Alibaba Xitoyda aholi farovonligini oshirish uchun 15,5 mlrd dollar ajratadi

Bu bilan Alibaba bir necha yillar davomida to‘plagan boyligini davlatga qaytarish majburiyatini olgan raqobatchilari qatoriga qo‘shildi.

Alibaba Group «umumiy farovonlik» hamda kambag‘allar va boylar orasidagi farqni yo‘qotish uchun 100 mlrd yuan (15,5 mlrd dollar) ajratishga va'da berdi. Ushbu mablag‘ni besh yil davomida texnologiyalarga investitsiyalar kiritish va kichik biznesni qo‘llab-quvvatlash bo‘yicha 10ta loyihaga taqsimlash rejalashtirilgan, deb xabar berdi Bloomberg.

Alibaba vakili ushbu ma'lumotni tasdiqladi, ammo batafsil izoh bermadi. Bu bilan Alibaba bir necha yillar davomida to‘plagan boyligini davlatga qaytarish majburiyatini olgan raqobatchilari qatoriga qo‘shildi.

Qishloq joylarida Alibaba kompaniyasiga raqobatchi bo‘lgan Pinduoduo kompaniyasi fermerlar faoliyatini yaxshilash uchun 1,5 mlrd dollar ajratishga va'da berdi. Avgustda Tencent Holdings ijtimoiy mas'uliyat dasturi uchun 15 mlrd dollar ajratishini ma'lum qilgandi.

Texnologik milliarderlar — Pinduoduo rahbari Kolin Xuang, ByteDance rahbari Chjan Imin, Xiaomi asoschisi Ley Tszyun va boshqalarning o‘zlari ham ijtimoiy maqsadlar uchun yirik miqdorda mablag‘ ajratmoqda.

Alibaba 2025 yilgacha ajratadigan mablag‘ kompaniya hozirgi mablag‘ining 31 foizini tashkil etadi.