Sud-ekspertlik ilmiy-tadqiqot instituti tashkil etiladi

Prezidentning “O‘zbekiston Respublikasida sud-ekspertlik tizimini takomillashtirish chora-tadbirlari to‘g‘risida”gi qarori loyihasi e'lon qilindi.

O‘zbekistonda sud-ekspertlik institutini har tomonlama rivojlantirish, bu sohadagi muammolar bo‘yicha ilmiy tadqiqotlar olib borish hamda mamlakatda sud ekspertizasi nazariyasi va amaliyotini rivojlantirishning asosiy yo‘nalishlarini shakllantirish, shuningdek, 2021–2025 yillar davomida sud-ekspertlik tizimini yanada isloh qilishning ustuvor yo‘nalishlarini belgilash maqsad qilingan.

Sud-ekspertlik faoliyatini rivojlantirishning asosiy ustuvor yo‘nalishlari va vazifalari etib quyidagilar belgilanadi:

• sud ekspertlarining xolisligi va mustaqilligini ta'minlash, sohadagi normativ-huquqiy bazani muntazam takomillashtirib borish;
• sud-ekspertlik faoliyatini kengaytirish hamda sud ekspertizalarining sifati va ishonchliligini oshirish;
• sud-ekspertlik faoliyatida ilmiy-tadqiqot ishlarini rivojlantirish, shu jumladan uslubiyot va reglamentlarni takomillashtirish hamda sohaga fan va texnika yutuqlarini joriy etish;
• sud-ekspertlik faoliyatida kadrlar salohiyatini mustahkamlash hamda sud ekspertlarini tayyorlashning samarali tizimini yaratish;
• nodavlat sud ekspertiza institutini rivojlantirish;
• sud-ekspertlik faoliyati sohasida xalqaro hamkorlikni ta'minlash va rivojlantirish;
• sud-ekspertlik faoliyati moddiy-texnika bazasini mustahkamlash.

Adliya vazirligi, Ichki ishlar vazirligi va Sog‘liqni saqlash vazirligi tizimidagi sud ekspertiza muassasalari mavjud shtat birliklari doirasida X.Sulaymonova nomidagi Respublika sud-ekspertiza markazi huzurida 15ta shtat birligidan iborat Sud-ekspertlik ilmiy-tadqiqot instituti faoliyatini tashkil etish to‘g‘risidagi taklifiga rozilik beriladi.

Quyidagilar institutning asosiy vazifalari etib belgilanadi:

• sud ekspertizasi sohasida ilmiy-tadqiqot ishlarini amalga oshirish;
• davlat sud-ekspertiza muassasalari va nodavlat sud-ekspertiza tashkilotlariga ilmiy-uslubiy rahbarlikni amalga oshirish;
• sud-ekspertlik vazifalarini hal qilishning ilmiy asoslarini takomillashtirish va yagona ilmiy-metodik yondashuvlarni ishlab chiqish;
• sudlar va huquqni muhofaza qilish organlari, ta'lim muassasalari va ilmiy tashkilotlarga metodik yordam ko‘rsatish shakllarini tashkil qilish;
• sud-ekspertlik faoliyatiga fan va texnika yutuqlarini joriy etish bo‘yicha choralar ko‘rish;
• sud ekspertizasi sohasidagi tizimli muammolarni kompleks o‘rganish va ularni hal etishga doir ilmiy asoslangan takliflar va ta'sirchan mexanizmlarni ishlab chiqish;
• huquqni muhofaza qiluvchi organlar va sudlarning malakali sud ekspertiza xulosalariga bo‘lgan ehtiyojlarini doimiy ravishda o‘rganish orqali sud ekspertizasi yangi turlari hamda uslubiyotlarini ishlab chiqish va bosqichma-bosqich amaliyotga tatbiq etish bo‘yicha takliflar kiritish;
• sud ekspertizasi sohasiga rivojlangan axborot texnologiyalari va innovatsiyalarni keng joriy qilish bo‘yicha takliflar ishlab chiqish;
• sud-ekspertlik faoliyatini ilmiy-uslubiy hamda boshqa axborotlar bilan ta'minlash.

Sud-ekspertiza sohasida malakali kadrlar tayyorlash maqsadida quyidagi oliy ta'lim muassasalarida:

• 2021/2022 o‘quv yilidan boshlab Toshkent davlat yuridik universitetida “Sud-ekspertizasi va kriminalistika” hamda Toshkent davlat transport universitetida “Sud-avtotexnik ekspertizasi” bo‘yicha;
• 2022/2023 o‘quv yilidan boshlab Arxitektura va qurilish institutida “Sud-qurilish va sud-yer ekspertiza”lari hamda Toshkent davlat iqtisodiyot universitetida “Sud-iqtisodiy ekspertizasi” bo‘yicha magistratura mutaxassisliklari tashkil etiladi.

Adliya vazirligi huzurida yuridik shaxs tashkil etmagan holda Sud-ekspertlik faoliyatini rivojlantirishni qo‘llab-quvvatlash jamg‘armasi tashkil qilinadi.