Samarqanddagi bog‘chada yong‘in sodir bo‘ldi

Samarqand shahrida joylashgan maktabgacha ta'lim muassasasida yong‘in sodir bo‘lgan. Bu haqda viloyat Favqulodda vaziyatlar boshqarmasi xabar bermoqda.

Bugun, 4 oktyabr kuni soat 14:36da Samarqand viloyati Favqulodda vaziyatlar boshqarmasiga Samarqand shahar Bag‘dod ko‘chasida joylashgan maktabgacha ta'lim muassasasi oshxonasining tom qismida yong‘in ro‘y berayotgani to‘g‘risida xabar kelib tushgan.

Shunga ko‘ra, soat 14:40da voqea joyiga 3 ta yong‘in-qutqaruv ekipaji yetib borgan va soat 15:06 da yong‘in o‘chirilgan. Hodisa oqibatida oshxonaning 30 metr kvadrat maydonda tom qismi yong‘indan zararlangan.

Qayd etilishicha, hodisada hech kim jabrlanmagan. Tarbiyalanuvchilar o‘z vaqtida evakuatsiya qilingan. Hozirda yong‘inning kelib chiqish sababi va moddiy zarar miqdori aniqlanmoqda.