Ispaniyada chempionlik to‘qnashuvlari, Angliyada YeChL finali repetitsiyasi, Italiyada «Yuve» «Milan»ga qarshi. Hafta o‘yinlari anonsi
|21:25 / 08.05.202116 03915 min
Dam olish kunlari Yevropa milliy chempionatlarida hal qiluvchi palla bo‘ladi, deb bemalol aytish mumkin. Ispaniyada chempionlikka da'vogar to‘rt jamoa o‘zaro o‘yinlarda maydonga tushsa, Angliyada YeChL finaliga chiqqan klublar to‘qnashuvi, boshqa ligalarda YeChL yo‘llanmalari uchun kurash avj olgan. Sovrin yuta olmasligi bilan «nom qozongan» Maurisio Pochettino esa bu «ishni» Fransiyada ham davom ettirishi mumkin. «Lill» mavsum tugashiga 2 tur qolganda peshqadam va juda ishonchli ko‘rinmoqda.
La Liga. 35-tur
8 may (shanba)
BARSeLONA – ATLeTIKO
O‘yin boshlanish vaqti: 19:15
TV-translatsiya: FutbolTV
Bugun Ispaniyada nafaqat turning, balki yilning markaziy uchrashuvi bo‘lib o‘tadi. 7 yil avval «Kamp Nou»da xuddi shu jamoalar o‘rtasida chempionlik o‘yini bo‘lib o‘tgan va 1:1 hisobidagi durang madridliklarni mamlakat chempioniga aylantirgandi. Bu safargi intriga yanayam kattaroq, zero durang «Barselona»ni ham, «Atletiko»ni ham qoniqtirmaydi. U holda «Real» birinchi o‘ringa chiqib olishi va uch tur qolganda ushbu poyganing favoritiga aylanishi mumkin.
«Barselona» «Granada»dan uchralgan alamli mag‘lubiyatdan so‘ng, uchlikdagi favorit maqomini boy berdi. Endi Kuman shogirdlari bugun «Atletiko»ni yutishlari shart va «Real»ning qoqilishidan umid qilishlariga to‘g‘ri keladi. «Atletiko»ning imkoniyati esa o‘z qo‘lida – qolgan 4 o‘yinda g‘alaba qozon va sen chempionsan.
O‘yinga har ikki jamoa ham optimal tarkiblarda yetib kelayotgani ham ayni muddao, uchrashuvning shiddatli va sifatli bo‘lishini ta'minlaydi. Faqatgina mehmonlar safida qanot literali Renan Lodining jarohati Simeone imkoniyatlarini cheklashi mumkin. Odatda, u top raqiblarga qarshi uch markaziy himoyachi bilan o‘ynaydi va bu sxemada Triper va Lodi ikki qanotda to‘p suradilar. «Elche»ga qarshi o‘yinda «Atletiko» 4-4-2 o‘ynadi, Karrasko va Lemar vinger pozitsiyasi uchun tanlandi. Xo‘sh, Simeone o‘z an'anasidan voz kechib, kuchli raqibga nisbatan ham 4-4-2 da o‘ynaydimi yoki literal sifatida Lodining o‘rniga Karrasko yoki Lemardan foydalanadimi? Har ikki holat ham Simeone uchun optimal variant emas va aynan shu muammo balki madridliklar uchun hal qiluvchi bo‘lishi mumkin.
O‘zaro o‘yinlarga kelsak, birinchi davrada Madridda bo‘lib o‘tgan bahsda mezbonlar minimal hisobda g‘alaba qozongandilar. Umuman so‘nggi uch o‘yindan beri kataloniyaliklar «Atletiko»ni yenga olmayaptilar. «Kamp Nou»dagi so‘nggi uchrashuv o‘tgan yilning iyulida bo‘lib o‘tgan va 2:2 hisobi qayd etilgandi.
Mavzuga oid
APL. 35-tur
8 may (shanba)
MANCheSTeR SITI – CheLSI
O‘yin boshlanish vaqti: 21:30
TV-translatsiya: FutbolTV
Futbol muxlislari Chempionlar Ligasi 2020/21 finali repetitsiyasini bugunoq tomosha qilishlari mumkin. Albatta, bu shunchaki mashg‘ulot emas, har ikki jamoa uchun APLda katta vazifalar bor. «Manchester Siti» bugun g‘alaba qozonsa, muddatidan avval rasman Angliya chempioniga aylanadi. Gvardiola bu ishni kechiktirmoqchi emasligini ta'kidladi, jamoa uchun eng muhim turnir baribir APL bo‘lib qolishini alohida e'tirof etdi. «Chelsi» uchun ham ochko suv va havodek zarur. Londonliklar YeChL yo‘llanmasini beruvchi top-4lik uchun kurashmoqdalar. «Lester»ning kechagi mag‘lubiyati Tuxel shogirdlariga 3-o‘ringa chiqib olish imkoniyatini yaratdi.
«Chelsi» uchun yana bir ahamiyatli jihat shundaki, jamoa kelayotgan 10 kun ichida «Manchester Siti», «Arsenal» va «Lester» bilan chempionat o‘yinida, shuningdek, «Lester» bilan Angliya kubogi finalida maydonga tushishi kerak. Bunday tig‘iz taqvimning boshidayoq mag‘lubiyat «Chelsi»ning turnir jadvalidagi ustunligini yo‘qqa chiqaradi, «Vest Hem» va «Liverpul»ning ortdan quvib kelayotgani qo‘shimcha bosim yuklaydi. Tuxelning Gvardiola ustidan kubok yarimfinalida g‘alaba qozona olgani londonliklarga umid berishi shubhasiz. Birinchi davradagi o‘yinda esa «Manchester Siti» safarda 3:1 hisobida ishonchli g‘alabaga erishgandi.
Bu ikki jamoa APLda zaxira o‘rindig‘i eng boy, rotatsiya va turli formatsiyalar uchun eng qulay tarkibga ega ekanliklarini ham aytib o‘tish kerak. Pepda ham, Tomasda ham, ayniqsa yarimhimoya va hujumda, qanotlarda tanlovlar shu qadar ko‘pki, boshlang‘ich tarkibni taxmin qilish imkonsiz. Faqatgina «Manchester Siti» markaziy himoyasida bu safar qaysi juftlik to‘p surishini bilamiz, xolos. Jon Stounz «Aston Villa»ga qarshi o‘yinda hakam tomonidan maydondan chetlatilgan va ushbu o‘yinda sheriklariga yordam bera olmaydi. Mehmonlar safida Mateo Kovachichdan boshqa barcha futbolchilar uchrashuvga tayyor. Bu bahs bilan YeChL finali haqida tasavvur paydo qilishingiz mumkin.
Bundesliga. 32-tur
8 may (shanba)
BORUSSIYa D – LeYPsIG
O‘yin boshlanish vaqti: 18:30
TV-translatsiya: SportTV
Bu to‘qnashuv Bundesliga top-4ga ham tepadan, ham pastdan ta'sir qiladi. Hozirda «Bavariya»dan 7 ochko ortda borayotgan «Leypsig» ochko yo‘qotadigan bo‘lsa, myunxenliklarni muddatidan oldin mamlakat chempioniga aylantiradi. Bu «Bavariya»ning qatorasiga 8-chempionligi bo‘ladi. Mezbonlarning mag‘lubiyati esa jamoani top-4dan uzoqlashtirib qo‘yadi. Hozirda dortmundliklar «Volfsburg»dan 2, «Ayntraxt»dan 1 ochko kam jamg‘arib, 5-o‘rinda borishmoqda. «Ayntraxt» o‘zi shundog‘am oson taqvimga ega – frankfurtliklar o‘rtamiyona «Mayns» va «Frayburg», allaqachon ligani tark etgan «Shalke» bilan o‘ynaydilar. «Borussiya» qolgan uch o‘yinini o‘z foydasiga hal qilishi va «Ayntraxt»ning qoqilishidan umid qilishi kerak. «Leypsig» bilan o‘yinda ochko yo‘qotilishi esa imkoniyatni yanada pasaytirib yuboradi. Darvoqe, «Volfsburg»ning ham hali «Leypsig» bilan o‘yini bor.
«Borussiya»ning YeChL yo‘llanmasiga bu qadar urg‘u berayotganimizning sababi shundaki, bu holat nafaqat Germaniya, balki Yevropa futbolidagi muvozanatga ham ta'sir ko‘rsatishi mumkin. Ma'lumki, Dortmundda Sancho va Holand ismli ikki «javohir» bor. Klub egalari imkon qadar bu futbolchilarni saqlab qolishni, hech bo‘lmaganda ulardan birining Dortmundda qolishidan umid qilmoqdalar. Katta ehtimol bilan Manchesterga ketishga o‘tgan yozdayam yaqin bo‘lgan Sanchoni sotib, angliyalik vingerdan farqli ravishda tarkibda o‘rinbosari bo‘lmagan Holandni yana bir yilga olib qolmoqchilar. Chempionlar ligasi yo‘llanmasisiz, Yevropaning deyarli barcha grandlari xaridor bo‘layotgan hujumchini olib qolish yanada qiyinlashib ketadi. Demak, «Borussiya»ning YeChLdan chetda qolishi yozda transferlar bozorini yanada qizitib yuborishi shubhasiz.
Mezbonlar tarkibida yo‘qotishlar ko‘proq. Jarohatlangan Vitsel, Zagadu, Shmelserlar safiga Volfsburgdagi o‘tgan tur o‘yinida maydondan chetlatilgan Jud Bellinhem ham qo‘shildi. «Leypsig» safida esa Nkunkuning o‘rni bilinishi mumkin. Futbolchi katta ehtimol bilan mavsum oxirigacha maydonga qayta olmaydi.
Qizig‘i, ayni shu raqiblar oradan 4 kun o‘tib, 13 may kuni Germaniya kubogi finalida ham kuch sinashadilar.
A Seriya. 35-tur
9 may (yakshanba)
YuVeNTUS – MILAN
O‘yin boshlanish vaqti: 23:45
TV-translatsiya: FutbolTV/UzReportTV
Har ikki jamoaga qaysidir ma'noda achinish mumkin. «Yuventus» 9 yillik qatorasiga chempionlikdan keyin oxirgi turlarda YeChL yo‘llanmasi uchun kurashishi kutilmagan holat. «Milan»ga kelsak, jamoaning hozirgi egallab turgan o‘rni so‘nggi yillar uchun juda yaxshi natija bo‘lsa-da, Pioli shogirdlari yaqin yaqingacha turnir jadvalini boshqarib kelishgandi.
Xullas, hozir A Seriyada «Inter»ning ortidan uch jamoa bir xil – 69 ochko bilan kuchli to‘rtlikka joylashishgan. Hammasi tinch edi, agar ortdan yaqinlashib kelayotgan 67 ochkoli «Napoli» yo‘llanmalardan biriga chang solmayotgan bo‘lganida. «Napoli»ning imkoniyatlarini yuqoriroq baholash mumkin, chunki jamoa qolgan turlarni «Spetsiya», «Udineze», «Fiorentina» va «Verona»ga qarshi o‘tkazadi. Neapolliklar bu o‘yinlarda g‘alaba qozonib, yuqoridan kimdir qoqilishini kutishi mumkin. Kimdir qoqilishi ham shubhasiz – «Yuventus» va «Milan»ning o‘zaro o‘yinidan tashqari, hali bizni «Atalanta» va «Milan» o‘rtasidagi o‘yin ham kutib turibdi. Demak, hali Italiyada hech narsa aniq emas, «Inter»dan boshqa istalgan jamoa YeChL yo‘llanmasidan quruq qolishi mumkin.
Mezbonlar tarkibida faqat Vulqon Demiral maydonga tusha olmaydi. U 10 martdagi jarohatidan hali tiklangani yo‘q. «Milan» safida esa Kastilexo diskvalifikatsiya qilingan. U «Benevento»ga qarshi o‘yinda hakam tomonidan ogohlantirilgan va bu uning mavsumdagi 5-sariq kartochkasidir.
La Liga. 35-tur
9 may (yakshanba)
ReAL – SeVILYa
O‘yin boshlanish vaqti: 23:55
TV-translatsiya: FutbolTV/UzReport
Italiya, Angliya va Germaniyada Chempionlar Ligasi yo‘llanmasi uchun kurash qizg‘in pallaga kirgan bo‘lsa, Ispaniyada to‘rtlik allaqachon shakllanib ulgurgan. Ammo bu yerda stavkalar yanada yuqori, mana shu to‘rtlikda hatto chempion bo‘lish uchun ham imkoniyat saqlanib turibdi. Boshqa ligalarda esa «Inter» – chempion, Angliya va Germaniyada chempion hatto bugunoq rasman aniq bo‘lishi kutilmoqda.
Bu to‘rtlikda «Real»ning imkoniyatlari yomon emas. Qolgan 4 o‘yinda g‘alaba qozonish va «Atletiko»ning qoqilishini kutish. Zidan jamoasining ustunligi shundaki, ular «Barselona» bilan ham, «Atletiko» bilan ham o‘zaro o‘yinlarda muvaffaqiyatli bo‘lishgan, ma'lumki, La Ligada ochkolar teng bo‘lganda, avvalo, mana shu faktorga e'tibor beriladi. «Kamp Nou»da «Atletiko»ning ochko yo‘qotishi va «Sevilya» ustidan g‘alaba «Real»ni turnir jadvalida peshqadamga aylantiradi.
Bu oson bo‘lmaydi, albatta. To‘g‘ri, «Real» «Sevilya»ga qarshi oxirgi 4 o‘yinni g‘alaba bilan yakunlangan. Ammo bu g‘alabalar osonlik bilan kelmagan. Buning ustiga, «Real» butun mavsumni jarohatlar girdobida o‘tkazdi va bu borada ham Yevropa rekordini o‘rnatdi. Qaysidir pallada, «Real» ushbu muammoga qarshi yo‘lini topgandir, zero shu yergacha yetib kelish ham oson emas. Lekin mavsum so‘ngida aksariyat futbolchilarning formada emasliklari, doim maydonga tushgan futbolchilardagi charchoq o‘z ta'sirini ko‘rsatmay qolmayapti. «Betis» va «Xetafe»ga qarshi o‘yinlardagi ochko yo‘qotish, Chempionlar Ligasidagi «Chelsi»ga qarshi nursiz o‘yinlar asosan mana shu faktorlar ta'sirida ro‘y berdi. Zidan hal qiluvchi pallalarda rotatsiyalar yordamida futbolchilar formasini yuqori ushlab turish va kerakli o‘yinlarda bundan foydalanish bilan nom qozongandi. Bu safar «Real»ning tarkibi ushbu imkonni bermadi.
«Real» «Sevilya»ga qarshi o‘yinda Ramos, Varan, Vaskes va Karvaxalsiz tushadi. Shuningdek, Valverdening ham yaxshi sport formasida emasligini «Chelsi»ga qarshi o‘yinda ko‘rdik. Shuningdek, hafta o‘rtasida «Chelsi»ga qarshi qiyin safar bo‘lgani «Sevilya»ga qo‘shimcha ustunlik berishi turgan gap. Deyarli mavsumoldi tayyorgarliksiz va tanaffussiz kechgan pandemiya mavsumida dam olingan ortiqcha 2 kunning bahosi ham juda katta bo‘ladi.
BOShQA O‘YINLAR
8 may. Spetsiya – NAPOLI (18:00), BAVARIYa – Borussiya M (21:30), LIVeRPUL – Sauthempton (9 mayga o‘tar kechasi, 00:15)
9 may. Jyenoa – Sassuolo (15:30), Parma – ATALANTA (18:00), Aston Villa – MANCheSTeR YuNAYTeD (18:05), VeST HEM – Everton (20:30), ARSeNAL – Vest Bromvich (23:00), Renn – PSJ (23:55).
