QVP va oilaviy poliklinikalar reytingi tuziladi. Yuqori uchlikdagi muassasalar mukofotlanadi

Jumladan, davlat rahbari yil yakuniga qadar Sirdaryo viloyati qishloq vrachlik punktlari va oilaviy poliklinikalarida jami 220ta «tibbiyot brigadasi»ni tashkil etib, ularga 1 ming 200 nafar o‘rta tibbiyot xodimlarini biriktirish borasida mas'ullarga topshiriq bergan.

«Biz tibbiyot brigadalarini tashkil qilamiz. Kelasi yil 1 martga qadar ushbu «tibbiyot brigadalari» «oilaviy tibbiyot» bo‘yicha ilg‘or tajriba asosida o‘qitiladi.

Boshqa viloyat hokimlari ham kelgusi yil 1 aprelga qadar «tibbiy xarita»ni shakllantirishni 26ta tuman va shaharda ham yo‘lga qo‘yishi zarur.

Buning uchun, ushbu tuman va shahar hokimlari tibbiyot birlashmalari rahbarlari bilan birga, ikki oy muddatda aholini xatlovdan o‘tkazib, ularni tibbiyot muassasalariga biriktiradi.

Shuningdek, tibbiyot brigadalari tomonidan aholining salomatlik holati baholanib, ularning elektron bazasi yaratiladi», dedi prezident.

Yig‘ilishda davlat rahbari topshirig‘iga ko‘ra, ushbu tizimni yo‘lga qo‘yish uchun endilikda viloyat, tuman va shahar hokimlari mahalliy budjet hisobidan «tibbiyot brigadalari»ni planshet, mobil tibbiyot-diagnostika vositalari (tarozi, puls-oksimetr, tonometr, mobil EKG) bilan ta'minlanishi belgilandi.

Bu borada esa tumanlardagi barcha qishloq vrachlik punktlari va poliklinikalari tezkor internetga ham ulanadi. Bu masalaga Axborot texnologiyalari va kommunikatsiyalarini rivojlantirish vaziri shaxsan javob beradi.

Davlat rahbari yig‘ilish davomida 2021 yil 1 aprelga qadar har bir hududning mahallabay elektron «tibbiy xaritasi»ni shakllantirish bo‘yicha mutasaddilarga topshiriq bergan.

«Shuningdek, ikki oy muddatda qishloq vrachlik punkti va oilaviy poliklinikalar reytingini aniqlash tizimini joriy qilamiz. Bunda, reytingda yuqori o‘rinni egallagan 3ta tibbiyot muassasasi mahalliy budjetdan mukofotlanadi.

Shu bilan birga, keyingi o‘quv yilidan boshlab, tibbiyot oliygohlaridagi o‘quv dasturlarini «oilaviy shifokor» tayyorlashga moslashtiriladi. Shuningdek, kelgusi o‘quv yildan boshlab Ibn Sino texnikumlarida oilaviy shifokorlar yordamchilarini tayyorlashni yo‘lga qo‘yilib, har bir texnikum qishloq vrachlik punktlariga biriktirilishi zarur», deya Shavkat Mirziyoyev so‘zlarini keltirmoqda Kun.uz muxbiri.