O‘simliklar karantini bo‘yicha davlat xizmatlari faoliyati kuchaytiriladi

Norma’ning yozishicha, hujjatga muvofiq quyidagi hujjatlarga o‘zgartirishlar kiritildi:

O‘zbekiston hududini o‘simliklar karantinidagi zararli organizmlardan himoya qilish tartibi to‘g‘risidagi nizom (29.01.2018 yildagi 65-son VMQ bilan tasdiqlangan);

O‘simliklar karantini nazoratidagi mahsulotlar uchun fitosanitar sertifikatini berish tartibi to‘g‘risidagi nizom (29.01.2018 yildagi 65-son VMQ bilan tasdiqlangan);

Vazirlar Mahkamasi huzuridagi O‘simliklar karantini davlat inspeksiyasi to‘g‘risidagi nizom (31.01.2018 yildagi 68-son VMQ bilan tasdiqlangan);

Vazirlar Mahkamasi huzuridagi O‘simliklar karantini davlat inspeksiyasining O‘simliklar karantini tizimini rivojlantirish jamg‘armasi mablag‘larini shakllantirish va ulardan foydalanish tartibi to‘g‘risidagi nizom (31.01.2018 yildagi 68-son VMQ bilan tasdiqlangan).

Aniqlashtirilishicha, o‘simliklar karantini bo‘yicha davlat inspektorlari respublikaga avtomobil, daryo va havo transporti hamda temir yo‘l vagonlari va konteynerlari (ilgari – avtomobil, daryo va havo transporti vositalari) orqali olib kirilayotgan o‘simlik karantini nazoratidagi mahsulotlarni hamda pochta jo‘natmalarini qabul qilib olishda bevosita ishtirok etadi. Bunda ushbu transport vositalari o‘simliklar karantini nazoratidagi mahsulotlardan bo‘shatilganidan keyin transport egalari tomonidan, yuk olib borish mo‘ljallangan joyda esa yukni qabul qilib oluvchi tomonidan tozalanishi lozim.

O‘zbekistonga olib kiriladigan va uning tashqarisiga olib chiqiladigan o‘simliklar karantini nazoratidagi mahsulotlar ro‘yxatiga o‘zgartirishlar kiritildi.

O‘zgartirishlar «O‘simliklar karantini to‘g‘risida»gi qonunga va prezidentning 13.10.2020 yildagi «O‘simliklar karantini bo‘yicha davlat xizmati faoliyatini yanada takomillashtirish chora-tadbirlari to‘g‘risida»gi PQ-4861-son qaroriga muvofiq kiritilgan.