Bugun ikki nafar dzyudochi, bir nafardan taekvondo, boks va suzish sporti vakillari musobaqalarda ishtirok etadi.
Soat 7:00da taekvondochilarning so‘nggi vakili Svetlana Osipova (+67 kg) medallar uchun kurashadi. Uning ilk raqibi qozog‘istonlik Cansel Deniz bo‘ladi.
Soat 7:00da dzyudo bo‘yicha musobaqalar ham boshlanadi. Farangiz Hojiyeva (-63 kg) kabo verdelik Sandrin Billetga qarshi gilamga chiqadi.
Erkak dzyudochilar jamoasida Sharofiddin Boltaboyev (-81 kg) ham kurashga kirishadi. Unga vanuatulik Ugo Kumbo raqiblik qiladi. Dzyudo bo‘yicha musobaqalar kun bo‘yi davom etadi.
Soat 07:15da bokschilar jamoasidan Bobo-Usmon Boturov (-69 kg) birinchi jangini o‘tkazadi. Uning ilk bosqichdagi raqibi dominikanlik Rohan Polanko bo‘ladi.
Soat 15:10da suzuvchi Xurshidjon Tursunov 100 metrga erkin usulda suzish bo‘yicha saralash bahslarida qatnashadi.
UPD: Ob-havo noqulay kelishi sababli akademik eshkak eshish bo‘yicha 29-30 iyul kundagi musobaqalar 27 iyulga ko‘chirilgandi va bugun soat 5:00da Sobir Safaraliyev va Shahboz Xolmirzayev chiqish qilishi kutilgandi. Ammo bu qaror bekor qilinib, musobaqalar o‘z vaqtida o‘tadigan bo‘ldi.
Olimpiadaning uchinchi kuni yakunlariga ko‘ra, O‘zbekiston delegatsiyasi 1 oltin medal bilan 23-o‘rinda joylashgan. Bundan tashqari, besh nafar bokschi ilk janglarida g‘alabaga erishib, medallar uchun kurashni davom ettirmoqda.
