Samarqandda «Qizil kitob»ga kiritilgan O‘rta Osiyo tosh qirg‘iyi bolalarining noqonuniy savdosiga chek qo‘yilgan. Bu haqda viloyat Ekologiya va atrof-muhitni muhofaza qilish boshqarmasi axborot xizmati xabar bermoqda.
Ma'lum qilinishicha, 2021 yil 14 iyul kuni Samarqand shahar Ekologiya va atrof-muhitni muhofaza qilish nazorat inspeksiyasi davlat inspektorlari tomonidan Samarqand shahrida olib borilgan kuzatuv reyd tadbirlari jarayonida Samarqand shahri «Mo‘liyon» MFYda yashovchi fuqaro I.A. noqonuniy tarzda noyob qushlar savdosi bilan shug‘ullanayotgani aniqlangan.
Jumladan, u hozirgi kunda «Qizil kitob»ga kiritilgan 4 dona O‘rta Osiyo tosh qirg‘iyi bolalarining noqonuniy savdosi bilan shug‘ullangan va qushlarni sotmoqchi bo‘lgan.
Qayd etilishicha, ayni paytda mazkur holat yuzasidan tergovga qadar surishtiruv ishlari olib borilmoqda.
