11:41 / 16.05.2021
30555
Тошкентда солиқ инспектори 3,5 минг доллар, Андижонда 15 млн сўм билан ушланди

Юнусобод тумани ДСИ катта инспектори ва Булоқбоши тумани ДСИ бош инспектори жиноят устида қўлга олинди. Бу ҳақда ДХХ матбуот хизмати Kun.uz'га хабар берди.

Юнусобод ДСИ катта инспектори / Видеодан кадр

Тошкент шаҳар Юнусобод туман давлат солиқ инспекцияси катта инспектори маҳаллий МЧЖ таъсисчисидан 3,5 минг АҚШ доллари миқдорида пора олган вақтида ушланди.

Аниқланишича, мазкур мансабдор шахс ушбу пул эвазига МЧЖда амалга оширилиши режалаштирилаётган камерал текширувда ижобий хулоса берилишини ваъда қилган.

Тезкор тадбир ДХХ Тошкент шаҳар бошқармаси ҳамда шаҳар прокуратураси ва департамент томонидан ўтказилган.

Видеодан кадр

Андижон вилояти Булоқбоши туман давлат солиқ инспекцияси бош инспектори 15 млн сўм олган вақтида ушланди.

У маҳаллий фуқарога тегишли бўлган 33 сотих ер майдонининг аслида солиқдан қарздорлиги бўлмаса-да, 30 млн сўм қарзи борлигини айтиб, ушбу қарздорликни бартараф қилиб бериш эвазига 15 млн сўм талаб қилган.

Булоқбоши туман ДСИ бош инспектори
Видеодан кадр

Тезкор тадбир ДХХ Андижон вилояти бошқармаси ҳамда Иқтисодий жиноятларга қарши курашиш департаментининг ҳудудий бошқармаси ходимлари томонидан ўтказилган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Аввалроқ Наманган ва Жиззахда икки нафар ҳоким ўринбосари қўлга олингани хабар қилинганди.

Top