Zomin tog‘larida yong‘in chiqdi. Olovni o‘chirish uchun yuzlab xodimlar va 4ta vertolyot jalb etilgan (video)

Jizzax viloyatining Zomin tumanidagi tog‘li hududda yong‘in chiqdi.

FVV matbuot xizmati xabariga ko‘ra, 1 avgust kuni soat 10:40 larda Jizzax viloyati Zomin tumani «Duoba» QFY O‘riklisoy qishlog‘idagi dala maydonida yong‘in sodir bo‘lgani to‘g‘risida viloyat FVBga ma'lumot kelib tushgan. Yong‘in joyiga 4ta yong‘in-qutqaruv bo‘linmasi hamda 24 nafar shaxsiy tarkibdan iborat dastlabki bo‘linmalar yetib borib, yong‘inni o‘rab olish ishlarini boshlagan.

Vazirlik keyinroq hodisa bo‘yicha qo‘shimcha ma'lumot berdi, unga ko‘ra, yong‘in hududining kengayib ketishining oldini olish va uni butunlay o‘chirish uchun Favqulodda vaziyatlar vazirligidan yana qo‘shimcha 350dan ortiq shaxsiy tarkib, Mudofaa vazirligidan 4ta vertolyot, shuningdek, Milliy gvardiya, Ichki ishlar, Davlat ekologiya qo‘mitasi va boshqa tashkilotlarning kuch va vositalari jalb etilgan.

Hodisa tafsilotlari to‘g‘risida qo‘shimcha ma'lumot berilishi ma'lum qilingan.