Davlat organlari tomonidan unitar korxonalarni tashkil etish taqiqlab qo‘yiladi

Prezidentning “Korporativ munosabatlarning huquqiy asoslarini yanada takomillashtirish chora-tadbirlari haqida”gi qarori loyihasi e'lon qilindi.

Iqtisodiyotda davlat ishtirokini qisqartirish hamda davlat va nodavlat korxonalarga teng sharoit yaratish uchun 2022 yil 1 apreldan boshlab:

• davlat organlari va tashkilotlari tomonidan davlat unitar korxonalarini, shuningdek mulkchilik shakllaridan qat'i nazar barcha xo‘jalik yurituvchi sub'yektlar tomonidan unitar korxonalarni tashkil etish taqiqlanadi;
• davlat hokimiyati va boshqaruv organlari, mahalliy davlat hokimiyati organlariga xo‘jalik jamiyatlarini ta'sis etish hamda ularda ishtirokchi (aksiyador) sifatida ishtirok etishga faqat qonunchilik hujjatlarida to‘g‘ridan to‘g‘ri belgilangan hollarda yo‘l qo‘yiladi.

Davlat aktivlarini boshqarish agentligi manfaatdor vazirlik va idoralar bilan birga davlat unitar korxonalarini xatlovdan o‘tkazib, ularni 2022-2024 yillar davomida bosqichma-bosqich xo‘jalik jamiyatlariga aylantirish yoki davlat tasarrufidan chiqarish va xususiylashtirish bo‘yicha takliflarni Vazirlar Mahkamasiga kiritadi.