Davlat organlarida normativ hujjatlar tizimlashtirilgan hisobini yuritishning majburiyligi bekor qilinadi

“Huquqiy axborotni tarqatish va undan foydalanishni ta'minlash to‘g‘risida”gi O‘zbekiston Respublikasi qonuniga o‘zgartirishlar kiritish haqida”gi qonun loyihasi e'lon qilindi.

Loyiha davlat boshqaruvi organlari va mahalliy davlat hokimiyati organlarida normativ-huquqiy hujjatlar tizimlashtirilgan hisobini yuritishning majburiyligini bekor qilish orqali ular tomonidan ortiqcha vaqt va mehnat resursi sarflanishi oldini olish maqsadida Adliya vazirligi tashabbusi asosida ishlab chiqilgan.

Qayd etilishicha, prezidentning 2018 yil 8 avgustdagi PF–5505-son farmoniga asosan 2019 yil 1 yanvardan davlat organlari va tashkilotlarining “O‘zbekiston Respublikasi qonun hujjatlari to‘plami”, “O‘zbekiston Respublikasi Oliy Majlisi palatalarining axborotnomasi”, “O‘zbekiston Respublikasi Vazirlar Mahkamasi qarorlari to‘plami” va “O‘zbekiston Respublikasi xalqaro shartnomalari to‘plami”ga obuna bo‘lishi bekor qilingan.

Bundan tashqari, prezidentning “Davlat organlari va tashkilotlarida ijro intizomini yanada mustahkamlash chora-tadbirlari to‘g‘risida” 2018 yil 5 oktyabrdagi PQ–3962-son qaroriga asosan 2019 yil 1 yanvardan davlat organlari va tashkilotlarida qonunlar, O‘zbekiston prezidenti va Vazirlar Mahkamasi qarorlarini maxsus jurnal va hisobvaraqalarida ro‘yxatga olish tartibi, shuningdek, qonunlar, O‘zbekiston prezidenti hujjatlari va Vazirlar Mahkamasi qarorlari bo‘yicha hisob kartotekalari qog‘oz shaklida rasmiylashtirilishi va yuritilishi bekor qilingan.

Qonun hujjatlari ma'lumotlari milliy bazasida normativ-huquqiy hujjatlar turkumlashtirilgan hisobi va nazorat nusxalari elektron shaklda yuritilishini ta'minlash Vazirlar Mahkamasining 2020 yil 30 oktyabrdagi 678-son qaroriga asosan Adliya vazirligi qoshidagi “Adolat” milliy huquqiy axborot markazi davlat muassasasi asosiy vazifalaridan biri sifatida belgilangan.

Yuqoridagilarni inobatga olib, loyiha bilan davlat organlarida normativ-huquqiy hujjatlar tizimlashtirilgan hisobini yuritishning majburiyligini bekor qilish taklif etilmoqda.

Loyiha qabul qilinishi natijasida normativ-huquqiy hujjatlar turkumlashtirilgan hisobini yuritish isloh qilinadi, davlat boshqaruvi organlari va mahalliy davlat hokimiyati organlarining ortiqcha va o‘ziga xos bo‘lmagan normativ-huquqiy hujjatlar turkumlashtirilgan hisobini yuritish funksiyasi bekor qilinadi, shu orqali ular tomonidan ortiqcha vaqt va mehnat resursi sarflanishi oldi olinadi, deyiladi loyihada.