Andijon va Xorazmda o‘qishga kiritib qo‘yishni va'da qilgan OTM hisobchisi va talaba ushlandi

Andijon davlat tibbiyot instituti hisobchisi M.A. abituriyent D.ning ishonchiga kirib, uni yuqori lavozimda ishlovchi tanishlari orqali institutning “Pediatriya ishi” yo‘nalishiga o‘qishga kiritib qo‘yish evaziga 10 000 dollar bilan birga fuqarolik pasporti nusxasi va abituriyent varaqchasini olgan vaqtida ashyoviy dalillar bilan ushlandi.

Tezkor tadbir Bosh prokuratura departamentining Andijon shahar bo‘limi tomonidan viloyat DXX bilan hamkorlikda o‘tkazilgan. Bu haqda departament matbuot xizmati xabar qildi.

Shu kabi, departamentning Xorazm viloyat boshqarmasi tomonidan o‘tkazilgan tezkor tadbirda, Urganch davlat universiteti talabasi M.M. fuqaro S.ni ushbu universitetning tarix fakultetiga universitetda ishlovchi tanishlari orqali o‘qishga kiritib qo‘yish evaziga 5 000 AQSh dollarini fuqaro O. orqali olgan vaqtida ashyoviy dalillar bilan ushlangan.

Bu holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.