Davlat ahamiyatiga ega bo‘lgan yirik obektlarning yong‘in xavfsizligi pasporti ishlab chiqiladi

Qabul qilingan hujjatda odamlarning hayoti va sog‘lig‘i, yuridik va jismoniy shaxslarning mol-mulkini, atrof tabiiy muhitni yong‘inlardan himoya qilish yuzasidan umumiy yong‘in xavfsizligi talablari nazarda tutilgan, deb yozadi Norma.
 
Qoidalarda yong‘in kelib chiqishi mumkin bo‘lgan ishlarni amalga oshirishda hamda muhandislik asbob-uskunalaridan foydalanishda yong‘in xavfsizligi talablari belgilangan. Ularda ishlab chiqarish, ijtimoiy, qishloq xo‘jaligi, qurilish va boshqa sohalardagi obektlar hamda ma'muriy binolar uchun yong‘in xavfsizligi talablari qayd etilgan.
 
Qoidalarga muvofiq favqulodda davlat ahamiyatiga ega bo‘lgan yirik ijtimoiy-madaniy obektlarda yong‘in-texnik komissiyasi tuzilishi, shuningdek obektning yong‘in xavfsizligi pasporti ishlab chiqilishi lozim.
 
Bino va inshootlar o‘rtasidagi yong‘inga qarshi oraliq maydonlardan materiallar, uskunalar va idishlar qo‘yiladigan ombor sifatida, transport vositalarining to‘xtash joylari uchun, bino va inshootlarni qurish uchun foydalanishga ruxsat etilmaydi.
 
1 000 ming nafar va undan ortiq odam sig‘imiga ega bo‘lgan muassasalarda eng yaqin yong‘in-qutqaruv bo‘linmasi bilan to‘g‘ridan-to‘g‘ri telefon aloqasi o‘rnatilishi kerak.
 
Qoidalarda quyidagilarda yong‘in xavfsizligini ta'minlash bo‘yicha talablar belgilanmagan:

• o‘rmon xo‘jaligi hududlarida;
• kon qazilma va shaxta inshootlarida;
• portlovchi materiallar ishlab chiqarilayotganda, tashilayotganda, saqlanayotganda, ulardan foydalanilayotganda va ular utilizatsiya qilinayotganda;
• sanoat uchun mo‘ljallangan portlovchi materiallardan foydalanilgan holda portlatish ishlarini olib boruvchi tashkilotlarda;
• havo, temir yo‘l, avtomobil transporti hamda elektr transportida.

 
Hujjat 21.10.2020 yildan kuchga kirdi.