Namanganda 20 yoshli haydovchi sodir etgan YTHda piyoda vafot etdi

Namangan viloyati Yangiqo‘rg‘on tumanida 20 yoshli haydovchi sodir etgan YTHda piyoda vafot etgan. Bu haqda viloyat IIB YHXB xabar bermoqda.

Ma'lum qilinishicha, 2021 yil 2 iyul kuni soat 17:50larda, Yangiqo‘rg‘on-Namangan yo‘lining  «Radivon» MFYda 5-kilometrida odam o‘limi bilan bog‘liq yo‘l-transport hodisasi sodir bo‘lgan. 

Qayd etilishicha, Yangiqo‘rg‘on tumanida yashovchi, 2001 yilda tug‘ilgan fuqaro «Neksiya» mashinasini boshqarib borayotib, harakat xavfsizligini ta'minlay olmagan. Natijada yo‘lni kesib o‘tayotgan piyoda, Chortoq tumanida yashovchi 1968 yilda tug‘ilgan fuqaroni urib yuborgan.

Oqibatda, piyoda og‘ir tan jarohatlari olib, shifoxonada vafot etgan.

Ta'kidlanishicha, ushbu holat bo‘yicha Yangiqo‘rg‘on tuman IIB tergov bo‘limi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Hozirda surishtiruv ishlari olib borilmoqda.