2021 yil 1 yanvardan respublikadagi barcha tashkilot va muassasalarda sport targ‘ibotchisi lavozimi joriy etiladi

10 dekabr kuni bo‘lib o‘tgan matbuot anjumanida Jismoniy tarbiya va sport vazirligi Jismoniy tarbiya va ommaviy sportni rivojlantirish boshqarmasi boshlig‘i Umid Rajabov aholi o‘rtasida jismoniy faollikni oshirish maqsadida  2021 yil 1 yanvardan respublikadagi barcha tashkilot va muassasalarda sport targ‘ibotchisi lavozimi joriy etilishi haqida ma'lumot berdi.

Kun.uz muxbiri aynan shunday salomatlik tadbirlari boshlanishi bilan ayrim muassasalar xodimlarining turlicha sharoitda ommaviy badantarbiya qilayotgani aks etgan suratlar ijtimoiy tarmoqda ko‘payishi holati yuzasidan mutasaddining fikrlari bilan qiziqdi.

 Uning aytishicha, sport bilan shug‘ullanish ixtiyoriy, bu insonning o‘z sog‘lig‘i uchun yaxshi. Bundan oldin shunday sport bilan shug‘ullanish targ‘ib qilinganda ko‘pchilik noto‘g‘ri tushunib majburiy tarzda, kerak bo‘lsa darslarni to‘xtatib, stadionlarga olib chiqib ommaviy tarzda badantarbiya o‘tkazishgan. Bunday holatlar mas'ullargacha yetib borgan, o‘rganilgan.

“Shunday majburiy badantarbiyalarning oldini olish maqsadida bir nechta qarorlar imzolanib, shulardan bittasi joriy yilning 30 oktyabrida imzolangan “Sog‘lom turmush tarzini keng targ‘ib etish va jismoniy tarbiya va ommaviy sportni rivojlantirish to‘g‘risida”gi farmon bo‘ldi. Shunga asosan 1 yanvardan respublikadagi barcha tashkilot va muassasalarda sport targ‘ibotchisi lavozimi joriy etiladi”, — dedi Umid Rajabov.

Ma'lum bo‘lishicha, sport targ‘ibotchisi o‘zi faoliyat yuritadigan muassasada joriy tartib-qoidalar asosida sportni bevosita targ‘ib qilish orqali xodimlarga va ular vositasida jamiyatga singdiradi.