2021 yilning yanvar-sentyabr oylarida o‘tgan yilning shu davriga nisbatan 67 588 ta kam yengil avtomobil ishlab chiqarilgan. Avtomobil benzini ishlab chiqarish hajmi esa 5,7 foizga o‘sib, 9 oyda 815 ming tonnaga yetgan.
Davlat statistika qo‘mitasi 2021 yilning yanvar–sentabr oylarida ayrim sanoat mahsulotlarini ishlab chiqarish hajmi haqida axborot berdi.
Ma'lum qilinishicha, ko‘rsatilgan davrda:
- Avtomobil benzini – 815,2 ming tonna
- Ko‘mir – 3644,2 ming tonna
- Neft – 518,8 ming tonna
- Yengil avtomobil – 150 183 dona
- Avtobus – 696 dona
- Yuk mashinasi – 2919 dona
- Traktor – 173 dona
- Avtomobil dvigatellari – 99,5 ming dona ishlab chiqarilgan.
Yuqoridagi raqamlardan ko‘rinishicha, 9 oylik davrda 815,2 ming tonna avtomobil benzini ishlab chiqarilgan bo‘lib, bu 2020 yilning shu davri (769,1 ming tonna)ga nisbatan 46,1 ming tonnaga yoki 5,7 foizga ko‘p.
Avtomobil benzini ishlab chiqarish va import hajmi ortganiga qaramay, narxlar 26,9 foizga qimmatlashgan.
Statqo‘mga ko‘ra, O‘zbekistonda yengil avtomobil ishlab chiqarish hajmi bir yil oldingiga qaraganda 31 foizga qisqargan: 2021 yil yanvar-sentyabr oylarida 150 183 dona yengil avtomobil ishlab chiqarilgan.
Taqqoslash uchun, 9 oylikda ishlab chiqarilgan yengil avtomobillar soni 2020 yilda 217 771 dona, 2019 yilda esa 186 432 donani tashkil etgandi
Avtosanoatdagi keskin qisqarish dunyo bo‘ylab kuzatilayotgan mikrochiplar tanqisligi bilan izohlanmoqda.
Avvalroq UzAuto Motors oktabr-noyabr oylarida Lacetti va Labo yetkazib berish bo‘yicha shartnomalarini bajara olmasligini, shuningdek, Cobalt avtomobillarini o‘rindiqni isitish modulisiz sotishini ma'lum qilgandi.
