Qishloq xo‘jaligi vazirligi: Zamonaviy HR, professional kadrlarni tanlashda yangicha yondashuv

O‘zbekiston Respublikasi qishloq xo‘jaligini rivojlantirishning 2020 — 2030 yillarga mo‘ljallangan strategiyasida agrar soha taraqqiyotining muhim ustuvor yo‘nalishlari belgilangan bo‘lib, ularni hayotga tatbiq etishda huquqiy, iqtisodiy, ishlab chiqarish munosabatlarini isloh qilish bilan birga inson resurslarini rivojlantirish ham muhim ahamiyat kasb etadi. Zero, har bir rivojlanish strategiyasi zamonaviy fikrlaydigan, dunyoqarashi keng, yangilikka moslashuvchan, doimiy ravishda o‘z ustida ishlaydigan, tashabbuskor hamda fidoyi xodimlar tomonidan amalga oshiriladi.

Ushbu maqsadlarga erishish uchun professional kadrlar tarkibini shakllantirishda tanlov jarayonlarini takomillashtirish, ochiqlik va shaffoflikni ta'minlash, meritokratiya tamoyillariga asoslangan holda munosib va qobiliyatli shaxslarni ishga qabul qilish hamda xizmat pog‘onalari bo‘yicha ko‘tarish — kadrlar siyosatining ustuvor yo‘nalishlaridan biri hisoblanadi.

Mazkur yo‘nalish bo‘yicha O‘zbekiston Respublikasi Prezidenti huzuridagi Davlat xizmatini rivojlantirish agentligi bilan hamkorlikda Qishloq xo‘jaligi vazirligi ilk marotaba markaziy apparatda mavjud bo‘lgan vakant lavozimni eng munosib nomzodlar bilan to‘ldirish maqsadida ochiq mustaqil tanlov jarayonlarini o‘tkazdi.

Tanlov inson omilini kamaytirish imkoniyatini taqdim etuvchi Davlat fuqarolik xizmatchilari vakant lavozimlarining yagona ochiq portali — vacancy.argos.uz orqali o‘tkazildi.

Ochiq tanlov bir necha bosqichlardan iborat bo‘lib, vakant lavozimlarga 405 ta nomzodning arizalari elektron tarzda qabul qilindi. Tanlovning keyingi bosqichlarida nomzodlar ma'lumotlari Vazirlik tomonidan belgilangan malaka talablari asosida saralanib, ularning axborot texnologiyalarini o‘zlashtirish darajasi, shuningdek, soha bo‘yicha bilim va malakalari test sinovlari hamda suhbat o‘tkazish orqali baholandi. Tanlovda sohaga oid ilmiy darajaga ega, xorijiy tillarni mukammal o‘zlashtirgan, yetarli bilim va ko‘nikmaga ega bo‘lgan malakali mutaxassislar hamda iqtidorli yosh kadrlar tanlab olindi.

Tanlov natijalariga asosan 10 nafar munosib nomzodlarni Vazirlik markaziy apparatiga ishga qabul qilish bo‘yicha Komissiya xulosasi qabul qilindi.

Hozirda Vazirlik tomonidan zamonaviy HR uslublarni amaliyotda qo‘llash, tanlov jarayonlarining sifatini oshirish, ochiqlik va shaffoflikni ta'minlashni yanada takomillashtirish bo‘yicha aniq chora-tadbirlar belgilab olingan. 

Ta'kidlash joizki, Vazirlik tizimida inson resurslarini rivojlantirish, kadrlarni har tomonlama qo‘llab-quvvatlash borasida e'tiborga molik ishlar amalga oshirildi.

Xususan, 2020 yil oktabr oyi holatiga Vazirlikning markaziy apparatida faoliyat yuritayotgan boshqaruv xodimlarining barchasi oliy ma'lumotli bo‘lib, ularning 76 nafari o‘z sohasi bo‘yicha magistrlik darajasiga ega, 20 nafari xorijiy davlatlarning oliy ta'lim muassasalarida tahsil olgan, 8 nafari O‘zbekiston Respublikasi Prezidenti huzuridagi Davlat boshqaruvi akademiyasi va 5 nafari Bank-moliya akademiyasi bitiruvchilari hisoblanadi. O‘tgan yilga nisbatan magistrlar soni 14 nafarga, xorijiy davlatlarning oliy ta'lim muassasalarida tahsil olgan xodimlar soni 13 nafarga ortgan hamda sifat tarkibining oshirilishiga erishilgan.

Xodimlar tarkibi yosh jihatidan tahlil etilganda, o‘rtacha yosh 2019 yilda 42 yoshni, 2020 yilda esa 38 yoshni tashkil etdi, bu esa 30 yoshgacha bo‘lganlar salmog‘i o‘tgan yilga nisbatan 2 baravar ortganligini ko‘rsatmoqda.

Xodimlarning tarkibi gender tengligi kesimida ko‘rilganda, ayollarning soni 2019 yilga nisbatan 3 baravarga ortgan. Bugungi kunda xodimlarning 37,8 foizi xorijiy tillarni o‘zlashtirgan bo‘lib, ushbu ko‘rsatkich o‘tgan yilga nisbatan 11,1 foizga ortgan.

Vazirlik xodimlarining ilmiy salohiyatini ko‘tarish bo‘yicha tizimli ishlar amalga oshirilgan bo‘lib, 2019 yilda faoliyat yuritgan xodimlarning 16 nafari ilmiy darajaga ega bo‘lgan bo‘lsa, 2020 yilda 9 nafar xodim sohaga oid ilmiy ishlar himoya qilib, ilmiy darajaga ega xodimlar soni 25 nafarga (20,1%) yetdi. Shundan 9 nafari fan doktori yoki DSc (Doctor of Science) va 16 nafari fan nomzodi yoki PhD (Doctor of Philosophy).

Shu bilan birga, Vazirlikning eng asosiy xodimlar tarkibi va kadrlar salohiyati viloyatlarda jamlangan bo‘lib, qishloq xo‘jaligiga ilm-fan yutuqlarini joriy etish, sohada amalga oshirilayotgan islohotlarni chuqur anglay oladigan malakali kadrlar bilan to‘ldirish borasida hududlarda tizimli ishlarni amalga oshirish borasida kamchiliklar mavjud.

Shu bois, kelgusida asosiy e'tiborni hududlarga qaratish, tanlov jarayonlarining yanada ochiqligini ta'minlash, O‘zbekiston Respublikasi Prezidenti huzuridagi Davlat xizmatini rivojlantirish agentligining hududiy filiallari bilan hamkorlikni samarali yo‘lga qo‘yish orqali xodimlar sifat tarkibini ko‘tarish, ularni o‘qitish va malakasini oshirishni tizimli tashkil etish hamda ular faoliyat samaradorligini oshirishga qaratiladi.

O‘zbekiston Respublikasi
Qishloq xo‘jaligi vazirligi