YeChL anonsi. «Liverpul» «Real»dan revansh oladimi, Holand «Siti»ga ham gol uradimi?

«Real» – «Liverpul»

Tarix
«Real» va «Liverpul» Yevropa Chempionlar Ligasining eng muvaffaqiyatli uch klubidan ikkitasidir. Madridliklar ushbu sovrinni 13 marta qo‘lga kiritgan bo‘lishsa, «Liverpul» bu reytingda «Milan»dan keyin uchinchi o‘rinda bormoqda – 6ta sovrin.

Bu raqiblar ushbu turnirda jami bo‘lib olti marta to‘qnash kelishgan. Dastlab, 1982 yil YeChL finalida «Liverpul» «Real»ni mag‘lub etib (1:0), kubokka ega chiqadi. 2009 yilda esa 1/8 finalda «Liverpul» har ikki o‘yinda «Real»ni mag‘lub (1:0, 4:0) etib, keyingi bosqichga chiqqandi. Keyin jamoalar YeChLning 2014/15 yilgi mavsumida bir guruhda ishtirok etishgan. «Real» Liverpuldagi o‘yinda 3:0 hisobida, Madridda esa 1:0 hisobida g‘alaba qozongan. Rojyers o‘shanda Madriddagi o‘yinda ikkinchi tarkibni tushirgan, jamoani bir muddatlik tanaffusdan keyin Chempionlar Ligasiga qaytargan murabbiy Madridda g‘alabaga ishonmagani uchun rosa tanqidlarga uchragan edi. Xullas, o‘sha guruh bosqichida «Real» yuz foizlik natija qayd etgan, «Liverpul» uchinchi o‘rinda qolgandi.

Oltinchi uchrashuv 2018 yildagi YeChL finaliga to‘g‘ri keladi. Bu o‘yinning birinchi qismidayoq Ramos bilan to‘qnashuv tufayli, yetakchisi Salohni yo‘qotgan inglizlar tajribali «Real»ga yetarlicha qarshilik ko‘rsata olmagan va 1:3 hisobida mag‘lub bo‘lgandi.

Ammo keyingi mavsumda «Liverpul» yana finalga chiqdi va bu safar «Tottenhem»ni 2:0 hisobida yengib, sovrinni boshi uzra ko‘tardi.

2018 yilgi finalda ishtirok etgan futbolchilar deyarli hozir ham ayni libosda harakat qilmoqda. Madridliklar tarkibini Keylor Navas, Krishtianu Ronaldu va o‘sha o‘yinda dubl qayd etgan Garet Beyl (ijarada), «Liverpul» safini Lovren, Emre Jan, Lallana hamda darvozabon Karius (ijarada) tark etgan.

Jamoalar holati
Mavsumning ayrim pallalarida juda yomon o‘yin yoki natijalar ko‘rsatib kelgan «Real» ham, «Liverpul» ham so‘nggi paytlarda o‘z o‘yinini topib oldi va milliy chempionatlarda ham kurashga qo‘shildi. «Atletiko»ning o‘yini pasayishidan foydalangan Zidan shogirdlari peshqadamga yaqinlashib, qatorasiga ikkinchi chempionlik uchun kurashmoqda. «Liverpul» esa APL chempionligidan umid uzgan, Chempionlar ligasi yo‘llanmasi uchun birato‘la 6 jamoa bilan raqobat qiladi. Ikki g‘alabadan so‘ng, «Liverpul»ning 4-o‘rindagi jamoa bilan farqi 3 ochkogacha qisqardi.

«Real» esa barcha musobaqalarda 11 o‘yindan beri mag‘lubiyat nimaligini bilmayapti. Faqat «Atletiko» va «Sosedad»ga qarshi o‘yinlarda durang qayd etilgan, xolos.

Ojiz nuqtalar
Har ikki jamoa mavsum davomida o‘xshash muammolarni yechishga harakat qilib keldi. «Liverpul»da Virjiyl van Deyk oktyabrdan beri maydondan tashqarisida bo‘lsa, kichik jarohatlar va diskvalifikatsiyalar tufayli Serxio Ramos La Liganing yarmidan ko‘p o‘yinlarida qatnasha olmadi. Bu futbolchilarning himoyadagi o‘rnini to‘ldirish ba'zida uddasidan chiqildi ham, lekin Ramos va Virjiyl shunchaki yetakchi himoyachi bo‘libgina qolmasdan, butunlay o‘yinga o‘z ta'sirini o‘tkazadigan sardor hamdir.

Zidan Ramosning rolini Nachoga topshirdi. Shunchaki markaziy himoyadagi pozitsiyani emas – aynan rolini. Nacho Ramos kabi agressiv tarzda o‘ynaydi, Varan va Kazemiro esa, uning harakatlarini sug‘urtalab turishadi. Himoyalanish tizimi saqlanib qolindi. Zidanning ishonchi va individual taktik mashg‘ulotlar yordamida Nacho haqiqatan ham Ramosga aylandi, mavsum boshida uning Varan bilan bog‘lamida muammolar ko‘ringan bo‘lsa-da, hozirda, fransuz ham eski darajasiga qaytmoqda.

Optimal yechimni topish Klopp uchun og‘irroq kechdi. Virjiyldan tashqari, yana bir necha markaziy himoyachi jarohat olishi ishni murakkablashtirdi – ichki resurslar, yarim himoyadagi variantlar, hatto transferlar ham yakuniy javobni bera qolmadi. Nihoyat, himoyadagi ishonch Fillips – Kabak juftligida qaytgandek ko‘rinyapti. Bundan tashqari, Fabinoning tayanch yarimhimoyasiga qaytgani himoyaning mustahkamlanishida asosiy omil sifatida qaralyapti. «Liverpul» uch o‘yindan beri darvozasini daxlsiz saqlamoqda va shu paytgacha Fabinoning markaziy himoyachiga aylantirilgani u qadar to‘g‘ri bo‘lmaganini ko‘rsatdi. Fabino so‘nggi chiziqda ancha ehtiyotkor futbolchiga aylanadi va bu biz bilgan Fabinodan ancha uzoq futbolchiga aylanadi. Yarimhimoyada unda yana kurashuvchanlik va kreativlik qayta boshladiki, bu butun jamoa o‘yiniga ijobiy ta'sir ko‘rsatmoqda.

Xulosa qilib aytganda, Zidan ham, Klopp ham vaziyatdan chiqib keta olishdi va ishlaydigan mexanizmni yaratib olishdi, ammo alohida top-uchrashuvda har ikki jamoa uchun xavf bor. Baribir, Ramos va van Deyk kabi figuralar aynan top-o‘yinlarda qahramon bo‘la olishar, deyarli xato qilishmas edi. Bu bosim ostida Nacho ham, masalan, Fillips yoki Kabak ham, hali «so‘yilmagan qovun», ya'ni har ikki tomondan ham hal qiluvchi individual xatolar kuzatilishi mumkin. «Real» va «Liverpul»ning sport formasi hozirda raqibni har tomonlama mag‘lub etishdan ko‘ra, xatolar uchun jazolashga yaqinroq. Bu albatta qiziq bo‘ladi.

O‘yin oldidan:

Zinedin Zidan: «Biz uchun bu o‘yin final. Oldinda 180 daqiqa bor, lekin hozir faqat kutilayotgan o‘yin haqida o‘ylamayapmiz. Uyog‘i bir gap bo‘lar.

Klopp – tajribali va ajoyib murabbiy. Hozirdan uning murabbiylik faoliyatiga yuqori baho berish mumkin. «Liverpul» tarkibida jarohatlanganlarning o‘rnini bosadigan kuchli futbolchilar ko‘p. Ayniqsa, oldingi chiziqdagi uchlik ko‘p muammolar tug‘dirishga qodir. Jamoaviy o‘yin ko‘rsatishda ularning butun tarkibi juda kuchli. Yo‘qotishlar bizda ham bor, ammo «Real» doim kuchli bo‘lib qolishi kerak».

Yurgen Klopp: Biz har tomonlama tayyormiz va keyingi bosqichga chiqmoqchimiz. Bu to‘qnashuvning 2018 yildagi final bilan hech qanday bog‘liqligi yo‘q. To‘g‘ri, o‘sha paytlarda Serxio Ramosni, masalan, tug‘ilgan kunimga taklif etmagan bo‘lardim, ammo bunga ancha bo‘ldi. Xafagarchilik esdan chiqdi. Hech qanday qasos haqida gap bo‘lishi mumkin emas, biz shunchaki, keyingi bosqichga chiqish uchun g‘alaba qozonishimiz kerak.

Tashqarida «Real»ni favorit deyishyapti ekan. Bu zo‘r! Biz favorit emas, da'vogar maqomida ham o‘zimizni juda yaxshi his qila olamiz. Avvalo, o‘z muxlislarimizga biz hali ham kurashda ekanimizni ko‘rsatishimiz lozim. Chempionatda bir necha jamoalarni ta'qib qilyapmiz, Chempionlar Ligasida «Real» bilan kurashamiz. Keling, bir harakat qilib ko‘raylik».

Tarkiblar

Mezbonlar tarkibida Ramos va Dani Karvaxal jarohatlar tufayli zayavkadan chetda qolishdi. Bugun Varan koronavirusga chalingani ma'lum bo‘ldi va u Madridda ham, javob o‘yinida ham maydonga tusha olmaydi. Shuningdek, Eden Azar umumiy guruhda mashg‘ulotlarni boshlagan bo‘lsa-da, Zidan tavakkal qilishni istamadi va uni ham «Liverpul»ga qarshi o‘ynatmaslikka qaror qildi. Balki, javob o‘yinida Azar tayyor holatda bo‘lar, zero APLda o‘ynagan vaqtlarida u «Liverpul» uchun eng xavfli futbolchilardan biri hisoblangan – 18 o‘yinda «qizillar» darvozasiga 7 gol urib, ikki marta golli to‘p uzatma muallifiga aylangan.

«Liverpul»da uzoq muddatga safdan chiqqan ma'lum futbolchilardan tashqari, yo‘qotishlar yo‘q. Ammo asosiy tarkibda qandaydir syurprizlar kuzatilishi mumkin. Masalan, o‘ziga xos jokerga aylanib borayotgan Jota yo pozitsiya bo‘yicha Firmino, yoki yaxshi sport formasida bo‘lmagan Manening o‘rnida paydo bo‘lishi mumkin. Yoki ikkinchi raqamda o‘ynashga mos bo‘lmagan Tiyago Alkantara o‘rnini Milner egallashi ehtimoli ham bor.

Taxminiy tarkiblar
«Real»: Kurtua, Vaskes, Militao, Nacho, Mendi, Kazemiro, Kroos, Modrich, Asensio, Vinisius, Benzema;
«Liverpul»: Allison, Trent, Fillips, Kabak, Roberson, Fabino, Tyago, Veynaldum, Saloh, Mane, Firmino.

«Manchester Siti» – «Borussiya» Dortmund

Bu juftlikda «Manchester Siti» yaqqol favorit sifatida ko‘rilmoqda. Ammo o‘tgan mavsumda Gvardiola jamoasi shu bosqichda «Lion»ga mag‘lub bo‘lib, turnirdan chiqib ketgandi.

«Borussiya»da Erling Holand bor, ammo Pep Gvardiola mavsum davomida shunday jamoani shakllantirdiki, bu jamoani o‘n yil oldingi «Barselona» bilan taqqoslashmoqda.

Tarix
«Manchester Siti» va «Borussiya» Chempionlar Ligasida ilk marta 2012/13 yilgi mavsumda ro‘baru kelishgan. O‘sha paytlarda manchesterliklar uzoq tanaffusdan so‘ng, endigina YeChLda o‘ynay boshlashgan, shuning uchun doim «o‘lim guruhi»dan joy olishardi. «Real», «Borussiya», «Ayaks» va «Manchester Siti» o‘rin olgan guruhni dortmundliklar peshqadam sifatida yakunlashgan bo‘lsa, «shaharliklar» atigi uch durang bilan so‘nggi o‘rinni olishgandi. O‘zaro o‘yinlar Manchesterda durang, Germaniyada 1:0 hisobida mezbonlarning g‘alabasi bilan yakunlangan. O‘sha mavsumda Klopp boshqaruvida bo‘lgan nemislar finalgacha yetib borgan va finalda Germaniyaning boshqa bir klubi «Bavariya»ga yutqazgandi.

O‘sha o‘yinlarda to‘p surgan futbolchilardan Dortmundda Marko Roys, Mats Hummels, Marsel Shmelser, Lukash Pishchek qolgan. Roys Manchesterdagi birinchi uchrashuvda gol urgandi. Ikkinchi o‘yindagi golni Mario Gyotse penaltidan urgan. Inglizlar jamoasida faqat Serxio Aguero o‘sha o‘yinlar ishtirokchisi bo‘lgan, xolos.

Yana bir qahramonlardan biri esa, Ilkay Gundo‘g‘an edi. U o‘sha mavsumda «Uembli»da o‘tgan finalda «Bavariya» darvozasiga urilgan javob goli muallifi bo‘lgandi. U hozirda «Manchester Siti» a'zosi hisoblanadi va sobiq jamoasiga qarshi to‘p suradi.

Holand muammomi yoki imkoniyat?

«Manchester Siti» barqarorlik va salohiyat borasida Yevropada balki faqat «Bavariya» bilan bir qatorda, eng yaxshi klub bo‘lib turibdi. Tasavvur qiling, Gvardiola APLning 31-turida «Lester»ga qarshi o‘yinda Silva, Sterling, Foden, Gundo‘g‘an, Kanselu kabi asosiy futbolchilarsiz o‘ynab ham, deyarli muammosiz g‘alaba qozondi (2:0). Zaxira imkoniyatlari kengligi - «Siti»ning eng kuchli jihati.

«Borussiya» esa YeChL 1/8 finalida «Sevilya» to‘sig‘idan o‘tgan bo‘lsa-da, jamoa barqaror o‘yin namoyish etmayapti — Bundesligadagi so‘nggi o‘n o‘yinda dortmundliklar atigi to‘rt g‘alabaga erishdi, yana to‘rt o‘yinda mag‘lubiyat, qolgan ikkisida durang qayd etildi.

Ammo alohida o‘yinlarda manchesterliklar doim muammolarga duch kelishlari ham bor gap, Chempionlar Ligasidagi mag‘lubiyatlar ham shundan. Agar «Siti» uslubi uchun noqulaylik keltirib chiqaradigan jamoalar bo‘lsa, ulardan biri, albatta «Borussiya»dir. «Siti» bu mavsum davomida 21ta g‘alabali seriya qayd etib, mart oyi boshida «Manchester Yunayted»ga yutqazib seriyani to‘xtatdi (undan keyin yana g‘alabali seriya boshlandi). Qarangki, qarshi hujum tezligi, o‘yin uslubi borasida «qizil iblislar»  «Borussiya»ga juda yaqindir. Hatto oldingi chiziqdagi ijrochilarga e'tibor qaratilsa, «Dortmund» birmuncha ustunroq ham ko‘rinadi.

«Holand o‘ziga xos taktik rolga ega. Biz uni to‘liq himoyaviy harakatlardan, pressing vazifasidan ozod qildik va har doim oldingi chiziqda ochilish uchun kuch yig‘ishga imkon berdik. To‘pni egallashimiz bilan Erling yugurishi mumkin bo‘lgan ochiq zonalarni qidirdik», – deb izohlagandi Edin Terzich «Sevilya»ga qarshi (3:2) o‘yindan keyin.

Bu qaysidir ma'noda Sulsher Reshfordga bergan rolni eslatib yubormayaptimi? «Borussiya»ning bu quroli yuqori blokda himoyalanadigan jamoalarga qarshi ish beradi albatta. Ammo teskari tomoni ham bor. Masalan, «Bavariya»ga qarshi o‘yinda ham Holandga o‘xshash vazifalar topshirildi – hujumchi bundan foydalanib, ikki gol urdi ham. Lekin raqib himoyalanishda bir kishi kam bo‘lib qolishi «Bavariya» kabi jamoalarga qo‘shimcha qulayliklar ham yaratadi, myunxenliklar 4 gol bilan javob berishdi.

Holand bu juflikdagi intrigalardan biri – OAVda ushbu norvegiyalik futbolchining nomini «Manchester Siti» bilan ham bog‘lashmoqda. Ammo Gvardiola pandemiya davrida qimmatbaho futbolchi sotib ololmasliklari haqida ham aytib o‘tgan. Holand bu o‘yinda ham gol ura olishi — katta savol ostida. «Siti» bu mavsumda juda yaxshi himoyalanmoqda. Chempionlar ligasida «MS» atigi bir marta — guruh bosqichining 1-turida «Portu»dan gol o‘tkazib yuborgandi, jamoa turnirdagi keyingi 7 o‘yinda - 706 daqiqa davomida darvozasi daxlsizligini saqlab qoldi.

Demak, «Manchester Siti» Holand muammosi bilan shug‘ullanishi barobarida, oldingi chiziqda birmuncha qulay zonalarga ega bo‘lishi mumkin. Muhimi, «Siti» vaziyatlarni ko‘kka sovurishni ko‘paytirib yubormasligi talab etiladi. Boshqa tarafdan, Gvardiola muhim o‘yinlarga avvalgidan biroz boshqacha yondashishni ham boshladi. Masalan, qarshi hujumlarda xavfli bo‘lgan «Lester» bilan o‘yinda Gvardiola ancha ehtiyotkor to‘p surdi va o‘z vaziyatini kutishda sabrni ham namoyish eta oldi.

O‘yin oldidan
Pep Gvardiola: «Balki ushbu mavsumda «Borussiya»da barqarorlik yetishmayotgandir, ammo alohida har bir o‘yinchini olsak – fantastik. Hummels, Jan, Mene, Daud... Holand, Sancho, Azar, Roys, Brandt. Ular pley-offlarda juda yaxshi o‘ynaydigan «Sevilya»ni chiqarib yuborishdi.

Men raqiblarni tahlil qilayotganda turnir jadvaliga qaramayman. Bu 0:0 hisobi bilan boshlanadigan alohida kurash. Ikki o‘yinda kim yaxshiroq o‘ynasa, keyingi bosqichga yo‘l oladi. Albatta, bizda hamma uzoqroqqa borishni istashmoqda. Lekin xohish boshqa, buni maydonda ham amalga oshirish kerak. Ushbu o‘yinga men xuddi avvalgi, undan oldingi, umuman, so‘nggi to‘rt oydagi har bir o‘yinga qanday tayyorlangan bo‘lsam, shunday tayyorlandim».

Edin Terzich: «Shanba kungi o‘yindan juda xafaman. Bizga qaratilayotgan tanqidlarda, albatta, jon bor. Ammo hammasini salbiy qabul qilish kerak emas. Bizda yetarlicha daraja bor va buni yaxshi bilamiz. Aynan o‘sha sifatni namoyish qilishimiz lozim.

«Siti» - bugungi kunda dunyoning eng kuchli jamoasi. Har ikki safar ham biz eng yaxshi o‘yinimizni ko‘rsatishga to‘g‘ri keladi. Raqib ko‘p vaqt mobaynida to‘pni nazorat qiladi, bunga tayyor turishga majburmiz. Ular bizni himoyaga qamashga harakat qilishadi, tabiiyki, biz uchun ochiq zonalar yuzaga keladi. To‘pni egallab olganimizda, kerakli ishni qilamiz, bu pallada bizni ham to‘xtatib qolish oson emas».

Tarkiblar
«Manchester Siti» tarkibini oldindan topish qiyin, intriga hatto himoya markazidan boshlanadi. Laport, Stounz, Diash uchligi navbati bilan tandemda o‘ynab kelishmoqda. «Lester»ga qarshi o‘yinda Kanselu va Zinchenko dam olishganidan, bugun maydonga tushishlarini taxmin qilish mumkin. Lekin o‘sha o‘yinda Mendi ham o‘zini yaxshi ko‘rsatdi, tezkor qarshi hujumlarni inobatga olib, Gvardiola Zinchenkoni yana zaxirada qoldirishi ham mumkin. «Lester» bilan o‘yinda Aguero ham, Jyezus ham asosiy tarkibda harakat qilishdi, demak, ularni asosiy tarkibda kutish qiyin. Sababi, Bernardu Silvaning safga qaytishi De Bryuynening oldingi chiziqqa o‘tishini taqozo qiladi. Belgiyalik futbolchi aynan aldamchi to‘qqizlik pozitsiyasiga o‘tganida «Manchester Siti» Silva – Gundo‘g‘an – De Bryuyne uchligidan optimal foydalana oladi.

Terzichda hamkasbi kabi komfort yo‘q, u tarkibdagi jarohatlanganlardan kelib chiqib, maydonga tushadiganlarni aniqlashga majbur. Masalan, «Manchester Siti» tarbiyalanuvchisi Jyeydon Sancho shu xarakterdagi o‘yinlar uchun juda mos bo‘lardi, lekin hali tiklanib ulgurmadi.

 Taxminiy tarkiblar
«Manchester Siti»: Ederson, Kanselu, Stounz, Diash, Zinchenko, Rodri, Gundo‘g‘an, Bernardu, De Bryuyne, Sterling, Mahrez;
«Borussiya» D: Hits, Jan, Akanji, Hummels, Gereyru, Dileyni, Daud, Billingem, Azar, Roys, Holand.