09:27 / 28.01.2021
2262
Apple илк бор 100 миллиард доллардан кўпроқ чораклик тушум олди
Фото: Reuters

Apple компанияси 2021 молия йилининг 1-чорагида (2020 йил 26 декабригача бўлган 3 ойлик) биринчи марта 100 млрд доллардан кўпроқ тушум олди. Тушум 2020 молия йилининг 1-чорагига нисбатан 21 фоизга ошиб, 111,4 млрд долларга етган

Компаниянинг соф даромади эса 22,2 млрд доллардан 28,8 млрд долларгача ошган.

“Бизнинг 4-чоракдаги натижаларимиз ҳар бир тоифадаги маҳсулотларимизда кўрсаткичларнинг 2 рақамли ўсиши эвазига таъминланди. Бу эса ҳар бир географик сегментда тушумнинг рекорд даражада ўсишига олиб келди”, деб маълум қилган компаниянинг молиявий директори Лука Маэстри.

Компания раҳбари Тим Кукнинг таъкидлашича, Apple’нинг фаол қурилмалари сони 1,65 млрдга етди. Унинг айтишича, бир йил аввал бу кўрсаткич 1,5 млрдни ташкил қилган. Кукнинг айтишича, компания Хитойда iPhone’лар савдоси ҳажмини оширишга муваффақ бўлган.

Apple дунё брендлари рўйхати Brand Finance Global 500’да 2020 йил якунларига кўра 1-ўринни эгаллади. У 2016 йилдан бери биринчи марта етакчига айланди. Экспертлар Apple брендини 263,4 млрд долларга баҳолашган. Рейтинг муаллифларининг таъкидлашича, Apple бизнеснинг муваффақиятли диверсификацияси ҳисобига ўтган йилги етакчилар - Amazon ва Google’дан ўзиб кетган.

Top