Abduhakim Hojiboyev «Rospotrebnadzor» rahbariga «Mehr-saxovat» ko‘krak nishonini topshirdi

O‘zbekiston sog‘liqni saqlash vaziri Abduhakim Hojiboyev Moskvada Rossiya Iste'molchilar huquqlarini himoya qilish va inson farovonligini nazorat qilish federal xizmati («Rospotrebnadzor») rahbari Anna Popovaga «Mehr-saxovat» ko‘krak nishonini topshirdi, deb xabar bermoqda «Dunyo».

Pandemiya paytida bir guruh rossiyalik yetakchi mutaxassislar o‘zbekistonlik hamkasblariga uslubiy va amaliy yordam ko‘rsatish uchun O‘zbekistonga yuborilgan edi. «Rospotrebnadzor», shuningdek, O‘zbekistonga 140 ming dona test to‘plamlarini yubordi. Bu o‘z vaqtida koronavirus infeksiyasini aniqlash va tarqalishining oldini olishga imkon berdi. 

Bundan tashqari, ushbu tashkilot «SPID infosvyaz» tashkiloti va UNAIDS bilan hamkorlikda mamlakatga birlamchi tibbiy-profilaktika, akusherlik, ginekologik, kardiologik va urologik yordam ko‘rsatishga mo‘ljallangan ko‘chma diagnostika majmuasi hamda xavfli infeksiyalarni (OITS, koronavirus va boshqalar) tekshirish va aniqlash bo‘yicha xizmatlarni taqdim etdi.

O‘zbekiston prezidentining 2020 yil 26 maydagi farmoniga muvofiq, koronavirus pandemiyasi davrida, shuningdek, turli tabiiy ofatlar tufayli mavjud xavf-xatarlarga qarshi kurashishda, ular oqibatlarini bartaraf etishda mardlik va jasorat namunasini ko‘rsatgan, aholining ijtimoiy himoyaga muhtoj qatlamlarini har tomonlama qo‘llab-quvvatlashga katta hissa qo‘shgan, jamiyatda tinchlik-osoyishtalikni mustahkamlashda faol ishtirok etishda o‘rnak bo‘layotgan yurtdoshlar va xorij fuqarolarini taqdirlash maqsadida «Mehr-saxovat» ko‘krak nishoni ta'sis etilgan.