Innovatsiya vazirligi Germaniya bilan hamkorlikda yangi loyiha amalga oshiradi

10 may kuni Innovatsion rivojlanish vaziri Ibrohim Abdurahmonov hamda Germaniya xalqaro hamkorlik jamiyati (GIZ) direktori Yorg Pudelka tomonidan 250 ming Yevro qiymatidagi «Zamonaviy innovatsion markazlar – 2022» texnik yordam loyihasini amalga oshirish to‘g‘risida Memorandum imzolandi.

Loyiha 3 ta asosiy komponentdan iborat bo‘lib, u ilg‘or Germaniya tajribasiga tayangan holda innovatsion markazlar xodimlari va innovatsion tizimning asosiy ishtirokchilarining stajirovkalarini tashkil etish, aholining innovatsiyalar to‘g‘risida xabardorligini oshirishni o‘z ichiga oladi.

Memorandum doirasida Xalqaro hamkorlik bo‘yicha Germaniya jamiyatining (GIZ) beg‘araz grantlari asosida 15 nafar innovatsiya sohasidagi mutaxassislar Germaniyaga malaka oshirishga yuboriladi, xalqaro ekspertlar yordamida «Innovatsion markazlarni boshqarish to‘g‘risida»gi qo‘llanma ishlab chiqiladi hamda Germaniyaning innovatsiya sohasi to‘g‘risidagi litsenziyalangan hujjatli filmlar mamlakat teleradiokanallari orqali keng jamoatchilikka taqdim etiladi.

Innovatsion rivojlanish vaziri Ibrohim Abdurahmonovning qayd etishicha, respublika hududlarida innovatsion infratuzilmalarni tashkil etilishida kadrlar masalasi, ularning malakasi katta ahamiyatga ega. Innovatsiyalar bo‘yicha prorektorlar mas'ulligidagi ilmiy ishlanmalari tijoratlashtirish markazlariga umumiy konsepsiya ishlab chiqish eng muhim vazifalardan biri. Ushbu Memorandum shunday innovatsion markazlarni rivojlantirish, boshqarish sohasini yangi va yuqori pog‘onaga ko‘tarishda katta turtki bo‘lib xizmat qiladi.