Toshkent viloyatida hokim yana bir yilga bormay o‘zgardi. Viloyat bu borada yetakchi

Himmat Qo‘chqorovich Oqbo‘tayev 2016 yilning 23 dekabridan 2017 yilning 12 iyuliga qadar Samarqand viloyatini boshqargan. Shundan keyin lavozimidan ozod etilgan va ma’lum muddatdan keyin Qo‘shrabot tumani hokimligiga tayinlangan.

Rustam Xolmurodov, 6 oy 25 kun, Samarqand viloyati

Rustam Ibragimovich Xolmurodov asli ilm odami bo‘lib, 2003 yilning 16 dekabridan 2004 yilning 9 iyuliga qadar Samarqand viloyatiga hokimlik qilgan. Viloyatning undan oldingi hokimi Shavkat Mirziyoyev edi va Mirziyoyevning bosh vazir lavozimida ish boshlashi ortidan bo‘shab qolgan hokimlik lavozimiga shu paytgacha SamDU rektori bo‘lgan Rustam Xolmurodov tayinlanadi. Ammo oradan 7 oy ham o‘tmay qator ayblovlar bilan ishdan olingan professor shundan keyin yuqori davralarda ko‘rinmay qoldi.

Faqat Shavkat Mirziyoyev prezidentlikni egallaganidan keyin rektorlikka qaytdi va hozirgi kunda ham shu lavozimda ish olib bormoqda. Ta’kidlash joiz, O‘zbekiston ilm-fanida Rustam Xolmurodovning mavqei baland.

Bahodir Po‘latov, 8 oy 21 kun, Surxondaryo viloyati

Hokimlar orasida san’at bilan professional tarzda shug‘ullangan yagona inson, “Bolalar” guruhining sobiq xonandasi va asli kasbi prokuror bo‘lgan Bahodir Po‘latov 2018-2019 yillarda 9 oyga yaqin Surxondaryo viloyatiga hokimlik qilgan. Keyinchalik qator tanqidlar bilan ishdan chetlashtirilgan, qaysi ishga o‘tkazilgani ham ma’lum qilinmagan.

Shukrullo Boboyev, 10 oy 16 kun, yana Toshkent viloyati

Shukrullo Boboyev 2016 yilning 15 dekabridan 2017 yilning 30 oktyabrigacha Toshkent viloyatini boshqargan. 2017 yilning oktyabrida paxta hosilini qo‘shib yozgani uchun ishdan olingan. Keyinroq, 2018 yil aprelida u Jizzax viloyatining Paxtakor tumaniga hokim qilib jo‘natilgandi.

O‘zbekistonda kadrlar bo‘yicha ma’lumotlar u qadar boy emas va ochiq manbalarda muntazam yuritilmagan. Turli viloyatlarga turli yillarda ishlab ketgan hokimlar to‘g‘risida aniq ma’lumotlar bo‘lmagani uchun bu ro‘yxatga kirmagan.

Hokimlar almashinuvi – o‘ziga xos jarayon

Islom Karimov prezidentligida hokimlar asosan shaxsan prezident ishtirokida tayinlangan va odatda qattiq tanqid bilan ishdan chetlashtirilgan bo‘lsa, Shavkat Mirziyoyev rahbarligida ularni ishdan olishda yoki yangi hokimni darhol tayinlashda bevosita prezidentning o‘zi ishtirok etmaydi.

Odatda avval nomzod v.b. sifatida tayinlanadi va ma’lum vaqt o‘tib rasman tasdiqlanadi. Shuningdek hokimlarning to‘nlar kiydirilib, olqishlar bilan kuzatilishi ham o‘ziga xos yangi an’anaga aylanmoqda.

Hokimlar saylovi masalasi bir necha bor ko‘tarilgan bo‘lsa-da, bu siyosiy islohot qachon bo‘lishi haligacha noma’lum.

Uzluksiz eng uzoq ishlagan hokimlar

Hokimlar orasida bir lavozimda uzoq ishlash bo‘yicha Shuhrat Abdurahmonov o‘ziga xos rekordchi – u 2013 yildan buyon, deyarli 9 yildirki Andijon viloyatiga rahbarlik qilib kelmoqda. Shuningdek u Islom Karimov davrida ham, Shavkat Mirziyoyev prezidentligida ham o‘z lavozimini saqlab qolgan yagona hokim hamdir.

Erkinjon Turdimov 2008-2016 yillarda uzluksiz 8 yil Navoiy viloyatiga hokimlik qilgan. Umuman, Turdimovning viloyat rahbari sifatidagi staji 13 yildan oshmoqda.

Shuningdek, Nuriddin Zayniyevich Zayniyev ham 2002-2011 yillar oralig‘ida, ya’ni salkam 9 yil Qashqadaryo viloyatiga hokimlik qilgan.

Namangan viloyati hokimi To‘lqin Jabborov esa 1996-2004 yillar oralig‘ida, ya’ni 8 yil shu lavozimda ishlagan.

Xorazm viloyati hokimi Islom Bobojonov 1999-2008 yillar oralig‘ida viloyatni boshqargan.

Undan keyingi o‘rinlarda Qobiljon Obidov va Rahmonbek Usmonov ham 7 yildan Andijon viloyatiga uzluksiz hokimlik qilganlar (Qobiljon Obidov 1993-1996 yillar oralig‘ida ham shu viloyatda hokim bo‘lib ishlagan).

Qiziqarli fakt: Zoir Mirzayev uchinchi viloyatni boshqarayotgan uchinchi hokimdir. Bunga qadar Erkinjon Turdimov Navoiy, Surxondaryo va Samarqand viloyatlariga hokimlik qilgan bo‘lsa, Turobjon Jo‘rayev Surxondaryo (2008-2011), Qashqadaryo (2011-2013) va Samarqand (2017-2018) viloyatlarini boshqargan hamda shu viloyatdan qamoqqa ravona bo‘lgan.

Tuman hokimlari orasida, umuman hokimlar orasida hech kim Qiziltepa tumanini 25 yildan buyon boshqarib kelgan va yaqinda ishdan bo‘shagan Shabon Nabiyev rekordiga yeta olmagan.

Abror Zohidov