Dominikanaga qarashli harbiy vertolyot Haiti bilan chegarada falokatga uchradi

Dominikanaga qarashli harbiy vertolyot Haiti bilan chegaradosh Ximani shahriga qo‘nish vaqtida falokatga uchradi. Ma'lum qilinishicha, baxsiz hodisa oqibatida hech kim jabrlanmagan.

Vertolyot Haiti prezidenti Jovenel Moiz o‘ldirilgandan keyin qo‘shni Dominikana mudofaa vazirligi kiritgan “Gibbon” amaliyoti doirasida chegarada kuzatuv olib borgan.

7 iyulga o‘tar kechasi Haiti prezidenti qarorgohiga noma'lum shaxslar hujum uyushtirgan. Uning oqibatida prezident Moiz halok bo‘lgan, uning rafiqasi Martin Moiz jarohat olgan. Keyinroq Haiti birinchi xonimi olingan jarohatlardan shifoxonada vafot etgani ma'lum qilingan. Biroq ko‘p o‘tmay Haitining Dominikanadagi elchixonasi bu axborotni rad etgan va Moiz xonimning ahvoli “barqarorligini” ma'lum qilgan.

Keyinroq Haitining AQShdagi elchisi Edmon Bokshi Martin Moiz og‘ir ahvolda Mayamiga evakuatsiya qilinishini xabar qilgan.

Haiti bosh vaziri lavozimini bajarayotgan Klod Jozef BMTni Moizning o‘ldirilishi yuzasidan Xavfsizlik kengashi yig‘ilishini o‘tkazishga va qotillikni tergov qilishga chaqirgan.

O‘z navbatida, BMT bosh kotibi Antoniu Guterrish prezident o‘ldirilgandan keyin Haiti aholisini tartibni saqlashga va zo‘ravonlik harakatlari sodir etmaslikka chaqirgan.