Qashqadaryoda ko‘p qavatli uyda qamalib qolgan 2 yoshli qizcha qutqarildi

Qashqadaryo viloyati Qarshi tumanida ko‘p qavatli uyda qamalib qolgan 2 yoshli qizcha FVB xodimlari tomonidan qutqarilgan va sog‘-salomat ota-onasiga topshirilgan. Bu haqda viloyat FVB xabar bermoqda.

Ma'lum qilinishicha, joriy yil 2 sentabr kuni soat 18:45larda viloyat FVB navbatchilik dispetcher xizmatiga Qarshi tumani Chaman mahallasi hududidagi ko‘p qavatli uylarning birida yashovchi fuqaro 2 yoshli qizchasi uyda yolg‘iz qolib, kirish eshigi qulflanib qolgani haqida xabar berib, yordam so‘ragan.

Mazkur murojaatga ko‘ra, viloyat FVB qutqaruv otryadi aytilgan manzilga soat 18:55 larda yetib borib, qisqa vaqt ichida maxsus qurilmalar yordamida temir eshikni ochishgan. Qutqaruvchilar qarovsiz qoldirilgan qizaloqni yaqinlariga sog‘-salomat topshirgan.

Aniqlanishicha, xonadonning gaz plitasi ham yoqiq holda qarovsiz qoldirilgan. Qutqaruvchilar tomonidan gaz plitasi o‘chirilgan va xonadon sohiblariga elektr, gaz uskunalarini yoqiq holda qarovsiz qoldirmaslik borasida zarur tavsiyalar berilgan.