilayotgan Konferensiyalar Kubogida ishtirok etish huquqini beruvchi 7-o‘rinni egallab turibdi. «Roma»ni «Sassuolo» (59 ochko) quvib o‘tishi mumkin. Yangi turnir YeChL va YeLda ishtirok etib yuradigan jamoalarga «yoqmasligini» e'tiborga olsak, rimliklar iloji bo‘lsa, bu turnirdan qochish uchun so‘nggi turda yutqazishsa ham hayron qolmaslik kerak.

A Seriya. 38-tur. 23 may / TV-translatsiya

18:00. Inter – Udineze / FutbolTV

23:45. Atalanta – Milan / UzReportTV

23:45. Bolonya – Yuventus / UzReportTV

Angliya: «Lester» – yil omadsizi?

Ma'lum bo‘lishicha, ushbu mavsumda eng ko‘p - «Lester» APL turnir jadvalida top-4 bo‘lgan. 242 kun bu - sakkiz oy degani, 1-tur sentyabr o‘rtasida boshlanganini inobatga olsak, butun mavsum. Hatto chempion ham to‘rtlikka yangi yilda kirib kelgan. «Manchester Yunayted», «Liverpul» kabi jamoalar mos ravishda 151 va 136 kun, uchinchi o‘rindagi «Chelsi» esa atigi 98 kun to‘rtlikda yurgan. Qizig‘i, shunday mavsum yakunida ham «Lester» kuchli to‘rtlikdan quruq qolishga yaqinroq turibdi.

Angliya Premer-ligasida ham, xuddi Italiya chempionatidagidek vaziyat: ikki jamoa YeChL yo‘llanmasini naqd qilib bo‘lgan, qolgan ikki o‘rin uchun uch jamoa kurash olib boryapti va ligani tark etadigan jamoalar aniq. Demak, so‘nggi turning diqqat markazida «Chelsi», «Liverpul» va «Lester» ishtirokidagi o‘yinlar bo‘ladi.

3-4 o‘rinlarni egallab turgan «Chelsi» (67 ochko) va «Liverpul» (66 ochko) jamoalari oxirgi turda ochko yo‘qotmasliklari kerak. Ular g‘alaba qozonishsa, YeChL yo‘llanmasini naqd qilishadi. Shuningdek, «Lester»da ham 66 ochko bor, ammo to‘plar nisbatidagi farq (21 ga 24) tufayli, lesterliklar «Liverpul»dan past turishibdi. Demak, «Lester» «Liverpul»ni quvib o‘tishi uchun yo Klopp shogirdlari ochko yo‘qotishlari yoki «Lester» juda yirik hisobda g‘alaba qozonishi kerak bo‘ladi. «Lester»ning raqibi «Tottenhem» ekanini e'tiborga olsak, bu juda qiyin masala.

Garchi uchinchi o‘rinda turgan bo‘lsa-da, «Chelsi»ning vaziyati u qadar oson emasligini ta'kidlash kerak. Raqobatchilaridan farqi ravishda, «Chelsi» o‘z o‘yinini safarda o‘tkazadi. Muxlislar stadionga qaytganini e'tiborga olsak, bu ham katta faktor. Raqib ham anoyi emas. «Aston Villa» top-raqiblarga qarshi ancha ishonchli o‘ynashadi. O‘tgan turda safarda «Tottenhem» mag‘lub etildi, birinchi davrada esa «Stemford Brij»da durang qayd etilgandi.

«Chelsi» 5-o‘ringa tushib ketgan taqdirda ham, YeChL yo‘llanmasini qo‘lga kiritish imkoniyati saqlanib qolinadi. Chunki reglamentga ko‘ra, YeChL g‘olibi ham to‘g‘ridan-to‘g‘ri ushbu turnir ishtirokchisiga aylanishi mumkin. Bu holatda Angliyadan birato‘la besh jamoa YeChLda qatnashish imkoniyatiga ega bo‘ladi.

Oltinchi o‘rindagi «Vest Hem» (62 ochko) o‘z o‘rnini, ya'ni Yevropa ligasida ishtirok etish huquqini saqlab qolish uchun «Sauthempton» bilan o‘yinda bir ochko olsa kifoya. «Tottenhem» va «Everton»da 59 ochkodan mavjud. Bu yerda ham qiziq holat. «Tottenhem» g‘alaba qozonib, «Vest Hem»ning mag‘lubiyatidan umid qilishi, ya'ni Yevropa ligasida o‘ynamoqchi bo‘lishi ham mumkin. Shu bilan birga, Konferensiyalar kubogidan «qochish» uchun ortdan ortdan kelayotgan «Everton»ni o‘tkazib yuborishi ham mumkin.

Oxirgi paytlarda Angliyada to‘rtlikka kirish qiyin bo‘lib borayotgani uchun, Yevropa ligasida g‘olib chiqish orqali yo‘llanmani olish ham bir variant sifatida baholanyapti. Uch yil oldin «Yunayted» APLda 6-o‘rinni olib, Yevropa ligasini yutib, YeChLga chiqqandi. Shunday imkoniyatga so‘nggi yillarda «Arsenal» ikki marta yaqin keldi. Bir marta finalda, bir marta yarimfinalda yutqazib qo‘ydi.

APL. 38-tur. 23 may / TV-translatsiya

20:00. Lester – Tottenhem / FutbolTV

20:00. Liverpul – Kristal Pelas / FutbolTV

20:00. Aston Villa – Chelsi

20:00. Manchester Siti – Everton

20:00. Vulverhempton – MYu

20:00. Brayton – Arsenal

20:00. Lids – Vest Bromvich

20:00. Sheffild – Bernli

20:00. Vest Hem – Sauthempton

20:00. Fulhem – Nyukasl.

Fransiya: Peshqadamlik bir yilga kechikadimi?

Fransiyada eng ko‘p chempion bo‘lgan jamoa «Sent Eten»dir – 10 ta. «PSJ» va «Marsel» hisobida 9tadan chempionlik bor. Parijliklar bu mavsumda nihoyat bu ko‘rsatkich bo‘yicha ham peshqadamlardan biri bo‘lib olishi lozim edi.

So‘nggi tur oldidan, hammasidan ham Fransiyada chempionlik kurashi davom etishi mumkinligini xayolimizga ham keltirmagan bo‘lardik. Hatto Germaniyada ham «Bavariya»ga raqobat qila oladigan jamoalar chiqib turadi, lekin bugungi kunda «PSJ»ga teng keladigan jamoani topish mushkul edi. Ammo «Lill» mavsumni ajoyib o‘tkazmoqda va bugun, 10 yillik tanaffusdan so‘ng yana Fransiya chempioni bo‘lishi mumkin.

Buning uchun «Lill» bugun g‘alaba qozonsa kifoya. Jamoa safarda «Anjye»ga qarshi to‘p suradi. «Anjye» 12-o‘rinda borayotgan va g‘alaba qozongan taqdirda ham maksimum 10-o‘ringa ko‘tarilishi mumkin bo‘lgan jamoa. Lekin bu jamoa birinchi davrada «Lill»ni safarda mag‘lubiyatga uchrata olganini ham ta'kidlash kerak. «Lill» o‘zi bu mavsumda atigi 3 o‘yinda mag‘lub bo‘ldi. «Nim», «Brest» va «Anjye»ga. Ya'ni aynan autsayderlar bilan o‘yinda jamoada muammolar tug‘ilishini inobatga olsak, Fransiyada bugun katta intriga bor. Kuni kecha Fransiya kubogini qo‘lga kiritgan parijliklar «Lill»dan bir ochko kam jamg‘arishgan. «PSJ» bugun «Brest» mehmoni bo‘ladi.

Jadvalning quyi qismidagi raqobat yanada qattiqroq ketyapti. «Nim» va «Dijon» rasman Ligani tark etishgan. Uchinchi omadsiz jamoa nomiga da'vogarlar ko‘p. 18-o‘rindagi «Nant» hisobida 40 ochko bo‘lsa, «Loryan», «Brest» va «Strasbur»da 41, «Bordo» va «Reyms»da 42 ochko bor.

«Strasburg» va «Loryan» o‘rtasidagi 38-tur o‘yini haqiqiy finalga aylanib ketishi shubhasiz. Bu o‘yinda g‘olib chiqqan jamoa Ligada qoladi, mag‘lub esa, 18-o‘ringa tushib ketishi mumkin. «Nant» o‘z maydonida o‘rtamiyona «Monpele» bilan o‘ynaydi va katta ehtimol bilan kerakli 3 ochkoni qo‘lga kiritishi shubhasiz. Eng qiyin holatdagi jamoalardan biri «Brest»dir. Brestliklar so‘nggi turni «PSJ»ga qarshi o‘tkazishadi. Chempionlik uchun imkoniyati bo‘lgan parijliklar ochko berishmasa kerak. U holda «Brest» yuqorida eslangan «Strasbur» va «Loryan» o‘yinida «Strasbur»ga muxlislik qilishlariga to‘g‘ri keladi. Chunki, «Brest»ning to‘plar nisbati «Loryan»nikidan yaxshiroq. Hammasi juda ham chalkash, turnir jadvaliga qarab, o‘zingiz tahlil qilib olishingiz mumkin.

Xullas, hammasi kutilgandek bo‘lsa, yo «Loryan» yoki «Brest» 18-o‘ringa tushib qoladi. Lekin bu ham fojyea emas aslida. Reglamentga ko‘ra, 18-jamoa to‘g‘ridan to‘g‘ri ligadan tushib ketmaydi. Ikkinchi divizionning 3-jamoasi bilan pley-offda ishtirok etadi.

Fransiya chempionati. 38-tur

23:59. Brest – PSJ

23:59. Anjye – Lill.

Qolgan barcha o‘yinlar ham soat 23:59da boshlanadi.