13:05 / 20.03.2021
8274
Ургутдаги савдо маркази олдида юз берган жанжал оқибатида бир киши оғир жароҳат олди

2021 йилнинг 2 март куни соат 21:00да 43 ёшли Ғафур С. укаси, 37 ёшли Шавкат С. билан Самарқанд вилояти Ургут туманида жойлашган “Korzinka.uz” савдо маркази олдида 29 ёшли Ҳасан Ў.ни қўл ва оёқлари ҳамда таёқ билан уриб, унга жароҳат етказган.

ИИВ ҳузуридаги Тергов департаменти хабарига кўра, суд-тиббий экспертиза хулосасида Ҳасан Ў.да оғир тан жароҳатлари аниқлангани кўрсатилган.

Олиб борилган терговга қадар текширув ҳаракатлари давомида, Ҳасан Ў. Ғафур С.нинг турмушга чиқмаган қизи шаънини булғаш мақсадида гап-сўз тарқатиб юрганлиги сабабли ушбу жиноят содир бўлгани аниқланган.

Мазкур ҳолат юзасидан Ургут тумани бўйича ИИО ФМБ ҳузуридаги Тергов бўлими томонидан Ғафур С. ва Шавкат С.га нисбатан Жиноят кодекси 104-моддаси 2-қисми “к,л” бандлари (Қасддан баданга оғир шикаст етказиш) билан жиноят иши қўзғатилган.

Ҳозирда тергов ҳаракатлари олиб борилмоқда. Жиноят кодекси нормаларига кўра, бу турдаги жиноятлар учун беш йилдан саккиз йилгача озодликдан маҳрум қилиш жазоси тайинланади.

Top