Qashqadaryoda pirotexnika vositalarini noqonuniy tarzda sotayotgan shaxslarga chora ko‘rildi

Qashqadaryo viloyatida pirotexnika vositalarini noqonuniy tarzda sotayotgan shaxslarga chora ko‘rilgan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yil 11 noyabr kuni soat 9:00 larda Qashqadaryo viloyati bojxona boshqarmasi xodimlari tomonidan olingan tezkor ma'lumot asosida viloyat IIB PPX va JTSB hamda Milliy Gvardiya boshqarmasi xodimlari bilan hamkorlikda Qarshi shahrida «Pirotexnika vositalarining noqonuniy realizatsiyasiga qarshi kurashish» bo‘yicha tezkor tadbir o‘tkazilgan.

Tadbir davomida fuqaro M.B noqonuniy ravishda pirotexnika vositalarini sotmoqchi bo‘lgan vaqtda to‘xtatib qolingan. Undan umumiy qiymati 2 million 496 ming so‘mlik jami 6768 dona «Britanik» va «Solovey razoynik» yozuvli pirotexnika vositalari hujjatlashtirib olingan.

Bundan tashqari, 2021 yil 11 noyabr kuni soat 9:30 larda viloyat IIB va Milliy gvardiya boshqarmasi xodimlari hamkorlikda tezkor tadbir o‘tkazgan. Tadbirda Shahrisabz tumani Iftixor mahallasida yashovchi A.E. Shahrisabz shahrida joylashgan buyum bozori hududida umumiy miqdori 100 ming so‘m bo‘lgan 1 blok pirotexnika vositalarini noqonuniy tarzda sotayotganda ushlangan. Undan pirotexnika vositalari tegishli tartibda hujjatlashtirib olingan.

Qayd etilishicha, har ikki holat bo‘yicha qonunlarda belgilangan tarzda chora ko‘rilgan.