Hukumat Fiskal institut va soliq texnikumlari faoliyatiga doir qaror qabul qiladi

Institut talabalari va soliq texnikumlari o‘quvchilarining kunduzgi ta'lim o‘qish davri soliq organlariga ishga joylashgan taqdirda ish stajiga qo‘shiladi;

soliq organlari xodimlarining Institutda qayta tayyorlash va malaka oshirish kurslarini o‘qishi Maxsus jamg‘arma mablag‘lari hisobidan pullik asosda amalga oshiriladi;

o‘qishning bakalavr yo‘nalishini muvaffaqiyatli yakunlagan institut bitiruvchilarining iqtisodiy kompleks tarkibiga kiruvchi davlat organlari
va tashkilotlarida ish bilan ta'minlashlari kafolatlanadi;

soliq texnikumlari xarajatlari Davlat budjet mablag‘lari, o‘quvchilarni davlat buyurtmasi asosida o‘qitishdan, kontrakt to‘lovlaridan, Davlat soliq qo‘mitasining budjetdan tashqari mablag‘laridan hamda qonun hujjatlarida taqiqlanmagan boshqa manbalardan tushadigan mablag‘lar hisobidan moliyalashtiriladi va mazkur mablag‘lar shaxsiy g‘azna hisobvaraqlarida jamlanadi;

Institut xarajatlari Maxsus jamg‘armasi mablag‘lari hisobidan, to‘lov-kontrakt asosida tushgan mablag‘lar va qonun hujjatlari bilan taqiqlanmagan boshqa manbalar hisobidan moliyalashtiriladi va mazkur mablag‘lar bank hisobvaraqlarida jamlanadi.

Belgilanishicha:

institut bakalavr yo‘nalishida o‘qish ishdan ajralgan holda to‘lov-kontrakt asosida –davomiyligi uch yoki to‘rt yillik muddatda, hamda oxirgi o‘quv yilida iqtisodiy kompleks tarkibiga kiruvchi davlat organlari va tashkilotlarida maxsus stajirovkalarni amalga oshiradi;

institut magistraturasida o‘qish oliy ta'lim muassasalarining ixtisoslik yo‘nalishi bo‘yicha bakalavr ma'lumotiga ega bo‘lgan bitiruvchilari uchun ishdan ajralgan holda to‘lov-kontrakt asosida –davomiyligi bir yillik muddatda, davlat organlari va tashkilotlari xodimlari uchun uch yillik ish stajiga ega bo‘lgan taqdirda ishdan ajralmagan holda – ikki yillik muddatda amalga oshiriladi;

davlat va xo‘jalik boshqaruvi organlari xodimlari, bunda ish beruvchilarning tavsiyalari va mutaxassisligi bo‘yicha kamida uch yillik amaliy ish tajribasiga ega bo‘lganlar uchun tabaqalashtirilgan to‘lov-kontrakt asosida maxsus sirtqi ta'lim shaklida o‘qitish tashkil etiladi.