“Taekvondo uchun ko‘p narsadan voz kechdim” – Parij olimpiadasi sovrindori Svetlana Osipova

O‘zbekistonlik taekvondochilar Parijdagi musobaqada o‘ziga xos tarix yozdi. Xususan, yozgi olimpiya o‘yinlarida ilk bor o‘zbekistonlik ayol taekvondochi medalga ega chiqdi. Bu ishni +67 kg vazn toifasida tatamiga chiqqan Svetlana Osipova uddaladi. U Kun.uz muxbiri bilan suhbatda 4 yillikning yirik musobaqasi sovrindorligigacha bosib o‘tgan yo‘li haqida so‘zlab berdi.

Svetlana Osipova 2000 yilning 3 mayida Toshkent viloyati, Chirchiq shahrida tug‘ilgan. 2015 yildan buyon taekvondo WT sport turi bilan shug‘ullanib kelmoqda. O‘zbekiston terma jamoasi a’zosi. 2019 yilda Butunjahon harbiy o‘yinlarida oltin medalni qo‘lga kiritgan. 2024 yilgi yozgi olimpiya o‘yinlari kumush medali sohibi.

Parijdagi janglar

Odatda, tribunadan tomoshabinlarning barchasi sizga qarab turadi, tatami hayajonlari qo‘shilib ruhiy bosim bo‘ladi, atmosferaga moslashishga biroz vaqt ketadi. Shu sabab har doim birinchi jang men uchun murakkab kechadi.

Bu safar ham eng qiyin jang birinchisi bo‘ldi. Ikkinchi, uchinchi janglar va finalda ishonch ortib, hayajonlarni yengib bellashuvga kirishdim. O‘zbek taekvondochilarining qanday salohiyatga egaligini barchaga ko‘rsatib qo‘yish uchun bor kuchim bilan intildim.

Hal qiluvchi jangda Fransiya vakili Alteya Loren bilan tatamida bellashdik. Birinchi raund Lorenning hisobiga tugadi. Ikkinchi raundda hisob 0:0 edi, o‘yinning tugash vaqtiga yaqin Lorenning boshiga zarba berdim, bizning hisobimizga 3:0 bo‘ldi. Vaqt tugadi deb o‘ylagan edim, Loren birdan hujum qildi va hakamlar unga ham 3 ball berishdi. Shu tariqa Loren oltinni qo‘lga kiritdi, menga esa kumush medal nasib etdi. O‘sha vaqtda ichimda “g‘alaba taqdirda emaskan” degan so‘zlarni takrorladim va peshonamga yozilgani shu ekan deb ko‘nglimni cho‘ktirmaslikka harakat qildim.

Kutilmagan qo‘ng‘iroq

Aynan menga prezident qo‘ng‘iroq qiladi, deb o‘ylamagandim, kutmagandim, to‘g‘risi. Chunki shu vaqtgacha faqat oltin medalni olganlarga telefon qilib, tabriklaydilar, deb o‘ylardim. Rahbarimiz bu haqida xabar berganlarida, juda xursand bo‘ldim. Prezident qo‘ng‘iroq qilib, “qizim, bu medal biz uchun oltinga teng” deganlarida faxrlanib ketdim, o‘zimga ishonchim yanada ortdi.

Olimpiadaga tayyorgarlik

Tokio olimpiadasi 2021 yilda karantin hisobiga bir yil keyin tashkil etilgani sababli Parij olimpiadasi davriyligi 3 yillik bo‘ldi. Bu vaqt ichida 2 marta jahon chempionatiga chiqdim, bitta oltin, bitta kumush medal sohibiga aylandim. Ko‘plab musobaqalar o‘tkazdik, taekvondo bo‘yicha qanday chempionatlar mavjud bo‘lsa, hammasidan medalim bor edi, faqat olimpiadaniki qolgan edi xolos.

2023 yil dekabrida bo‘lib o‘tgan musobaqada fransiyalik raqibim bilan bir-birimizga oyog‘imiz urilib ketdi. Qattiq jarohat oldim. O‘zbekistonlik shifokorlar operatsiya qilish zarurligini ta’kidlashdi. Yaqinlarim tavsiyasiga ko‘ra, germaniyalik mutaxassis bilan bog‘landik. U ikki oy davomida yotib, oyoqqa dam berish kerakligini aytdi va shu tariqa trenirovkalarni ma’lum vaqtga to‘xtatdim. Bu payt ichida o‘zimga ishonchim ancha tushib ketdi. Sababi barcha raqiblarim olimpiadaga zallarda har kuni tayyorlanib kuch yig‘ayotgan bir vaqtda menga to‘rt devor ichida qolib, jimgina kutish oson bo‘lmadi.

Ikki oydan so‘ng Germaniyaga bordik, maxsus apparatlarda oyog‘imni tekshirishdi. Suyak bilan bo‘g‘in orasida masofa 1 mm bo‘lsa, “to‘g‘ridan to‘g‘ri operatsiya, o‘z-o‘zidan tuzalmaydi” deyishdi. Jarohat olgan joyimda bu ko‘rsatkich 0,7 mm edi, 0,3 mm meni operatsiyadan qutqardi va jarrohlik amaliyotini olimpiadadan keyin o‘tkazishga qaror qildik.

Shu yilning aprel oyidan yana sport bilan shug‘ullanishni boshladim, may oyida Osiyo chempionatida qatnashdim, 3-o‘rinni qo‘lga kiritdim. 2 haftadan so‘ng harbiylar o‘rtasidagi jahon chempionatida ishtirok etdim va 2-o‘rinni egalladim. Shundan keyin O‘zbekistonga qaytib keldik va Turkiyaga sport yig‘in mashg‘ulotlariga bordik. Asosiy jismoniy tayyorgarliklar o‘sha joyda o‘tdi, 1 oyga yaqin vaqt mobaynida kuniga 3 mahaldan shug‘ullandik. Tayyorgarlik oson bo‘lmadi.

Jismoniy tayyorgarlikning o‘zi yetarli emas

Turli xil davlatlardagi sportchilarni ko‘rganman va kuzatganman, o‘zbek sportchilari ularga qaraganda ancha kuchli. Faqat bizda ko‘pchilikka psixologik-ruhiy quvvat yetishmaydi. Sportda g‘olib bo‘lish uchun jismoniy tayyorgarlikning o‘zi kamlik qiladi.

Bundan tashqari, trener ham yuqori natijalarni qayd etishida muhim ahamiyatga ega. Murabbiy va sportchi bir-birini yaxshi tushunsa, ularning o‘rtalarida o‘zaro ishonch mustahkam bo‘lsa, natijalar, albatta, qoniqarli bo‘ladi. Murabbiyim Pavel Xan mashg‘ulotlarda menga to‘g‘ri yondashuvni topgan va bugungi natijalarimda ularning katta o‘rni bor.

Intervyuning to‘liq holda Kun.uz’ning YouTube’dagi kanalida tomosha qilish mumkin.

Diyoraxon Nabijonova suhbatlashdi.
Operatorlar: Mirvohid Mirrahimov, Ziyaddin Mamajonov
Montaj ustasi: Boburmirzo Anvarov