Tashkent City’dagi bog‘ xususiylashtiriladi

Davlat aktivlarini boshqarish agentligi «Tashkent city»dagi zamonaviy dam olish va istirohat bog‘ini kelgusida xususiylashtirish va ekspluatatsiya qilish yuzasidan «Master plan» ishlab chiqish uchun professional tashkilotlar jalb etilishi to‘g‘risida e'lon joylashtirdi.

E'longa ko‘ra, 2020 yilda ishga tushirilgan, «Tashkent city» xalqaro ishbilarmonlik markazi hududidagi 23,4679 ga umumiy yer maydoniga, 3 933 kv.m bino va inshootlar umumiy maydoniga ega zamonaviy dam olish va istirohat bog‘ini baholangan qiymatda ochiq tanlov savdolari orqali sotish rejalashtirilgan.

Shuning uchun «Tashkent city» xalqaro ishbilarmonlik markazi direksiyasi» DUK balansida saqlanayotgan obektni xususiylashtirish va undan kelgusida foydalanish bo‘yicha «Master plan» ishlab chiqishda professional tashkilot jalb etilishi belgilangan.

O‘zbekiston Respublikasi Davlat aktivlarini boshqarish agentligi xususiylashtirish shartlari va shakllari bo‘yicha professional tashkilotlarni tanlab olish yuzasidan tanlov e'lon qildi.

«Master plan» obektni xususiylashtirish va uni eksplutatsiya qilish bo‘yicha taklif etiladigan tartib va talablar qonunchilikka muvofiq bo‘lishi, shuningdek obektning individual xususiyatlarini hisobga olgan holda ishlab chiqilishi lozim.

Professional tashkilot belgilangan shart asosida «Master plan»ni ishlab chiqadi, u bo‘yicha barcha zaruriy xizmatlarni ko‘rsatadi. Takliflar 2021 yil 25 oktyabr soat 17:00 gacha qabul qilinishi belgilangan.

Avvalroq «Tashkent City» bog‘i hududiga 2020 yil 17 dekabrdan boshlab pulli qilingan kirish 14 oktabr kunidan boshlab yana bepul bo‘lgani xabar qilingan edi. Toshkent shahri hokimi Jahongir Ortiqxo‘jayev esa «Tashkent City» bog‘ini ekspluatatsiya qilish xarajatlari oyiga 900 mln so‘mni tashkil etayotganini bildirgan edi.