«Central Park» 335 mln so‘mdan ortiq mablag‘ni tashrif buyuruvchilarga qaytarib beradi

Iste'molchilar huquqlarini himoya qilish agentligiga murojaat qilgan iste'molchining hisobidan Toshkent shahridagi Mirzo Ulug‘bek nomidagi “Markaziy bog‘” (“Central Park”) uchun olingan kartadagi 60 ming so‘m pul mablag‘i ogohlantirishsiz yechib olingan. 

Agentlik xabariga ko‘ra, ushbu masalani o‘rganish jarayonida mazkur istirohat bog‘i hududida foydalanish uchun mo‘ljallangan kartalar bilan bog‘liq muammo yana bir necha ming iste'molchilarga ham taalluqli ekani ma'lum bo‘lgan.

“To‘lov kartaning orqa tomonida uning amal qilish muddat ko‘rsatilgan. Muddat tugagandan so‘ng, undagi mablag‘lar karta egasi arizasiga asosan xizmat ko‘rsatuvchi kassa tomonidan 3 kunlik muddatda yangi kartalarda o‘tkazib beriladi. Aslida, maxsus kartalarning amal qilish muddati 2020 yil 31 dekabrgacha deb ko‘rsatilgan. Lekin 2020 yil tugashi arafasida karta amal qilish muddati va ularni almashtirish tartiblari haqida iste'molchilar biron marta ham ogohlantirilmagan. Istirohat bog‘iga borgan iste'molchi kartadan foydalana olmagandan so‘nggina bu haqda xabardor bo‘lgan”, deyiladi ma'lumotda.

“Iste'molchilarning huquqlarini himoya qilish to‘g‘risida”gi qonun 6-moddasiga asosan, ishlab chiqaruvchi (ijrochi, sotuvchi) iste'molchiga o‘zi realizatsiya qilayotgan tovar (ish, xizmat)lar haqida o‘z vaqtida zarur, to‘g‘ri va tushunarli ma'lumot berishi shart. Shuningdek, 21-moddaga asosan, sotuvchi (ijrochi) iste'molchini haq evaziga qo‘shimcha tovarlar sotib olishga yoki qo‘shimcha xizmatlardan foydalanishga qistashga, shuningdek ko‘rsatilmagan xizmatlar uchun haq olishga haqli emasligi belgilangan.

Agentlik ushbu holatlarga aniqlik kiritish maqsadida “Jet Invest” MChJ QKga tegishli so‘rovnoma yuborib, holat yuzasidan tushuntirish olindi. 

Unga asosan, 2018 yildan buyon “Jet Invest” MChJ QKga tegishli “Markaziy bog‘” (“Central Park”) tomonidan 130 000ta iste'molchiga bog‘da foydalanish kartalari rasmiylashtirib berilgan. Amal qilish muddati o‘tgan 18 291ta maxsus kartada iste'molchilarning hisobraqamlarida 335 610 000 so‘m mavjud ekani haqida ma'lumot berib o‘tilgan. 

“Istirohat bog‘i ma'muriyati ta'kidlashicha, pandemiya paytida to‘lov tizimida texnik nosozlik yuzaga kelgani muammoga sabab bo‘lgan. Agentlikning ko‘rsatmasiga asosan bugungi kunga qadar mazkur istirohat bog‘i tomonidan 643ta iste'molchiga 14 872 400 so‘m mablag‘ qaytarildi”, deyilgan xabarda.

Qayd etilishicha, bugungi kunda Mirzo Ulug‘bek nomidagi “Markaziy bog‘” (“Central Park”) ma'muriyati tomonidan iste'molchilarga o‘rnatilgan tartibda kartalaridagi mablag‘larini qaytarish davom etmoqda. Buning uchun iste'molchilar kassa xodimiga murojaat qilishi kerak. Shundan so‘ng  kartadagi balans tekshiriladi va unda qolgan mablag‘ yangi kartaga o‘tkazib beriladi.