«Oyoqyalang sudrashdi. Qonunni oyoqosti qilishdi» – urganchlik ayol Senat raisi va Bosh prokurordan ko‘mak kutmoqda

{Yii::t(}

O'tkazib yuborish 6s

O'tkazib yuborish

Kun.uz saytida xorazmcha reyderlik haqida e'lon qilingan videolavhada Urganch tumanida IIB xodimlari va boshqa idoralarning vakillari hokimning topshirig‘iga ko‘ra fuqaroning 30 tonna bug‘doyini tortib olgani, fuqarolar esa o‘z navbatida xususiy mulkini himoya qilish maqsadida ularga qarshilik qilgani aks etgandi.

Shundan so‘ng Xorazm viloyati prokuraturasi ijtimoiy tarmoqlarda tarqalgan videolavha yuzasidan ayni paytda tuman ishchi guruhi a'zolari, shuningdek, IIB xodimlari xatti-harakatlariga huquqiy baho berish maqsadida Urganch tumani prokuraturasi tomonidan tergovga qadar tekshiruv olib borilayotgani, viloyat IIB tomonidan videotasvirdagi ichki ishlar organlari xodimlari harakatlariga nisbatan xizmat tekshiruvi o‘tkazilayotganini ma'lum qildi.

Adliya vazirligi ham joylarda fermerlarning ortiqcha bug‘doyi tortib olinayotganiga munosabat bildirib, bu ishlar amaldagi qonunlarga zid ekani, buning uchun javobgarlik borligini eslatgan edi.

Biroq Islom Rajabovning turmush o‘rtog‘i Gulxumor Nazarova tahririyatga murojaat qilib, oradan shuncha vaqt o‘tgan bo‘lsa-da, amalda hech qanday o‘zgarish bo‘lmayotgani, bo‘layotgan bosimlardan so‘ng insult bo‘lib qolganini ma'lum qildi.

Jabrlanuvchi o‘z videomurojaatida O‘zbekiston bosh prokurori Nig‘matilla Yo‘ldoshevga murojaat qilib, qonunbuzarlarning harakatlariga huquqiy baho berishni so‘ragan.

«Hurmatli bosh prokuror Nig‘matilla Yo‘ldoshev!

2021 yilning 19 iyun kuni 20-25 nafar shaxs shaxsiy mol-mulkimizga, insoniylik qadr-qimmatimizga tajovuz qilishdi. Shulardan 15-16 nafari IIB formasida, 3-4 nafari oddiy fuqaro kiyimida, 3-4 nafari YPX kiyimida edi. Iltimos, bu odamlarning shaxsiga aniqlik kiritib, agressiv harakatlariga huquqiy baho berib, [ularga nisbatan] qonuniy chora ko‘rib, bizning ko‘rgan zararlarimizni undirishda amaliy yordam berishingizni so‘rayman», deydi u.

Bundan tashqari, Gulxumor Nazarova Oliy Majlis Senati raisi Tanzila Norboyevaga ham murojaat qilib, ro‘y bergan voqeada o‘ziga nisbatan ham kuch ishlatilgani, ayni paytda huquqiy va psixologik yordamga muhtoj ekanini aytadi.

«Hurmatli Tanzila Norboyeva!

Siz O‘zbekistonda insonning huquq va erkinliklari davlat himoyasida, fuqarolarga, ayniqsa, ayollarga nisbatan zo‘ravonlikka yo‘l qo‘yilmaydi, deya ko‘p ta'kidlaysiz. Men ayolman, O‘zbekiston fuqarosiman. Mening xavfsizligimni ta'minlab, huquqimni himoya qilishi kerak bo‘lgan xodimlarning oyog‘i ostida qoldim. Xo‘rlashdi, ustimdan kulishdi. Hatto oyoqyalang sudrashdi, [jaziramada] oyoqlarim kuyib qoldi. Qonunni oyoqosti qilishdi.

O‘zbekistonda hokimiyat vakillari va IIB xodimlari xohlagan paytda, xohlagan fuqaroning uyiga kirib, mulkiga tajovuz qilishga haqlimi? Qani hurmatli deputatlarimiz? Qani huquqni muhofaza qilish organlari? Nega hamma jim? Ertaga [bu holat] boshqaning boshiga tushmasligiga kim kafolat beradi?

Hurmatli Tanzila Norboyeva! Erim kasalxonada, o‘g‘lim chet elda. Ikki nafar qizim bilan uyda qamalib o‘tiribman. Menga huquqiy va ruhiy-psixologik yordam berishingizni so‘rayman», deydi Gulxumor Nazarova.

Eslatib o‘tamiz, Kun.uz tahririyati ushbu voqea yuzasidan o‘z surishtiruvlarini davom ettirmoqda. O‘z navbatida yuqori turuvchi idoralardan holat bo‘yicha tayinlangan dastlabki surishtiruv va xizmat tekshiruvlaridan adolat ta'minlanishini, ishlar bosdi-bosdi bo‘lib ketishining oldi olinishini so‘rab qolamiz.