17:42 / 06.11.2020
2685
Энергетика вазири ўринбосари қуёш батареяларидан фойдаланишда солиқ ва тўловлар йўқлигини маълум қилди

Энергетика вазири ўринбосари Шерзод Хўжаев «Энергетика тизимидаги энг сўнгги янгиликлар, куз-қиш мавсумига кўрилаётган чоралар» мавзусига бағишланган матбуот анжуманида аҳоли қуёш батареяларидан фойдаланганда қўшимча солиқ ва тўловлар тўлаши кераклиги ҳақидаги хабарлар юзасидан изоҳ берди.

«Қуёш ёрдамида электр энергиясини аҳоли ўз эҳтиёжи учун ишлаб чиқарганда қандайдир қўшимча солиққа тортилади, деган гап-сўзни чиқаришнинг ўзи бу – давлат сиёсатига қарши кетиш. Ҳеч қандай солиққа тортилмайди. Ҳеч қандай қўшимча тўловлар йўқ.

Қўшимча сифатида айтишим мумкинки, мана шундай технологияларни олиб кириш, ишлаб чиқариш ва сотишда давлат томонидан бир қатор чегирма ва преференциялар берилган. Таннархини пастроқ ушлаш учун, аҳоли орасида ёйилиши кўламини кенгайтириш мақсадида.

Яна бир бор айтаман: ҳеч қандай солиқ ва тўловлар йўқ», дея Шерзод Хўжаевнинг сўзларини келтирмоқда Kun.uz мухбири.

Top