Organik mahsulotlar yetishtiriladigan yer maydonlarida alohida belgilar o‘rnatiladi - Hukumat qarori

Qarorga muvofiq, organik yer maydonlariga belgi va ko‘rsatkichlar o‘rnatish shakli va tartibi to‘g‘risidagi nizom tasdiqlandi.

Unga ko‘ra, 2021 yildan boshlab har yili 1 oktyabrga qadar organik qishloq xo‘jaligi mahsulotlarini yetishtiruvchi va yovvoyi holda o‘suvchi o‘simlik mahsulotlarini yig‘ib oluvchi xo‘jaliklar yer maydonlarining manzilli ro‘yxati shakllantiriladi hamda shunday xo‘jaliklar yer maydonlarining oxirgi uch yil uchun statistik tahlil natijalari va toponimik joylashuvini o‘rganish, tuproq, sizot va oqova suvlar sifati hamda xavfsizlik ko‘rsatkichlari bo‘yicha laboratoriya tahlillarini o‘tkazish choralari ko‘riladi. 

Muntazam ravishda organik mahsulotlar yetishtiruvchi va yovvoyi o‘simliklar hosilini yig‘ib oluvchilarga o‘z hududini an'anaviy usulda qishloq xo‘jaligi mahsulotlari yetishtiriladigan yer maydonlaridan ajratib turuvchi belgi va ko‘rsatkichlar o‘rnatish, shuningdek eksportbop va serdaromad organik mahsulotlar yetishtirish vazifalari topshirildi.