08:32 / 31.07.2021
2001
Китобдаги диспансерга келтирилган рентген ускунаси қутисидан эски темир бўлаги чиққан. Ҳолат ҳуқуқни ҳимоя қилиш идоралари томонидан ўрганилмоқда

Жорий йил 27 июль куни Kun.uz’да Қашқадарё вилоятида бир неча соҳаларда ўнлаб коррупцион ҳолатлар аниқлангани ҳақида хабар берилганди. Хабарда Китоб туманида жойлашган шифохона учун сотиб олинган рентген қутисидан эски темир бўлаги чиққани ҳам маълум қилинганди. Вилоят соғлиқни сақлаш бошқармаси мазкур хабар юзасидан муносабат билдирди.

Муносабатда ёзилишича, жорий йил 5 май куни диспансер томонидан dxarid.uz электрон порталига тиббий ускуналар харид қилиш бўйича эълон берилган. Махсус комиссиянинг тегишли баёнига кўра танлов ғолиби деб топилган масъулияти чекланган жамият билан 19 майда Мobile X-Ray RU-510-русумли бир дона рентген ускунасидан 582,8 миллион сўмга сотиб олиш бўйича шартнома тузилган. Шартномага мувофиқ рентген қути жойланган қути диспансерга келтирилган. Қути очилганида унинг ичидан шартномада кўрсатилган рентген ускунаси чиқмаган. Унинг ўрнига эски темир борлиги аниқланган.

Муносабатда қайд этилишича, айни пайтда вазият ҳуқуқни муҳофаза қилиш идоралари томонидан ўрганилмоқда.

Эслатиб ўтамиз, Аксилкоррупция агентлиги матбуот хизматининг хабар беришича, Китоб туманида жойлашган вилоят 2-сон асаб-руҳий касалликлар диспансерида Мobile X-Ray RU-510-русумли бир дона рентген ускунасидан 582,8 миллион сўмлик камомад мавжудлиги аниқланган. Ушбу диспансерга янги олиб келинган тиббий ускуна солинган қути холис гувоҳлар иштирокида очиб кўрилганида, унинг ичида Мobile X-Ray RU-510 русумли рентген аппарати бўлмаган. Унинг ўрнига қоғоз қути билан ўралган қизил рангдаги эски темир буюм турганлиги маълум бўлган.

Top