Baliqchi tumanidagi xayriya aksiyasida boquvchisiz qolgan 500 ta oilaga 1 tonnadan ko‘mir tarqatilmoqda

Oqqo‘rg‘on masjidi imom xatibi Rustamjon domla Hamidov tuman hokimi Jasurbek Abdurayimov bilan hamkorlikda ko‘plab mana shunday xayriya loyihalarini tashkil etib kelmoqda.

Bunday xayrli ishlarni e'tirof etgan holda, ibrat namunasi sifatida keng jamoatchilikka xabar berishni lozim topdik.

Shu maqsadda loyiha tashkilotchisi – Oqqo‘rg‘on masjidi imom xatibi Rustamjon domla Hamidov bilan birga 500 ta muhtoj oilaga 1 tonnadan ko‘mir tarqatish jarayonida qatnashdik.

Mazkur xayrli ishga juda ko‘plab saxovatli insonlar hissa qo‘shmoqda. Turli yoshdagi o‘nlab ko‘ngillilar keltirilgan ko‘mirlarni saralash, qoplash va egalariga yetkazib berishda xolis yordam berayotganiga guvoh bo‘ldik.

Rustamjon domla Hamidovning aytishicha, boquvchisiz qolgan oilalar ro‘yxatidagi 500 ta oilaning aksariyati qishloqlarda yashaydi.

«Bu oilalarni qishning sovuq kunlarida ko‘mir va boshqa isitish bilan bog‘liq muammolarini hal etishga baholi qudrat harakat qilyapmiz. Boquvchisiz qolgan bolajonlar yashayotgan xonadonlarga ko‘mir yetkazib bersak, marra bizniki. Lekin bu ishlarimiz maqtanishga arzimaydi deb bilaman. Xayriya ishlarimiz saxovatli insonlarning ko‘magi bilan bo‘lyapti.

Payg‘ambarimiz Muhammad sollallohu alayhi vasallam aytganlar: «Qaysi bir odam boshqa bir birodarini tashvishi bilan yurar ekan, undagi g‘amni aritmoqchi bo‘lar ekan, Alloh bu odamning tashvishini aritadi». Shu kunlarda karantin, sovuq sababli qiynalgan odamlar ko‘p. Qiynalgan insonlarga yordam beraylik. Shunda Alloh bizga yordam beradi», – deydi Rustamjon domla.

Biz saxovatli insonlar va tuman hokimligi ko‘magida boquvchisiz qolgan oila farzandlariga qurib bitkazilgan va qurilayotgan uylarni ham borib ko‘rdik.

2019 yilning o‘zida 22 ta boquvchisini yo‘qotgan oilalar uyli-joyli bo‘libdi. Qurilayotgan uylarda yashash uchun barcha shart-sharoitlar borligi e'tiborimizni tortdi.

Loyiha tashkilotchilari savobli ishga tuman hokimligi katta hissa qo‘shayotganini ta'kidlab o‘tishdi. Umid qilamizki, mana shunday xayrli ishlar bardavom bo‘ladi.

Elmurod Ermatov,
Ahrorbek Yoqubjonov.