Nazariy fizika instituti tashkil etiladi

Vazirlar Mahkamasining “Mirzo Ulug‘bek nomidagi O‘zbekiston Milliy universiteti huzurida Nazariy fizika institutini tashkil etish to‘g‘risida”gi qarori loyihasi e'lon qilindi.

Oliy va o‘rta maxsus ta'lim vazirligi, Innovatsion rivojlanish vazirligi va Fanlar akademiyasining Mirzo Ulug‘bek nomidagi Milliy universitet huzurida Nazariy fizika institutini tashkil etish to‘g‘risidagi taklifiga rozilik beriladi.

Quyidagilar Institutning asosiy vazifalari etib belgilanadi:

• nazariy fizika sohasining dolzarb muammolari ilmiy yechimiga qaratilgan hamda uning istiqbolli yo‘nalishlari bo‘yicha ilmiy-tadqiqot ishlarini, jumladan fundamental, amaliy va innovatsion hamda xalqaro qo‘shma loyihalarni amalga oshirishda ishtirok etish;
• nazariy fizikaning yuqori energiyalar fizikasi va elementar zarralar, yadroviy fizika va astrofizika, relyativistik astrofizika va gravitatsiya, kondersirlangan holat va nochiziqli fizika, kvant tarmoqlar va dinamik tizimlarining muammolari bo‘yicha ilmiy anjumanlar va qo‘shma seminarlar tashkil etish;
• yosh olimlar uchun nazariy fizikaning yuqori energiyalar fizikasi va elementar zarralar, yadroviy fizika va astrofizika, relyativistik astrofizika va gravitatsiya, kondersirlangan holat va nochiziqli fizika, kvant tarmoqlar va dinamik tizimlari bo‘yicha ilmiy-o‘quv materiallarini nashrga tayyorlash;
• fizika sohasida professor-o‘qituvchilar, talabalar, doktorantlarning ilmiy tadqiqotlarda birgalikdagi ishtirokining turli shakllari asosida oliy ta'lim muassasalarida ilmiy, ilmiy-texnik va o‘quv faoliyati bilan integratsiyasini amalga oshirish;
• respublika oliy ta'lim muassasalaridagi iqtidorli talabalar va magistrantlarni ilmiy faoliyatga jalb etish orqali yuqori salohiyatli yosh nazariyotchi fiziklarni tayyorlashda oliy ta'lim muassasalariga hamkorlik qilish;
• xalqaro ilmiy hamkorliklarni rivojlantirish, rivojlangan mamlakatlarning nazariy fizika markazlari va ushbu sohadagi eng ilg‘or va istiqbolli tadqiqotlarning xalqaro tarmog‘i bilan aloqalarni ta'minlash hamda ilmiy tadqiqotlarning ustuvor yo‘nalishlari bo‘yicha xalqaro anjumanlarni tashkil etish;
• fizika sohasida rivojlangan mamlakatlarda olib borilayotgan tadqiqotlarning ustuvor yo‘nalishlari va istiqbollari to‘g‘risida tahliliy ma'lumotlar tayyorlash;
• ilmiy-tadqiqot loyihalari va dasturlarini ishlab chiqish uchun shartnoma asosida davlat organlari mutaxassislari, ilmiy tashkilotlar xodimlari, oliy ta'lim muassasalarining olimlari va o‘qituvchilarini, shu jumladan xalqaro va xorijiy mutaxassislarni jalb qilish;
• fizika sohasida tadqiqotlar ko‘lamini kengaytirish va nufuzli xalqaro ma'lumotlar bazalaridagi jurnallarda nazariy fizika bo‘yicha nashrlar sonini ko‘paytirish hamda fizika sohasidagi ilmiy jurnallarni bosqichma-bosqich xalqaro ilmiy va texnik ma'lumotlar bazalariga kiritishga ko‘maklashish.

Institut faoliyatini moliyalashtirish manbalari etib quyidagilar belgilanadi: bino va inshootlarni saqlash, shuningdek, institut xodimlari (ilmiy xodimlardan tashqari) mehnatiga haq to‘lash bo‘yicha xarajatlarni moliyalashtirish uchun ajratiladigan davlat budjeti mablag‘lari; ilmiy faoliyatga oid dasturlarni amalga oshirish uchun Innovatsion rivojlanish vazirligi tomonidan o‘tkaziladigan tanlovlar natijalari bo‘yicha ajratiladigan davlat budjeti mablag‘lari; universitetning budjetdan tashqari mablag‘lari; xalqaro moliya institutlari va boshqa xorijiy tashkilotlarning grantlari; xo‘jalik faoliyatidan hamda shartnoma asosida tadqiqotlar o‘tkazishdan tushadigan tushumlar; qonunchilik hujjatlari bilan taqiqlanmagan boshqa manbalar.

Institut Milliy universitetning Toshkent shahri, Olmazor tumani, Talabalar shaharchasida joylashgan Kimyo fakulteti binosiga bepul foydalanish huquqi asosida joylashtiriladi.