«So‘x aholisi 100 km yo‘l bosib shifoxonaga borishga majbur edi». Chegarada joylashgan tumanda qaysi muammolar yechim topmoqda?

So‘x tumani hokimining birinchi o‘rinbosari Ma'murjon Botirov Kun.uz muxbiriga bergan intervyusida tumandagi o‘zgarishlar, 2020 yil davomida erishilgan ijobiy natijalar haqida gapirib berdi.

Hokim o‘rinbosarining aytishicha, o‘tgan yili qabul qilingan prezident qarori tumandagi muammolarga yechim topishda muhim o‘rin tutmoqda. Intervyuda Ma'murjon Botirov tomonidan bildirilgan fikrlar quyida keltiriladi.

So‘x tumanini kompleks rivojlantirilish ishlari boshlab yuborilgan

2020 yilning 8 avgust kuni O‘zbekiston prezidentining «2020-2021 yillarda Farg‘ona viloyatining So‘x tumanini kompleks ijtimoiy-iqtisodiy rivojlantirish chora-tadbirlari to‘g‘risida»gi qarori qabul qilindi. Qaror asosida tumanda shu paytgacha yuzaga kelgan ijtimoiy-iqtisodiy sohadagi muammolar yechimi bo‘yicha dasturlar ishlab chiqildi.

Tuman iqtisodiyotining o‘sish nuqtasi sifatida birinchi navbatda sanoatni rivojlantirish reja qilingan. Bunda respublikaning boshqa hududlari hamda qo‘shni davlatlardan olib kelinadigan mahsulotlarni o‘zimiz ishlab chiqaramiz.

Keyin qishloq xo‘jaligi sohasida o‘sish nuqtasini belgilab oldik. Tumanda yo‘q oziq-ovqat mahsulotlarini shu hududning o‘zida yetishtirish va ishlab chiqarishni yo‘lga qo‘yamiz. Shu bilan birga, qo‘shni hududlarda talab yuqori bo‘lgan mahsulotlarni ishlab chiqarib eksport qilish yo‘nalishi ham bor.

Tumanimizning o‘sish-drayver nuqtasi – turizm hisoblanadi.

Masalan, tibbiyot turizmi. So‘x tumaniga tutash Qirg‘iziston Respublikasi hududlarida tibbiyot ma'lum darajada rivojlanmagan bo‘lsa-da, ularning tibbiy xizmatlariga ehtiyojimiz katta.

2020 yilda So‘xda qanday o‘zgarishlar yuz berdi?

2020 yil davomida tumanda 7ta zamonaviy klinikalar ishga tushdi. Shu kunga qadar So‘x xalqi chegara oshib Farg‘ona, Andijon viloyatlari va Toshkent shahridagi tibbiyot xizmatlari, uskuna, vositalaridan foydalanib kelardi.

O‘tgan yilning o‘zida 4ta maktabgacha ta'lim muassasasining ishga tushirilishi, 2ta umumta'lim maktabi rekonstruksiya qilinishi va yangi binolarning ishga tushirilishi ijtimoiy sohadagi birinchi qadamlar bo‘lyapti.

2021 yilda ham hududimizda 3ta zamonaviy bog‘chalar tashkil etish yo‘li bilan bolalar qamrovini yanada oshirishni rejalashtirganmiz.

Bu ko‘rsatkich yaqinda 27 foizni tashkil etar edi. 2020 yil natijalari bo‘yicha bolalarning bog‘chalarga qamrovi 50 foizdan oshdi va 2021 yilda bu raqam 82 foizga yetkazilishi ko‘zda tutilgan.

Tumanda oliy toifali o‘qituvchilar yetishmasligi asosiy muammolardan biri. Ko‘p o‘qituvchilar boshqa hududlardan borib dars berishadi. Prezident qarori bilan 2020 yilda berilgan imtiyozlar asosida so‘xlik 480 nafar farzandlarimiz oliy ta'lim muassasalariga qabul qilindi. Bu albatta, oldingi yillarga nisbatan 5-6 baravar ko‘p miqdorni tashkil qiladi.

Tumanda shifoxona va tibbiyot mutaxassislariga bo‘lgan talab yuqori

Tibbiyot sohasida ham muammolar mavjud. Bizda tibbiyot mutaxassislari yetishmasligi 40 foizni tashkil qiladi. Hukumat tomonidan berilgan imtiyozlar asosida 44 nafar yoshlarimiz O‘zbekistondagi tibbiyot ta'lim dargohlariga talaba sifatida qabul qilindi.

Tumanda 2020 yil uchinchi choragi davomida 2 milliard so‘mdan ortiq mablag‘ evaziga zamonaviy tibbiyot uskunalari olib kelindi.

Bungacha bizning farzandlarimiz, xalqimiz, qariya va nogironlarimiz aynan shu uskunalardan foydalanish uchun 100 kilometrdan oshiq yo‘l bosib chegara orqali shifoxonaga borib kelishga majbur bo‘lishardi.

Hozirda So‘xning o‘zida shu sharoit yaratilyapti. Yaqinda infeksion kasalliklar shifoxonasi foydalanishga topshiriladi.

So‘xdagi eksport-import masalalari qaysi bosqichda?

So‘x tumanida bojxona eksport-import bo‘limi yo‘qligi sabab hududda ishlab chiqariladigan mahsulotni to‘g‘ridan to‘g‘ri eksport qilish imkoniyati yo‘q.  Qo‘shni davlatga o‘tishning o‘zi bir muammo. Prezident qarori asosida tumanda yangi aeroport qurilishi va havo qatnovi orqali O‘zbekiston hududi bilan bog‘lanish belgilangan.

2021 yilda tumanga alohida ajratilgan bir dona vertolyot va bitta samolyot orqali tuman aholisini to‘g‘ridan to‘g‘ri O‘zbekiston bilan bog‘laydigan tizim yo‘lga qo‘yilishi belgilangan. Hozirda mablag‘ ajratilgan, yer maydoni va quruvchi tanlab bo‘lingan. Loyihachilarning ishi oxiriga yetdi va qurilish ishlari boshlanish arafasida.

Shuningdek, qo‘shni Qirg‘iziston Respublikasi bilan hamkorlikda logistika markazi va do‘stlik uyi tashkil qilyapmiz.

Xorijda, ayniqsa, Rossiya shaharlarida 5000 dan ortiq so‘xlik fuqarolar tadbirkorlik bilan shug‘ullanadi. Ular bilan «Vatandoshlar» tarmog‘ini yaratib, So‘x tumanidagi loyihalarga bevosita mablag‘ kiritishga kelishib oldik.