Тошкент шаҳрининг Янгиҳаёт туманида жойлашган уйларнинг бирида содир бўлган ёнғинда 7 киши қолиб кетди. Улардан 6 нафари қутқарилган, бир нафари тиббий ёрдам кўрсатилишига қарамасдан вафот этган. Бу ҳақда Фавқулодда вазиятлар вазирлиги маълум қилди.

Бугун, 11 октябр куни соат 9:50да Тошкент шаҳар Янгиҳаёт туманида жойлашган уйларнинг бирида ёнғин содир бўлди. Воқеа жойига 4та ёнғин-қутқарув экипажи соат 9:53да етиб бориб, ёнғин соат 10:03да қуршаб олинган ва 10:25да бартараф этилган.

Ёнғин оқибатида уйнинг тахминан 20-25 кв м майдонда шифт ва ички қисми ёниб зарарланган. Тезкор ҳаракатлар натижасида 6 нафар фуқаро қутқарилиб, ҳаёти сақлаб қолинган, 1 нафар фуқаро кўрсатилган тиббий ёрдамга қарамасдан ҳалок бўлган.

«Ҳозирда ёнғиннинг келиб чиқиш сабаби ва моддий зарар миқдори аниқланмоқда», дейилади хабарда.