Ishlab chiqaruvchilar tomonidan sotiladigan gazga aksiz solig‘i bekor qilindi

Prezidentning “Aholi va iqtisodiyot tarmoqlarini tabiiy va suyultirilgan gaz bilan barqaror ta'minlash chora-tadbirlari to‘g‘risida”gi qarori (PQ–5267-son) qabul qilindi.

Bu haqda “Huquqiy axborot” kanali xabar berdi.

Unga muvofiq, 2021 yil 1 oktyabrdan yuridik shaxslar tomonidan O‘zbekistonga import qilingan tabiiy gazni realizatsiya qilishda aksiz solig‘ining nol foizlik stavkasi belgilandi.

Shuningdek, 2022 yil 1 yanvardan ishlab chiqaruvchi korxonalar tomonidan sotiladigan suyultirilgan gazga aksiz solig‘i solinmaydi.

Tadbirkorlarga tabiiy va suyultirilgan gazni O‘zbekistonga import qilishda QQSni 120 kungacha muddatga foizlar hisoblanmagan va uning to‘lanishini ta'minlash talab etilmagan holda kechiktirib (bo‘lib-bo‘lib) to‘lash huquqi beriladi.