Manchester Liverpulga qarshi, Bundesligada peshqadamlik uchun kurash. Hafta o‘yinlari prevyusi
|16:15 / 07.11.20207 74616 min
Milliy jamoalar bilan bog‘liq tanaffus oldidan Yevropa maydonlarida chempionatlar doirasidagi uchrashuvlar bo‘lib o‘tadi. Bu safar ham qiziqarli o‘yinlar ko‘p va tabiiyki, klublar tanaffusga yaxshi natija va kayfiyat bilan chiqib ketishni istaydilar. An'anaga ko‘ra e'tiboringizga haftaning muhim uchrashuvlari anonsini havola qilamiz.
EVeRTON – MANCheSTeR YuNAYTeD (7 noyabr, 17:30)
Juma kuni APLda ikki uchrashuv o‘tkazilgan bo‘lsa-da, eng qiziqarli o‘yinlar shanba kuni, “Guddison Park”dan boshlanadi. Deyarli o‘xshash holatga tushib qolgan ikki jamoa “qora bulutlar”ni quvishga urinib ko‘radi. Tabiiyki, boshida yaxshiroq start olgan va status jihatidan pastroq bo‘lgan “Everton”da bosim kamroq.
Sulsher esa, so‘nggi ikki yilda bir necha marotaba mana shunday vaziyatga tushib turibdi. Nuqul “Yunayted” biror umidsiz holatga tushib qoladi, nashrlar Sulsherning ketishi-yu, Pochettino yoki Allegri nomzodlari haqida gapira boshlaydilar. Va shundan keyin birdaniga jamoa kutilmaganda, ijobiy seriyani boshlaydi, tanqidlar unutiladi. O‘tgan yili bu vaziyat “Manchester Siti” va “Tottenhem” ustidan qozonilgan g‘alabalar bilan o‘nglangan bo‘lsa, joriy mavsum boshidagi sharmandali 1:6 YeChLda Parijdagi g‘alaba bilan xaspo‘shlandi. Endi esa jamoa qatorasiga ikki o‘yinda mag‘lubiyatga uchradi. Ba'zilar “Everton” bilan o‘yinda vaziyat yana o‘nglanishi haqida aytayotgan bo‘lishsa-da, ammo Sulsher davridagi davomli “Amerika tepaliklari”ga barham berilishi va natijalar qandaydir barqarorlik kasb etishi kerak.
Angliyada ba'zi manbalar Vudvord allaqachon Pochettino bilan aloqaga chiqqanini yozayotgan bo‘lsa, ishonchliroq nashrlar aksincha, klub uzoq muddatga murabbiyga ishonayotgani, yaqin o‘yinlardagi natijalar ham hatto bu qarorga ta'sir o‘tkazmasligi haqida ma'lumot tarqatishdi. Ammo nima bo‘lganda ham, qatorasiga uchinchi mag‘lubiyat Sulsherning nafaqat boshqaruv, balki futbolchilar orasida ham e'tiborini tushirib qo‘yishi mumkin.
Mavsum boshida butun Yevropa qarsak chalgan “Everton” ham qatorasiga uch o‘yindan beri g‘alaba qozona olmayapti. “Liverpul” bilan durang Anchelotti shogirdlari uchun ijobiy natija sifatida qabul qilinishi mumkindir, ammo keyingi turlarda “Sauthempton” va “Nyukasl”dan mag‘lubiyatlar “Everton”ning o‘ylaganimizdan kuchsizroq ekanini ko‘rsatmoqda. Xamesning jarohati va Risharlisonning diskvalifikatsiyasi jamoa o‘yinidagi xotirjamlikni va salobatni yo‘qotib qo‘ygandek.
“Yunayted”ga qarshi o‘yinda Anchelottiga Koulmen, Gomesh va Godfrilar yordam berishi shubha ostida turibdi. Ikki tur oldin qizil kartochka olgan Lyuka Din bo‘yicha klubning arizasi qabul qilindi va himoyachining diskvalifikatsiyasi qisqartirildi. U maydonga tushishi mumkin. Risharlisonning qaytishiga esa, yana bir tur bor. “Yunayted” safida esa, nihoyat Marsiyal uch o‘yinlik diskvalikatsiyani o‘tab qaytmoqda. Aleks Telles virusdan tuzaldi, ammo to‘liq mashg‘ulotlarga kirishgani yo‘q. Belidan jarohati tufayli Turkiyada o‘ynamagan Lindelofning qaytishi ham so‘roq ostida.
Mavzuga oid
Umuman tarkibning umumiy holati bo‘yicha mezbonlarning imkoniyati yuqoriroq bo‘lishi mumkin, zero liverpulliklar bir hafta davomida tiklanish sharoitiga ega edilar. “Yunayted” esa, chorshanba kuni Istambulda YeChL bahsida maydonga tushdi. Sulsher bu o‘yinda deyarli barcha kuchlarini o‘ynatishga majbur bo‘ldi.
BORUSSIYa D – BAVARIYa (7 noyabr, 22:30)
Germaniyada Bundesliganing navbatdagi klassikosi bo‘lib o‘tadi va xayriyatki, bu safargi o‘yin oldidan ham bu ikki jamoa turnir jadvalini boshqarib turibdi. Oltitadan o‘yinda 15 ochkodan jamg‘argan bu raqiblar ushbu o‘yinda g‘alaba qozonish orqali yakka peshqadamga aylanib olishlari mumkin.
“Borussiya” ajoyib seriyani davom ettiryapti – Bundesligada 4, Chempionlar ligasida esa, oxirgi 2 o‘yin g‘alaba bilan yakunlandi. Ayniqsa, mana shu olti o‘yinda birorta ham gol o‘tkazib yubormagani odatdagi Dortmundga biroz yarashmagan, ammo yoqimli holat. Myunxenliklar uchun esa, bunday seriyalar odatiy hol. Flik shogirdlari barcha musobaqalarda 9 o‘yindan beri qatorasiga g‘alaba qozonib kelmoqdalar. Bu o‘yinlarning beshtasida “Bavariya” yirik hisobida g‘alaba qozongan. O‘zaro o‘yinlarda ham “Bavariya” oxirgi uch o‘yindan beri “Borussiya”ni yengib kelmoqda va mana shu uch o‘yinda “Borussiya” hatto gol ham ura olmagan.
Yo‘qotishlarga kelsak, mezbonlar safida Zagadu, Emre Jan va Marsel Shmalserlar jamoaga yordam bera olishmaydi. “Bavariya”da esa, Alfonso Devisning tiklanishiga yana bir oy bor. Shuningdek, Niklas Zyule ham faqat tanaffusdan keyin safga qaytsa kerak. Chempionlar Ligasidan keyin tiklanish bo‘yicha “Bavariya”ning holati biroz yaxshiroq. Chunki myunxenliklar o‘z o‘yinlarini bir kun oldin – 4 noyabr kuni o‘tkazdilar.
LATsIO – YuVeNTUS (8 noyabr, 16:30)
“Yuventus” chempionatda hali mag‘lubiyatga uchramagan bo‘lsa-da, kutilmagan duranglar va “Barselona”dan YeChLdagi umidsiz o‘yin yangi murabbiy Pirloning kelajagiga soya solmoqda. Turinliklar mag‘lubiyatga uchrata olmagan klublar orasida “Krotone” va “Verona”ning ham borligi, “Milan”ning ancha ishonchli starti “Yuventus” nihoyat diqqatini jamlashi kerakligini ko‘rsatmoqda. Zero Krishtianuning qaytishi jamoaning oldingi chiziqdagi o‘yinini o‘zgartirdi, deb ham aytishimiz mumkin – “Ferensvarosh” va “Spetsiya”ga qarshi o‘yinlarda bir xil 4:1 hisobidagi g‘alaba qayd etildi.
Ammo haqiqiy sinov biroz kuchliroq jamoalar bilan bo‘ladi, “Latsio” aynan shunaqa raqib. Rimliklar ham mavsumni juda yomon boshlab, ikki o‘yinda mag‘lubiyatga ham uchrashgandi. Ammo hozirda “Latsio” o‘nglanib oldi – barcha musobaqalardagi mag‘lubiyatsiz o‘yinlar soni beshtaga yetgan bo‘lsa, A Seriya doirasidagi so‘nggi ikki uchrashuvda ham g‘alaba qozonildi.
Tarkiblarga kelsak, “Latsio”ning yo‘qotishlari kattaroq. Anderson, Radu, Proto kabi futbolchilar hali tiklanib ulgurmagan bo‘lishsa, Ladzarining ham maydonga tushishi so‘roq ostida turibdi. Ammo Senad Lulichning mashg‘ulotlarga qaytgani va ushbu o‘yinda balki jamoasiga yordam berishi mumkinligi rimliklar uchun xushxabar bo‘lishi mumkin. “Yuventus” safida esa, Aaron Remzi jarohat oldi. Shuningdek, Aleks Sandro hali to‘liq jarohatidan forig‘ bo‘lmagan. Ammo Matteys De Ligt jamoa bilan birga shug‘ullanishni boshladi.
Shu o‘rinda, “Yuventus” “Latsio” maydonida ancha muvaffaqiyatli to‘p surishini ham ta'kidlash kerak. “Olimpiko”dagi so‘nggi 7 o‘yindan 6 tasida mehmonlar g‘alaba qozonishgan. Ammo bu o‘yinlarning oxirgisida “Latsio” 3:1 hisobida yutganini ham e'tirof etish lozim.
ATALANTA – INTeR (8 noyabr, 19:00)
So‘nggi paytlarning ikki alamzada jamoasi vaziyatni o‘nglash uchun urinib ko‘radi. “Atalanta” A Seriyani juda yaxshi boshlab, hatto turnir jadvalida peshqadamlik ham qilgandi, ammo qatorasiga ikki o‘yinni boy berib qo‘ydi. Chempionlar Ligasida esa, “Liverpul”dan qaqshatqich zarba qabul qilib oldi. Shuningdek, “Inter” ham Madriddagi o‘yinda bir muddat vaziyatni o‘nglagan bo‘lsa-da, yakunda mag‘lubiyatga uchrab, guruhdagi vaziyatini yanada chigallashtirdi. “Inter”ning Italiyadagi holati ham u qadar yaxshi emas – “Parma” bilan durangdan so‘ng, Konte shogirdlari 6-o‘ringa tushib ketishdi.
Raqiblar karantindan keyingi davrda, chempionat o‘yinida aynan Bergamoda o‘zaro to‘qnashgandilar va o‘shanda “Inter” 2:0 hisobida g‘alaba qozonib, turnir jadvalida 2-o‘ringa ko‘tarilgandi. Undan avvalgi to‘rt o‘yinda mehmonlar g‘alaba qozona olishmagan, uch durangdan tashqari, “Atalanta” ikki yil oldingi uchrashuvda 4:1 hisobida ustun kelgandi.
Mazkur uchrashuvda mezbonlarga Marten De Ron, Mattia Kaldara hamda yetakchi futbolchilardan biri Robin Gosens yordam bera olmaydi. “Inter” tarkibida ham sezilarli yo‘qotish bor. Romelu Lukakuning hujum tashkil qilishda va vaziyatlarni golga aylantirishdagi roli katta ekanini “Real”ga qarshi o‘yinda ham ko‘rgandik. Shuningdek, Matias Vesino va Stefano Sensilar ham jarohat tufayli maydonga tusha olishmaydi.
MANCheSTeR SITI – LIVeRPUL (8 noyabr, 21:30)
Navbati bilan “Everton”, “Aston Villa” yoki “Lids”, “Lester” kabi klublar ancha tomoshabop o‘yinlar ko‘rsatib, APLni qizdirib turgan bo‘lishsa-da, aslida chempionlik uchun asosiy raqobatchilar “Manchester Siti” va “Liverpul” bo‘lishini taxmin qilish qiyin emas. Zero tarkib, imkoniyatlar borasida uzoq muddat barqaror qolish tajribasi aynan ushbu ikki jamoada kattaroq. Bularning o‘zaro o‘yini esa tabiiyki, nafaqat turning, balki mavsumning eng markaziy o‘yini bo‘ladi.
“Liverpul” ikki o‘yindagi yo‘qotishdan so‘ng, ikki g‘alabaga erishib, turnir jadvalini boshqarmoqda. “Manchester Siti” 5 ochko farq bilan 10-o‘rinda turgan bo‘lsa-da, “shaharliklar”da bir o‘yin zaxira bor. Demak, ushbu o‘yinda g‘alaba qozonib, Gvardiola shogirdlari aslida, yo‘qotilgan ochkolar bo‘yicha “Liverpul”dan ustun holatga kelib olish imkoniyatiga ham ega bo‘lib turibdilar. “Manchester Siti” ham barcha musobaqalarda qatorasiga uch o‘yinni g‘alaba bilan yakunlangani va bu o‘yinlarda o‘z darvozasini daxlsiz saqlaganini ham ta'kidlash kerak.
APL doirasida “Etihad”dagi oxirgi uch o‘yinning barchasida mezbonlar g‘alaba qozonishgan va bu o‘yinlarda 4:0 va 5:0 hisoblari ham qayd etilgani biroz kutilmagan bo‘lishi mumkin. Ammo bu uchrashuvlarning so‘nggisi “Liverpul” deyarli barcha masalani hal qilganidan keyin bo‘lib o‘tganini ham ta'kidlash lozim.
Mezbonlar safida Mendi, Aguero va Fernandinolar jamoaga yordam bera olishmaydi. Ularning barchasida jarohatlar bor. “Liverpul” tarkibdagi muammolari ma'lum – Virjiyl van Deykni bu mavsum unutsak ham bo‘ladi, Fabino va Oksley-Chemberlen faqatgina oy oxirlarida safga qaytishlari mumkin. Shuningdek, Tiago Alkantaraning kechagi mashg‘ulotlarda ishtirok eta olmagani haqida xabarlar chiqdi. Bundan tashqari, so‘nggi paytlarda “Liverpul”ning “joker”iga aylanib borayotgan Diogu Jotaning ham bu o‘yinda qatnashishi so‘roq ostida qolayotgani ham yomon xabar. Firminoning yomon sport formasi davrida ancha samarali harakat qilayotgan portugaliyalik hujumchida ham kichik jarohat borligi aytilmoqda.
VALeNSIYa – ReAL (9 noyabrga o‘tar kechasi, 01:00)
“Valensiya” moliyaviy inqiroz tufayli deyarli yarim tarkibini, buning ustiga yetakchi futbolchilarini sotib yuborgan, hatto transfer oynasi tugab ham Kondogbianing “Atletiko”ga o‘tishiga to‘sqinlik qila olmay qolgan bo‘lsa-da, o‘z nomi bilan “Valensiya” va an'anaviy ravishda “Real” yoki “Barselona” kabi jamoalarga munosib qarshilik qilishiga o‘rganib qolganmiz. Xavi Grasiya jamoasining qatorasiga uch o‘yinda mag‘lubiyatga uchragani va o‘tgan turda faqat so‘nggi soniyalarda mag‘lubiyatdan qutulib qolgani ham bir tomon, ammo “Real”ga qarshi o‘yinlarda “Mestalya” top stadionga aylanib qolishi ham bor gap. Masalan, Valensiyada o‘tgan oxirgi uchrashuvning atigi bittasida mehmonlarning qo‘li baland kelgan xolos, uch o‘yin “Valensiya”ning g‘alabasi bilan yakunlangan. Demak, peshqadam ushbu to‘qnashuvda ochko yo‘qotmasligi uchun ko‘p ter to‘kishga to‘g‘ri keladi. Hafta o‘rtasida “Real”ning “Inter”ga qarshi og‘ir uchrashuv o‘tkazgani ham ushbu o‘yinda mezbonlarga qo‘shimcha ustunlik berishi mumkin.
Jarohatlar borasida “Real”ning himoya chizig‘ida muammolar bor – Odriosola, Militao, Karvaxal va Nacho safdan chiqishgan. Ammo Serxio Ramosning yana himoya markaziga qaytgani jamoa o‘yiniga xotirjamlik olib kirgani ham shubhasiz. Mezbonlar tarkibida esa Muktar Diakabi va Visente Eskerdolarda jarohat bor.
Yana bir intriga sifatida shuni aytish mumkinki, o‘z vaqtida “Kastilya” tarbiyalanuvchisi hisoblangan va “Real” tarkibida ham o‘ynagan rossiyalik Denis Cherishev sobiq jamoasiga qarshi o‘zini ko‘rsatish imkoniyatiga ega bo‘ladi. “Valensiya”ning so‘nggi “Xetafe”ga (2:2) qarshi o‘yinida u mavsumda ilk marotaba asosiy tarkibda maydonga tushib, jamoasining eng yaxshi o‘yinchisi bo‘lgandi.
8 noyabr. Vest Bromvich – TOTTeNHEM (17:00), Lester – Vulverhempton (19:00), Bolonya – NAPOLI (22:00), ARSeNAL – Aston Villa (9 noyabrga o‘tar kechasi, 00:15), MILAN – Verona (00:45.
