14:59 / 12.07.2021
39195
«Оёқяланг судрашди. Қонунни оёқости қилишди» – урганчлик аёл Сенат раиси ва Бош прокурордан кўмак кутмоқда

Урганч туманида буғдойи ҳокимлик ва куч тузилмалари томонидан тортиб олинган хонадон бекаси Гулхумор Назарова Сенат раиси ва Бош прокурорга мурожаат қилиб, ёрдам сўради.

Kun.uz сайтида хоразмча рейдерлик ҳақида эълон қилинган видеолавҳада Урганч туманида ИИБ ходимлари ва бошқа идораларнинг вакиллари ҳокимнинг топшириғига кўра фуқаронинг 30 тонна буғдойини тортиб олгани, фуқаролар эса ўз навбатида хусусий мулкини ҳимоя қилиш мақсадида уларга қаршилик қилгани акс этганди.

Шундан сўнг Хоразм вилояти прокуратураси ижтимоий тармоқларда тарқалган видеолавҳа юзасидан айни пайтда туман ишчи гуруҳи аъзолари, шунингдек, ИИБ ходимлари хатти-ҳаракатларига ҳуқуқий баҳо бериш мақсадида Урганч тумани прокуратураси томонидан терговга қадар текширув олиб борилаётгани, вилоят ИИБ томонидан видеотасвирдаги ички ишлар органлари ходимлари ҳаракатларига нисбатан хизмат текшируви ўтказилаётганини маълум қилди.

Адлия вазирлиги ҳам жойларда фермерларнинг ортиқча буғдойи тортиб олинаётганига муносабат билдириб, бу ишлар амалдаги қонунларга зид экани, бунинг учун жавобгарлик борлигини эслатган эди.

Бироқ Ислом Ражабовнинг турмуш ўртоғи Гулхумор Назарова таҳририятга мурожаат қилиб, орадан шунча вақт ўтган бўлса-да, амалда ҳеч қандай ўзгариш бўлмаётгани, бўлаётган босимлардан сўнг инсульт бўлиб қолганини маълум қилди.

Жабрланувчи ўз видеомурожаатида Ўзбекистон бош прокурори Ниғматилла Йўлдошевга мурожаат қилиб, қонунбузарларнинг ҳаракатларига ҳуқуқий баҳо беришни сўраган.

«Ҳурматли бош прокурор Ниғматилла Йўлдошев!

2021 йилнинг 19 июнь куни 20-25 нафар шахс шахсий мол-мулкимизга, инсонийлик қадр-қимматимизга тажовуз қилишди. Шулардан 15-16 нафари ИИБ формасида, 3-4 нафари оддий фуқаро кийимида, 3-4 нафари ЙПХ кийимида эди. Илтимос, бу одамларнинг шахсига аниқлик киритиб, агрессив ҳаракатларига ҳуқуқий баҳо бериб, [уларга нисбатан] қонуний чора кўриб, бизнинг кўрган зарарларимизни ундиришда амалий ёрдам беришингизни сўрайман», дейди у.

Бундан ташқари, Гулхумор Назарова Олий Мажлис Сенати раиси Танзила Норбоевага ҳам мурожаат қилиб, рўй берган воқеада ўзига нисбатан ҳам куч ишлатилгани, айни пайтда ҳуқуқий ва психологик ёрдамга муҳтож эканини айтади.

«Ҳурматли Танзила Норбоева!

Сиз Ўзбекистонда инсоннинг ҳуқуқ ва эркинликлари давлат ҳимоясида, фуқароларга, айниқса, аёлларга нисбатан зўравонликка йўл қўйилмайди, дея кўп таъкидлайсиз. Мен аёлман, Ўзбекистон фуқаросиман. Менинг хавфсизлигимни таъминлаб, ҳуқуқимни ҳимоя қилиши керак бўлган ходимларнинг оёғи остида қолдим. Хўрлашди, устимдан кулишди. Ҳатто оёқяланг судрашди, [жазирамада] оёқларим куйиб қолди. Қонунни оёқости қилишди.

Ўзбекистонда ҳокимият вакиллари ва ИИБ ходимлари хоҳлаган пайтда, хоҳлаган фуқаронинг уйига кириб, мулкига тажовуз қилишга ҳақлими? Қани ҳурматли депутатларимиз? Қани ҳуқуқни муҳофаза қилиш органлари? Нега ҳамма жим? Эртага [бу ҳолат] бошқанинг бошига тушмаслигига ким кафолат беради?

Ҳурматли Танзила Норбоева! Эрим касалхонада, ўғлим чет элда. Икки нафар қизим билан уйда қамалиб ўтирибман. Менга ҳуқуқий ва руҳий-психологик ёрдам беришингизни сўрайман», дейди Гулхумор Назарова.

Эслатиб ўтамиз, Kun.uz таҳририяти ушбу воқеа юзасидан ўз суриштирувларини давом эттирмоқда. Ўз навбатида юқори турувчи идоралардан ҳолат бўйича тайинланган дастлабки суриштирув ва хизмат текширувларидан адолат таъминланишини, ишлар босди-босди бўлиб кетишининг олди олинишини сўраб қоламиз.

Top