Toshkentdagi kommunal bo‘limlar Uy-joy kommunal xizmat ko‘rsatish vazirligi bo‘ysunuviga o‘tkaziladi

Prezidentning “Toshkent shahrida uy-joy kommunal xizmat ko‘rsatish sohasi faoliyatini muvofiqlashtirishda davlat boshqaruvi tizimini takomillashtirish chora-tadbirlari to‘g‘risida”gi farmoni loyihasi e'lon qilindi.

Uy-joy kommunal xizmat ko‘rsatish vazirligi va Toshkent shahar hokimligining:

• Toshkent shahar Uy-joy kommunal xizmat ko‘rsatish bosh boshqarmasi va Toshkent shahridagi tuman uy-joy kommunal xizmat ko‘rsatish bo‘limlari shtat birliklarini Uy-joy kommunal xizmat ko‘rsatish vazirligi bo‘ysunuviga va tashkiliy tuzilmasiga o‘tkazish;
• Toshkent shahrida ichimlik suv ta'minoti va oqova suv xizmatlari tariflariga belgilangan maxsus ustama haq 60 foizini, atrof-muhitni ifloslantirish va O‘zbekiston hududida chiqindilarni joylashtirish uchun kompensatsiya to‘lovlari kanalizatsiya tashlanmalariga taalluqli qismi 50 foizini Uy-joy kommunal xo‘jaligini rivojlantirish jamg‘armasiga yo‘naltirish to‘g‘risidagi takliflariga rozilik beriladi.

Uy-joy kommunal xizmat ko‘rsatish vazirligi:

• Toshkent shahar Uy-joy kommunal xizmat ko‘rsatish bosh boshqarmasi va Toshkent shahridagi tuman uy-joy kommunal xizmat ko‘rsatish bo‘limlari faoliyatini qayta ko‘rib chiqadi;
• Toshkent shahar Uy-joy kommunal xizmat ko‘rsatish bosh boshqarmasi yangilangan vazifa va funksiyalari, Toshkent shahar Uy-joy kommunal xizmat ko‘rsatish bosh boshqarmasi tarkibidagi o‘zgarishlar bo‘yicha O‘zbekiston hukumati ayrim qarorlariga tegishli o‘zgartirish va qo‘shimchalar kiritish to‘g‘risidagi takliflarni tasdiqlash uchun Vazirlar Mahkamasiga kiritadi.

Toshkent shahar Uy-joy kommunal xizmat ko‘rsatish bosh boshqarmasining Toshkent shahri, Mirobod tumani, T.Shevchenko ko‘chasi, 26-uyda joylashgan binosi boshqaruv huquqi bilan o‘zida qoldiriladi.