Tartibga solish ta'sirini baholash tizimi takomillashtiriladi

Norma’ning yozishicha, tartibga solish tizimini baholash (TSTB) − loyiha qabul qilinishi natijasida yuzaga kelishi mumkin bo‘lgan ehtimoliy oqibatlarni aniqlash va baholash, shuningdek normativ-huquqiy hujjat (NHH)ning tartibga solish maqsadlariga erishilganini, samaradorligini hamda tartibga solish usulini qo‘llashda vujudga kelgan oqibatlarni aniqlashga qaratilgan chora-tadbirlar majmui.

TSTB tizimini bosqichma-bosqich joriy etish maqsadida:

a) 2022 yil 1 yanvarga qadar quyidagilarni nazarda tutuvchi NHH loyihalari va qabul qilingan NHHlar tartibga solish ta'sirini baholashdan o‘tkaziladi:

• xo‘jalik yurituvchi sub'yektlarga yangi cheklovlar va yangi turdagi ruxsat berish tartib-taomillari, litsenziyalar joriy qilish yoki mavjud cheklov, ruxsat berish tartib-taomillari va litsenziyalanadigan faoliyat turlarini bozor ishtirokchilarining yanada kengroq doirasiga tatbiq qilishni;
• ruxsat berish xususiyatiga ega hujjatlarni yoki litsenziyalarni olish uchun qo‘shimcha talablar va shartlar joriy etishni;
• yuridik shaxslar ustav kapitalining eng kam miqdoriga nisbatan talablarni oshirishni;
• xo‘jalik yurituvchi sub'yektlarning belgilangan huquqlarini qisqartirish (kamaytirish) yoki ularga qo‘shimcha majburiyatlar yoxud qo‘shimcha xarajatlar joriy qilishni;
• xo‘jalik yurituvchi sub'yektlarga har qanday turdagi imtiyoz, kafolat, preferensiyalar belgilash, shuningdek yangi huquqlar, shu jumladan eksklyuziv huquqlar berishni;

b) 2022 yil 1 yanvardan boshlab tadbirkorlik faoliyatiga, fuqarolar huquqlari, erkinliklari va qonuniy manfaatlariga, shuningdek atrof-muhitga ta'sir ko‘rsatuvchi barcha NHH loyihalari va qabul qilingan NHHlar tartibga solish ta'sirini baholashdan o‘tkaziladi.

Normativ-huquqiy hujjatlar loyihalarini va qabul qilingan normativ-huquqiy hujjatlar loyihalarini va qabul qilingan normativ-huquqiy hujjatlarni tartibga solish ta'sirini baholashdan o‘tkazish tartibi to‘g‘risidagi nizom tasdiqlandi.

NHH loyihalari quyidagi tartibda TSTBdan o‘tkaziladi:

1) tadbirkorlik faoliyatiga, fuqarolar huquqlari, erkinliklari va qonuniy manfaatlariga hamda atrof-muhitga ta'sir ko‘rsatishni nazarda tutuvchi NHH loyihasi ishlab chiqilganda, Adliya vazirligi tomonidan tasdiqlanadigan shaklga muvofiq, TSTB bo‘yicha hisobot tayyorlanadi;

2) loyiha va TSTB bo‘yicha hisobot ishlab chiquvchi tomonidan NHH loyihalari muhokamasi portaliga (regulation.gov.uz) joylashtirilishi orqali o‘zi belgilagan, lekin 15 kundan kam bo‘lmagan muddatda majburiy tartibda jamoatchilik muhokamasidan o‘tkaziladi. Shuningdek, ishlab chiquvchi jamoatchilik muhokamasidan o‘tkazish muddati davomida loyiha va TSTB bo‘yicha hisobotni manfaatdor vazirliklar va idoralar bilan kelishish uchun NHH loyihalarini ishlab chiqish va kelishishning yagona elektron tizimiga joylashtiradi;

3) ishlab chiquvchi jamoatchilik muhokamasi ishtirokchilari hamda manfaatdor taraflar tomonidan taqdim etilgan takliflarni umumlashtiradi va ularni qabul qilish yoki rad etish to‘g‘risida Adliya vazirligi tomonidan tasdiqlanadigan shaklga muvofiq asoslangan ma'lumotni hamda mazkur takliflar asosida qayta ishlangan loyiha va TSTB bo‘yicha hisobotni loyiha muhokamasi muddati yakunlangandan so‘ng 5 kundan ko‘p bo‘lmagan muddatda portalga joylashtiradi;

4) so‘ngra loyiha, TSTB bo‘yicha hisobot va TSTB yuzasidan xulosa berish uchun zarur bo‘lgan boshqa ma'lumotlar tegishli sohaga ta'sirini baholashni o‘rganish uchun xulosa beruvchi organlarga taqdim etiladi;

5) TSTB natijalari bo‘yicha xulosa beruvchi organlar tomonidan 10 kun muddat mobaynida loyiha maqsadga muvofiqligi, qayta ko‘rib chiqish lozimligi yoki maqsadga muvofiq emasligi to‘g‘risida xulosa rasmiylashtiriladi va ishlab chiquvchiga taqdim etiladi;

6) loyiha va TSTB bo‘yicha hisobot hamda TSTB natijalari bo‘yicha xulosa va boshqa zarur materiallar, ularni belgilangan tartibda huquqiy ekspertizadan o‘tkazish hamda amalga oshirilgan TSTB sifatini o‘rganish uchun ishlab chiquvchi tomonidan Adliya vazirligiga kiritiladi;

7) Adliya vazirligi ishlab chiquvchi tomonidan TSTB jarayonlari nizom talablariga rioya etilganini o‘rganadi, TSTB o‘tkazish jarayonlari nizom talablariga to‘liq rioya etilgan holda o‘tkazilgan taqdirda, loyihani qabul qilish maqsadga muvofiqligi yoki muvofiq emasligi to‘g‘risida xulosa beradi;

8) ishlab chiquvchi tomonidan loyihani Oliy Majlis palatalariga, prezident administratsiyasiga va Vazirlar Mahkamasiga kiritishda unga TSTB bo‘yicha hisobot, xulosa beruvchi organlar va Adliya vazirligi xulosalari ilova qilinadi.

NHH bo‘yicha TSTB ishlab chiquvchi yoki davlat organlari va tashkilotlari tomonidan o‘z vakolatlari doirasida tartibga solish predmeti bo‘lgan NHH bo‘yicha Vazirlar Mahkamasi tomonidan har yili 20 martga qadar tasdiqlanadigan NHHni TSTBdan o‘tkazish rejasiga muvofiq amalga oshiriladi.

Adliya vazirligi rejaga muvofiq, qoida tariqasida, har chorakda NHHning TSTBdan o‘tkazilishi holatini tahlil qiladi va uning natijalari bo‘yicha TSTBdan o‘tkazish rejasi bajarilishi holati, TSTB bo‘yicha hisobotlar umumlamasi hamda qonunchilikni takomillashtirishga qaratilgan takliflarni (mavjud bo‘lsa) nazarda tutuvchi axborot-tahliliy ma'lumotni Vazirlar Mahkamasiga kiritadi.

Vazirlar Mahkamasi axborot-tahliliy ma'lumotni ko‘rib chiqish yakunlari bo‘yicha:

NHHni TSTBdan o‘tkazish natijalarini amalga oshirishga qaratilgan «yo‘l xaritasi»ni tasdiqlaydi;

NHHning to‘liq yoki alohida normalarini o‘zgartirish to‘g‘risida takliflarni qonun loyihalari ishlab chiqish va Oliy Majlis Qonunchilik palatasiga kiritish dasturiga yoki qonunosti NHH loyihalarini tayyorlash rejalariga kiritish choralarini ko‘radi.

TSTB jarayonlari o‘tkazilishini nazorat qilish Adliya vazirligi tomonidan amalga oshiriladi. U har yili mamlakatda TSTB tizimi holati to‘g‘risida axborot tayyorlab, uni OAVda e'lon qiladi hamda prezident administratsiyasi va Vazirlar Mahkamasiga kiritadi.