Sanoat zonalarini kommunikatsiya infratuzilmasi bilan ta'minlash uchun 150 mln dollar qarz olinadi

Prezidentning “Maxsus iqtisodiy va kichik sanoat zonalari muhandislik-kommunikatsiya infratuzilmasini yanada rivojlantirish chora-tadbirlari to‘g‘risida”gi qarori qabul qilindi.

Hujjat bilan quyidagilar tasdiqlandi:

• 2021-2022 yillarda maxsus iqtisodiy va kichik sanoat zonalari, hududlarni ijtimoiy-iqtisodiy rivojlantirishga turtki beradigan loyihalar hamda to‘g‘ridan to‘g‘ri xorijiy va mahalliy investitsiyalar ishtirokidagi yirik ishlab chiqarish loyihalarini tashqi muhandislik-kommunikatsiya tarmoqlari bilan ta'minlash tadbirlari parametrlari;
• 2021 yilda maxsus iqtisodiy va kichik sanoat zonalarini tashqi muhandislik-kommunikatsiya tarmoqlari bilan ta'minlash bo‘yicha amalga oshiriladigan chora-tadbirlar manzilli ro‘yxatlari.

Shuningdek, MIZ va KSZ hamda to‘g‘ridan to‘g‘ri xorijiy va mahalliy investitsiyalar ishtirokidagi yirik ishlab chiqarish loyihalari tashqi infratuzilmasini qurish va ta'mirlash buyurtmachilari belgilandi.

Moliya vazirligi markaziy apparatida uning boshqaruv xodimlari cheklangan soni doirasida maxsus iqtisodiy va kichik sanoat zonalari hamda yirik xorijiy va mahalliy investitsiya loyihalari infratuzilmasini moliyalashtirish bo‘limi tashkil etiladi.

Investitsiyalar va tashqi savdo vazirligiga Moliya vazirligi bilan birgalikda 1 sentyabrga qadar 2022 yilda maxsus iqtisodiy va kichik sanoat zonalari hamda to‘g‘ridan to‘g‘ri xorijiy va mahalliy investitsiyalar ishtirokidagi yirik ishlab chiqarish loyihalarini tashqi muhandislik-kommunikatsiya tarmoqlari bilan ta'minlash uchun 150 mln AQSh dollari ekvivalentidagi mablag‘lar xalqaro moliya institutlari hisobidan jalb etilishini ta'minlash topshirildi.