«Suv toshqinidan zarar ko‘rib, ko‘chada qolgan fuqaromiz qolmadi» - Sirdaryo hokimi o‘rinbosari

Sirdaryo viloyati hokimi o‘rinbosari O‘lmasjon Mamadaminov «Sardoba» suv omborining buzilishidan jabr ko‘rganlarga ko‘rsatilgan ko‘mak yuzasidan hisobot berdi.

Uning aytishicha, suv toshqinidan zarar ko‘rgan Sardoba tumanida 1480 xonadonli 37 ta, Mirzaobod tumanida 360 xonadonli 9 ta, Oqoltin tumanida 800 xonadonli 40 ta uy qurilgan va bu uylarning umumiy qiymati 855,4 mlrd so‘mni tashkil etgan.

Mazkur yangi qurilgan ko‘p kvartirali uylar uchun sardobalik 1 834 ta, oqoltinlik 832 ta va mirzaobodlik 634 ta – jami 3300 ta oila hujjat topshirgan. O‘rganishlar asosida shundan 2577 ta oilaga xonadonlar ajratilgan.

«Toshqindan qisman zarar ko‘rgan oilalar uchun ularning har biriga 40 mln so‘mdan kompensatsiya puli berildi», – dedi O‘lmasjon Mamadaminov 28 yanvar kungi brifingda.

Uning qayd etishicha, uy so‘rab murojaat qilingan 724 ta hujjat deputatlar tomonidan rad etilgan.

«Sababi, bularning 187 tasining yashaydigan uyi bo‘lgan, 232 ta xonadonga tegishli uylar Qurilish nazorat inspeksiyasi tomonidan yaroqli deb topilgan, 4 ta xonadon noturar joy bo‘lgan, 3 ta xonadon qurilish qilish mumkin bo‘lmagan joyda qurilgan, 298 ta xonadon qurilishi yakunlanmagan (faqat poydevori bo‘lgan yoki 2–3 qator g‘isht ko‘tarilgan), kadastr hujjatlarini rasmiylashtirish uchun qurilgan vaqtinchalik uylar (vremyanka) ekani aniqlangan.

Men ochiq-oshkora ayta olaman, mana shu Sardoba, Oqoltin, Mirzaobod tumanlarida suv toshqinidan zarar ko‘rib, ko‘chada qolgan fuqaromiz qolmadi», – deya bayonot berdi viloyat hokimi o‘rinbosari.

Uning qo‘shimcha qilishicha, toshqindan avval ham uy-joyi bo‘lmagan oilalar uchun Mirzaobod va Oqoltin tumanlarida jami 60 ta 1 xonalik yotoqxonalarda ta'mirlash ishlari yakunlanib, hozirda 59 ta oila ushbu yotoqxonalarga joylashtirilgan.