Koronadayjest: Hindistonda millionlab ortiqcha o‘limlar, Yevropa 50 millionlik dovondan o‘tdi

Sayyorada pandemiya boshidan buyon koronavirusga chalinish holatlari soni 192 mln.dan oshdi. Rasmiy hisoblarga ko‘ra, shu vaqtgacha virusdan 4 mln 115 mingdan ortiq kishi vafot etgan. Qo‘llangan vaksinalar - qariyb 3,7 mlrd doza, Yer shari aholisining milliarddan ortiq aholisi to‘liq emlab bo‘lingan. BBC so‘nggi koronaxabarlarni taqdim etdi.

Hindiston - besh milliongacha ortiqcha o‘limlar
Amerikalik va hindistonlik olimlarning hisob-kitoblariga ko‘ra, Hindistonda pandemiya vaqtidagi ortiqcha o‘limlar soni besh millionni tashkil etishi mumkin, bu esa ushbu mamlakatda kovid tufayli qayd etilgan o‘limlar sonidan o‘n barobar ko‘proq.

Vashington global taraqqiyot bo‘yicha analitik markazi muqaddam Hindiston hukumatida bosh iqtisodiy maslahatchi bo‘lib ishlagan Arvinda Subramanyana ishtirokidagi tadqiqotda pandemiya boshidan shu yilning iyuniga qadar Hindistonda o‘lim holatlari soni «tinch» yillardagiga nisbatan 3,4 - 4,9 mln.taga ko‘p bo‘lganini aniqlagan.

Rasmiy statistikaga ko‘ra, Hindistonda 415 ming kishi koronavirusdan vafot etgan, ammo juda ko‘plab mutaxassislar va mahalliy matbuot hukumat shunchaki kovid o‘limlarini qayd etishga ulgurmay qolganini, ayniqsa yuz millionlab hindlar yashaydigan qishloq hududlarda buning imkoni bo‘lmaganini yozishgan.

Shu bilan birga, hisobot mualliflari millionlab ortiqcha o‘limlarning barchasini to‘g‘ridan to‘g‘ri koronavirus bilan bog‘lash to‘g‘ri bo‘lmasligi - shunchaki bunday ma'lumot yo‘qligini aytishgan.

Pandemiyaning kuchli to‘lqini kuzatilgan may oyida Hindistonda rasmiy statistika bo‘yicha 170 ming kishi koronavirus qurboni bo‘lgan; krematoriyalar va jasadlarni yoqish maydonlari jasadlar oqimiga dosh bera olmagan va Ganga daryosida suzib yurgan yuzlab jasadlar aniqlangandi.

Yevropada 50 million kasallanish

Yevropa koronavirusga chalinganlar soni 50 milliondan oshgan ilk qit'a bo‘ldi - bu haqda Reuters agentligi o‘z hisob-kitoblariga asoslangan holda xabar berdi.

Qit'ada eng ko‘p aholiga ega bo‘lgan Rossiya Yevropa bo‘yicha kasallanganlar soni bo‘yicha yetakchilik qilmoqda - qariyb olti million holat.

Yevropaning bu boradagi yetakchiligini aholini test qilish va hisob-kitob ishlari nisbatan yaxshi olib borilayotgani bilan izohlash mumkin. Shimoliy Amerikada ham bu ishlar yomon olib borilmayapti va u yerda - taxminan 38 mln kasallanish holati qayd etilgan (AQSh - 34,1 mln, Meksika - 2,66 mln, Kanada - 1,46 mln).

Hozirda Yevropa bo‘ylab «Delta» shtammi keng tarqalgan, bu avvalgi shtammlarga qaraganda yuquvchan. Har sakkiz kunda kasallanish holatlari soni bir millionga ortmoqda. Yevropada pandemiya davrida ushbu kasallikdan vafot etganlar soni - 1,3 mln kishini tashkil etmoqda, bu dunyo bo‘yicha rasmiy koronavirus qurbonlari sonining uchdan bir qismiga teng.

Olimpiyachilarning himoya pufagi yorildi

Tashkilotchilar tomonidan Tokio Olimpiadasi ishtirokchilarini saqlashiga umid qilingan karantin pufagi pardasi allaqachon yorilgan va virus Yaponiya bo‘ylab tarqalishni boshlagan - London qirollik kolleji qoshidagi aholi salomatligi institutining sobiq direktori Kendzi Sibuya shunday deb hisoblaydi.

Olimpiada tashkilotchilari chorshanba kuni sportchilar va Olimpiadada ishtirok etuvchi delegatsiya vakillaridan jami 79 kishida koronavirus aniqlangani haqida xabar berdi. Olimpiadaning ochilish marosimi juma kuniga belgilangan. O‘yinlar tribunalardagi muxlislarsiz o‘tkaziladi.

Olimpiada-2020 yana qoldirilishi tarafdori bo‘lgan Kendzi Sibuyaning ta'kidlashicha, Olimpiada tashkilotchilarining «barchasi nazorat ostida» ekani haqida berayotgan bayonotlari haqiqiy holatni ifoda etmayapti va bu yaponiyaliklarni faqat g‘azablantirmoqda.

Xalqaro olimpiya qo‘mitasi rahbari Tomas Bax o‘tgan haftada test olish va karantinga joylashtirish tizimi olimpiyachilar orasida virus tarqalishi ehtimolini nolga yaqinlashtirishi haqida gapirgandi.

Olimpiadada ishtirok etish uchun kelganlar bilan bog‘liq kasallanish holatlari Olimpiya qishlog‘ida ham, uning tashqarisida ham qayd etilmoqda; Tokioning o‘zida hozir lokdaun joriy etilgan va kuniga o‘rtacha 1,5 ming yangi holat qayd etilmoqda, so‘nggi so‘rovlardan biri yaponlarning 55 foizi Olimpiada boshlanishiga sanoqli kunlar qolgan bo‘lsa-da, uni bekor qilish kerak deb hisoblashini ko‘rsatgan.

Tokio-2020 Olimpiadasi tashkiliy qo‘mitasi bosh kotibi Tosiro Muto jurnalistlarning Olimpiada bekor qilinishi yoki keyinroqqa qoldirilishi ehtimoli bo‘yicha savollariga javoban tashkilotchilar musbat natija bergan testlarni kuzatishda davom etayotganini aytish bilan kifoyalangan.

Avstraliyada yangi lokdaunlar
Avstraliya virusga qarshi kurashda boshqa mamlakatlarga nisbatan qat'iyroq harakat qilmoqda va u yerda minglab yangi holatlar uchun emas, sanoqli holatlar tufayli ham lokdaunlar joriy etilmoqda. Seshanba kuni Janubiy Avstraliya shtatida ham karantin qaytdi - bu hududda bir kunda beshta yangi kasallanish holati qayd etilgandi.

Shuningdek, Yangi Janubiy Uelsning katta qismi va butun Viktoriya shtatida qat'iy karantin choralari amal qilishi davom etmoqda. Hozirda jami 14 million avstraliyalik uyda o‘zini ihotalagan, bu esa mamlakat aholisining yarmidan ortiq qismini tashkil etadi.

Avstraliyada pandemiya boshidan buyon 915 kishi kovid qurboni bo‘lgan; hozirda shifoxonalarda, shu jumladan intensiv terapiya palatalarida bir necha o‘n kishi davolanmoqda.